އާއިލާގެ އެންމެންނާ ތަފާތު ކަމަށް އަބަދުވެސް އިހުސާސް ކުރެވުނު ކަމަށާއި އެއީ މަންމާފުޅަށް ވެސް ކުރެވުނު އިހުސާސެއް ކަމަށް އިނގިރޭސިވިލާތުގެ އަމީރު ހެރީ ވިދާޅުވެއްޖެ އެވެ.
ހިތާމައާ ގުޅޭ ގޮތުން ކުރިއަށް ދިޔަ އޮންލައިން މަޝްވަރާއެއްގައި ހެރީ ވިދާޅުވީ ނަފުސާނީ ދުޅަހެޔޮ ކަމަށް ތެރަޕީ ފެށުމުން މަންމާފުޅު ޑަޔާނާގެ ހަނދާންތައް ފޮހެވިދާނެތީ ބިރުގަތް ކަމަށެވެ.
އޭގެ އިތުރުން ކުޑައިރުގެ "ނޭދެވޭ ތަޖުރިބާތަކުން" އަމިއްލަ ދަރިންނަށް "ޓްރޯމާ" ކުރިމަތިވެދާނެތީ ދަރިންނަށް ގިނައިން ލޯބިދީ އުފާވާ ކަންކަން ކުރާ ކަމަށް ހެރީ ވިދާޅުވި އެވެ.
އޮންލައިން މަޝްވަރާ ކުރިއަށް ދިޔައީ ޑރ. ގޭބާ މަޓޭއާ އެކު އެވެ. އޭނާއަކީ މީހުންނަށް ކުރެވޭ ނޭދެވޭ ތަޖުރިބާތަކާއި ދެވިހިފުން ފަދަ ކަންކަމާ ގުޅޭ ފޮތް ލިޔެފައިވާ މީހެކެވެ.
ހެރީ އާއި މަޓޭގެ މަޝްވަރާގައި ގިނައިން ދެކެވުނު ވާހަކަތަކަކީ ދާދި ފަހުން ނެރުނު ހެރީގެ އޮޓޯބަޔޮގްރަފީ "ސްޕެއާ"ގައި ވެސް ހިމެނޭ ވާހަކަތެކެވެ.
އެ ފޮތާ ގުޅޭ ގޮތުން ހެރީ ވިދާޅުވީ އާއްމުންގެ ހަމްދަރުދީ ހޯދަން މަސައްކަތް ނުކުރާ ކަމަށާއި އެމަނިކުފާނަކީ "ވިކްޓިމެއްގެ" ގޮތުގައި ގަބޫލުނުކުރާ ކަމަށެވެ.
ހެރީގެ އާއިލީ ގުޅުންތަކާއި ޒާތީ ހަޔާތާ ގުޅޭ މަޝްވަރާއެއް ބާއްވާފައިވާ އިރު، ދާދި ފަހުން އިނގިރޭސި ޝާހީ އާއިލާއިން ހެރީއަށް އެންގީ އިނގިރޭސިވިލާތުގައި ހެރީ އާއި އަނބިކަނބަލުން މޭގަންއަށް ހާއްސަ ފްރޮގްމޯ ކޮޓެޖް ހުސްކުރުމަށެވެ.
