ރަޝިއާ އާއި ޔޫކްރެއިންގެ ސިފައިން ބަހްމޫތު ސިޓީގެ މަގުމަތީގައި ހަމަލާ ބަދަލު ކުރަމުން ދިޔަ ނަމަވެސް، އެ ސިޓީގެ ކޮންޓްރޯލް ރަޝިއާއަށް އަދިވެސް ނުލިބޭ ކަމަށް ޑެޕިއުޓީ މޭޔަރު ވިދާޅުވެއްޖެ އެވެ.
އޮލެކްސެންޑްރް މާޗެންކޯ ބީބީސީއަށް ވިދާޅުވީ އެ ސިޓީން ނުގޮސް ތިބީ 4000 އާއްމުން ކަމަށާއި އެ މީހުން ރައްކާތެރިކަން ހޯދައިގެން ތިބި ތަންތަނަށް ގޭހާއި ކަރަންޓު އަދި ފެން ނުލިބޭ ކަމަށެވެ.
މާޗެންކޯ ވިދާޅުވީ ބަހްމޫތު ސިޓީގައި ގެއްލުން ނުލިބޭ "އެންމެ އިމާރާތެއް ވެސް ނެތް" ކަމަށާއި ސިޓީ "އެއްކޮށްހެން ސުންނާފަތިވެފައިވާ" ކަމަށެވެ.
ޔޫކްރެއިންގެ އިރުމަތީގައި އޮންނަ ސިޓީގެ ކޮންޓްރޯލް ހޯދަން ރަޝިއާއިން މަސައްކަތް ކުރާތާ ގިނަ މަސްތަކެއް ވެއްޖެ އެވެ. އެ ތަނުގެ ކޮންޓްރޯލް ލިބިއްޖެ ނަމަ އެކަން ވާނީ ރަޝިއާއަށް ބޮޑު ކުރިއެރުމަކަށެވެ.
އެހެން ނަމަވެސް ބައެއް އެނެލިސްޓުން ބުނާ ގޮތުގައި އެއީ ސްޓްރެޓެޖިކް ގޮތުން ބަލާއިރު ރަޝިއާއަށް މާ ބޮޑު ފައިދާތަކެއް ލިބޭނެ ސިޓީއެއް ނޫނެވެ.
މިދިޔަ ހަފުތާގައި ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވީ ގައުމުގެ އިރުމަތީގެ ހާލަތު ގޯސް ކަމަށާއި ވަކިން ހާއްސަކޮށް ބަހްމޫތު ސިޓީ ފާހަގަކުރެވޭ ކަމަށެވެ.
