ޕެރިސް (މާޗް 7) - ފައިގެ ކުޑަހުޅަށް ލިބިފައިވާ އަނިޔާ އިން ރަނގަޅުވާން އޮޕަރޭޝަނެއް ކުރަން ޖެހި ނޭމާ އަށް މި ސީޒަން ނިމިފައިވާއިރު، ދެން ޕީއެސްޖީ ޖޯޒީީގައި އޭނާ މެޗަކުން ނުފެނުމުގެ ފުރުސަތު އެބައޮތް ކަމަށް ފްރާންސްގެ ނޫސްތަކުން ރިޕޯޓްކޮށްފި އެވެ.
ނޭމާ، 31، ގެ ކަނާތު ފައިގެ ކުޑަހުޅަށް އަނިޔާވީ މިދިޔަ މަހުގެ 19 ވަނަ ދުވަހު ފްރެންޗް ލީގުގައި ޕީއެސްޖީން ލިލް އަތުން މޮޅުވި މެޗުގަ އެވެ. ނޭމާ އަށް މަހެއްހާ ދުވަސް ތެރޭގައި ލަސްވެގެން އެނބުރި ކުޅުމަށް އާދެވޭނެ ކަމަށް އޭރު ބެލެވުނަސް، ޕީއެސްޖީން އެންމެ ފަހުން ހެދި ޓެސްޓްތަކުން އެނގިގެންދިޔައީ، އޮޕަރޭޝަނެއް ނުކޮށް ނޭމާ އެއްކޮށް ފިޓްނުވާނެ ކަމެވެ.
އެހެންވެ، އޮޕަރޭޝަން ކުރަން ޖެހުމާ އެކު ނޭމާ އަށް ސީޒަން ނިމުނީ ކަމަށް ޕީއެސްޖީން ވެސް ވަނީ މީޑިއާގައި ބުނެފަ އެވެ.
ޕީއެސްޖީން ނެރުނު ބަޔާނެއްގައި ބުނެފައިވަނީ ނޭމާ އަށް އަލުން ޕްރެކްޓިހަށް ނުކުމެވޭނެ ކަމަށް ގަބޫލުކުރެވެނީ 3-4 މަސް ފަހުން ކަމަށެވެ.
ކުޑަހުޅަށް ލިިބިފައިވާ އަނިޔާތަކުގެ ސަބަބުން މީގެ ކުރިން ވެސް ނޭމާ އަށް ވަނީ ގިނަ ފަހަރުތަކެއް މަތިން ކުޅުމާ ދުރުގައި ހުންނަން ޖެހިފަ އެވެ. އެ ގޮތުން، މިދިޔަ ނޮވެމްބަރު/ޑިސެމްބަރުގައި ގަތަރުގައި ހޯސްޓްކުރި ފީފާ ވޯލްޑް ކަޕްގައި ވެސް ނޭމާ އަށް އަނިޔާގެ ސަބަބުން މެޗުތަކެއް ގެއްލުނެވެ. އަދި މީގެ ކުރިން 2019 އާއި 2021 ވަނަ އަހަރު ވެސް ކުޑަހުޅަށް ލިބުނު އަނިޔާގެ ސަބަބުން ނޭމާ އަށް ނިސްބަތުން ގިނަ ދުވަސްތަކެއް ކުޅުމާ ދުރުގައި ހުންނަން ޖެހުނެވެ.
ބާސެލޯނާ ދޫކޮށް، 2017 ވަނަ އަހަރު، ދުނިޔޭގެ ރެކޯޑް ފީއެއް ކަމަށްވާ 234 މިލިއަން ޑޮލަރަށް ޕީއެސްޖީ އަށް ސޮއިކުރި ނޭމާ މި ވަގުތު އެ ކްލަބާ އެކު ކޮންޓްރެކްޓްގައި ހުރީ 2025 ވަނަ އަހަރުގެ ޖޫން މަހުގެ ނިޔަލަށެވެ.
ރިޕޯޓްތައް ބުނާގޮތުން މި ސީޒަން ނިމުމުން ޕީއެސްޖީން އަންނަނީ ނޭމާ ވިއްކާލަން ތައްޔާރުވަމުންނެވެ. އެ ގޮތުން އިނގިރޭސި ކްލަބަކަށް ބޮޑު އަގުގައި ނޭމާ ވިއްކާލެވޭތޯ ޕީއެސްޖީން މަސައްކަތް ކުރާ ކަމަށް ދެކުނު އެމެރިކާގެ ކުޅިވަރު މީޑިއާތަކުން ވަނީ މީގެ ކުރިން ރިޕޯޓްކޮށްފަ އެވެ.
މި ސީޒަނުގައި ނޭމާ ހުރީ ރަނގަޅު ފޯމެއްގަ އެވެ. ފްރެންޗް ލީގުގައި 13 ގޯލު ޖަހައި 10 ގޯލު ޖަހަން ފުރުސަތު ތަނަވަސްކޮށްދިނެވެ.
