ދެ ވަނަ ބޮޑު ހަނގުރާމައިގައި ޖަޕާނުގެ ފެކްޓްރީތަކުގައި ގަދަކަމުން މަސައްކަތް ކުރުވި ދެކުނު ކޮރެއާގެ ރައްޔިތުންނަށް ބަދަލުގެ ގޮތުގައި ފައިސާ ދޭން ދެކުނު ކޮރެއާ ސަރުކާރުން ނިންމައިފި އެވެ.
ޖަޕާނުގެ ފެކްޓްރީތަކުގައި ކޮރެއާ މީހުން ގަދަކަމުން މަސައްކަތް ކުރުވާފައި ވާތީ ދެ ގައުމުގެ ގުޅުމަށް ނޭދެވޭ އަސަރު ކުރެ އެވެ. ފައިސާގެ ބަދަލު ދޭން ނިންމުމަށް ދެ ގައުމުން ވެސް ތާއީދު ކުރެ އެވެ.
އެހެން ނަމަވެސް ކޮރެއާ ރައްޔިތުން ދެކޭ ގޮތުގައި އެ ނިންމުމުގެ ސަބަބުން ޖަޕާނު ޖަވާބުދާރީ ނުކުރެވެ އެވެ. އެހެންވެ، ބައެއް މީހުން އަޑުއުފުލުގެ ގޮތުން މުޒާހަރާ ކުރި އެވެ.
ވެރިރަށް ސޯލްގައި ފޮރިން މިނިސްޓްރީގެ ބޭރަށް އެއްވި މީހުން ސަރުކާރުގެ ނިންމުން ކުށްވެރި ކުރި އެވެ. ސަރުކާރުގެ ނިންމުމުގެ ދަށުން ދެކުނު ކޮރެއާގެ ކުންފުނިތަކުން ހާއްސަ ފަންޑަކަށް ފައިސާ ޖަމާކުރާނެ އެވެ. އެ ފަންޑު ހާއްސަ ކުރާނީ މަޖުބޫރުން މަސައްކަތް ކުރުވި މީހުންނަށް ބަދަލު ދިނުމަށެވެ.
ބޮޑު ހަނގުރާމައިގެ ދުވަސްވަރު 1910 އިން 1945 އަށް ޖަޕާނުގެ އަޅުވެތިކަމުގެ ދަށުގައި ކޮރެއާ އޮތް އިރު، 150،000 ކޮރެއާ ރައްޔިތުން ޖަޕާނުގެ ފެކްޓްރީތަކާއި މައިނުތަކުގައި މަސައްކަތް ކުރަން މަޖުބޫރު ކުރުވި އެވެ.
މީގެ ކުރިން ދެކުނު ކޮރެއާގެ ސަރުކާރުން ބޭނުންވީ ޖަޕާނުގެ ކުންފުނިތަކުން ފައިސާ ދިނުމަށެވެ. އެހެންވެ، އެ ނިންމުން ބަދަލުކޮށް ކޮރެއާގެ ކުންފުނިތަކުން ފައިސާ ދޭ ގޮތަށް ހެދުމުން ޖަޕާނުން މަރުހަބާ ކިޔެވެ.
ސަރުކާރުން މިހާރު ނިންމި ގޮތުން ފަންޑަށް ފައިސާ ދޭނީ ހަނގުރާމައިގެ ފަހުން 1965 ވަނަ އަހަރު ޖަޕާނާ އެކު ގާއިމްކުރި އެއްބަސްވުމަކުން ފައިދާވި ކޮރެއާގެ ކުންފުނިތަކެވެ. ގާތްގަނޑަކަށް ތިން މިލިއަން ޑޮލަރުގެ ފަންޑު ބަހާލާނީ ކޮރެއާގެ 15 އާއިލާއެއްގެ މެދުގަ އެވެ.
ދެކުނު ކޮރެއާގެ ސުޕްރީމް ކޯޓުން 2018 ވަނަ އަހަރު ޖަޕާނުގެ ކުންފުނިތަކަށް އަމުރު ކުރީ މަޖުބޫރުން މަސައްކަތް ކުރުވި 15 މީހަކަށް ފައިސާގެ ބަދަލު ދިނުމަށެވެ. އެހެން ނަމަވެސް، މިޓްސުބިޝީ އާއި ނިޕޯން ސްޓީލް ފަދަ ކުންފުނިތަކުން އެ އަމުރަށް އަމަލު ކުރުމަށް ދެކޮޅު ހެދި އެވެ.
މިދިޔަ އަހަރު އިންތިހާބުވި ކޮރެއާގެ އާ ރައީސް ޔޫން ސުކް ޔެއޯލްގެ އަމާޒަކީ ޖަޕާނާއެކު ގުޅުން ރަނގަޅު ކުރުމަށެވެ. އެމެރިކާއިން ވެސް ބާރު އަޅަނީ ޖަޕާނާއި ދެކުނު ކޮރެއާގެ ގުޅުން ރަނގަޅު ކުރުމަށެވެ.
