ބާސެލޯނާ (މާޗް 3) - ބާސެލޯނާގެ ލެޖެންޑަރީ ތަރި، ރޮނާލްޑީނިއޯގެ ދަރިފުޅު، ޖޮއާއޯ މެންޑޭސް، ބާސެލޯނާގެ 19 އަހަރުން ދަށުގެ ޓީމަށް ސޮއިކޮށްފި އެވެ.
ފޯވާޑަކަށް ކުޅޭ، 18 އަހަރުގެ ޖޮއާއޯ މެންޑޭސް، ބާސެލޯނާގެ 19 އަހަރުން ދަށުގެ ޓީމަށް ސޮއިކުރިކަން އެ ކްލަބުން ރަސްމީކޮށް އިއުލާނުކުރިއިރު، ރޮނާލްޑީނިއޯ، ބާސެލޯނާ ދޫކޮށްލިތާ މި އަހަރަށް 15 އަހަރު ފުރޭނެ އެވެ.
ރޮނާލްޑީނިއޯ ވަނީ 2002 ވަނަ އަހަރު ބްރެޒިލާ އެކު، ދެކުނު ކޮރެއާ/ޖަޕާންގައި ބޭއްވި ފީފާ ވޯލްޑް ކަޕް ކާމިޔާބު ކުރުުމަށް ފަހު، ޕީއެސްޖީ ދޫކޮށްލައި، ބާސެލޯނާ އަށް ބަދަލުވެފަ އެވެ. ބާސެލޯނާގައި ހުރެ، ރޮނާލްޑީނިއޯ ވަނީ ޗެމްޕިއަންސް ލީގު ކާމިޔާބު ކުރުމުގެ އިތުރުން އިންޑިވިޖުއަލީ ގިނަ އެވޯޑްތަކެއް ހޯދައިފަ އެވެ. އޭގެ ތެރޭގައި ފީފާ އިން ހޮވާ އެންމެ މޮޅު ފުޓްބޯޅަ ކުޅުންތެރިޔާގެ މަގާމާއި ބެލޮންޑިއޯ ޓްރޮފީ ވެސް ހިމެނެ އެވެ.
ރޮނާލްޑީނިއޯ (ވ) އާއި ޖޮއާއޯ މެންޑޭސް އެކުގައި ނަގާފައިވާ ސެލްފީއެއް.
ރޮނާލްޑީނިއޯގެ ދަރިފުޅު، ޖޮއާއޯ މެންޑޭސް، މިހާތަނަށް ކުޅެމުން އައީ ބްރެޒިލްގެ ކްލަބް، ކްރުޒޭރޯގެ ޔޫތު ޓީމަށެވެ. މިދިޔަ ސީޒަނުގެ ނިޔަލަށް އެ ޓީމަށް ކުުޅުމަށް ފަހު، އެ ކްލަބާ އެކު ހަދާފައިވާ އެއްބަސްވުން ނިމުމަކަށް ގެނައީ އެވެ. ފާއިތުވި ހަފްތާތަކުގައި ޖޮއާއޯ މެންޑޭސް އައީ ބާސެލޯނާގެ ޓްރަޔަލްގައި ބައިވެރިވަމުންނެވެ.
އެންމެ ފަހުން، ބާސެލޯނާގެ ޔޫތު ކޯޗުންނަށް ޖޮއާއޯ މެންޑޭސް ކަމުދިއުމުން އޭނާއާ އެކު ކޮންޓްރެކްޓެއް ހެދީ އެވެ. އެ ކޮންޓްރެކްޓްގެ މުއްދަތެއް ހާމަކުރުމުގެ ބަދަލުގައި ބާސެލޯނާ އިން ބުނީ މިއީ ދިގު މުއްދަތަކަށް ވެވުނު އެއްބަސްވުމެއް ކަމަށެވެ.
