ރެޑްވޭވުން މާލެ ސަރަހައްދުގައި ހުޅުވި އެ ކުންފުނީގެ 15 ވަނަ އައުޓްލެޓެ މިއަދު ހުޅުވައިފި އެވެ.
މިއަދު ހަވީރު ބޭއްވި ރަސްމިއްޔާތުގައި ރެޑްވޭވްގެ އެންމެ ފަހުގެ ފިހާރަ ހުޅުވައިދެއްވީ އެ ކުންފުނީގެ ޗެއާމަން އަދި ރައްޔިތުންގެ މަޖިލީހުގެ މެމްބަރު އަހުމަދު ސަލީމެވެ. މިފަހަރު ހުޅުވި "ރެޑްވޭވް ސެންޓްރަލް" ހުންނަނީ ކުރިން އަގޯރާ ފިހާރަ ހިންގި އިމާރާތުގަ އެވެ.
އެ ފިހާރަ ހުޅުވުމަށް ބޭއްވި ރަސްމިއްޔާތެއްގައި ވާހަކަ ދައްކަވަމުން ސަލީމް ވިދާޅުވީ ރެޑްވޭވް ސެންޓްރަލް ހުޅުވުމުގެ ބޭނުމަކީ މިހިސާބުގަަނޑުގައި ދިރިއުޅޭ މީހުންނަށް ފަސޭހައިން ވިޔަފާރި ކޮށްލެވޭނެ ގޮތް ހެދުން ކަމަށެވެ.
ރެޑްވޭވުގެ ޗެއާމަން ސަލީމް، އެ ފިހާރައިގެ މުވައްޒަފުންނާއެކު. -- ފޮޓޯ: އަދަދު
"މިތަނުން ވެސް ރެޑްވޭވް އިން ވިއްކާ ހުރިހާ ބާވަތެއްގެ މުދާ ލިބެން ހުންނާނެ ރެޑްވޭވްގެ އެހެން ފިހާރަތަކޭ އެއްގޮތަށް މި ފިހާރައިގައި ވެސް ތަކެތީގެ އަގު ވަރަށް ބޮޑަށް ހެޔޮ ވާނެ،" ސަލީމް ވިދާޅުވި އެވެ.
ރެޑްވޭވް ސެންޓްރަލްއަކީ ހަތަރު ފަންގިފިލާއަށް ހަދާފައި ހުރި ފިހާރައެކެވެ. އެންމެ ތިރީ ފަންގިފިލާ ހާއްސަކޮށްފައި ވަނީ ކާބޯތަކެއްޗަށެވެ. ދެ ވަނަ ފަންގިފިލާގައި ހުންނަނީ ރީތިވާން ގެންގުޅޭ ސާމާނެވެ. ތިން ފަންގިފިލާ ހާއްސަކޮށްފައި ވަނީ ބަދިގޭގައި ގެންގުޅޭ ތަކެއްޗަށެވެ. އަދި ހަތަރު ވަނަ ފަންގިފިލާ ހާއްސަކޮށްފައި ވަނީ އަންނައުނަށެވެ.
ފިހާރަ ހުޅުވުމަށްފަހު ރެޑްވޭވުން ރޯދައަށް ހާއްސަކޮށް ޕްރޮމޯޝަނެއް ވެސް ފަށައިފަ އެވެ.
