ލަންޑަން (މާޗު 2) - އިނގިރޭސި އެފްއޭގެ ބެޓިން ގަވައިދުތަކާ ހިލާފުވި ކަމަށް ބްރެންޓްފޯޑްގެ ފޯވަޑް އައިވަން ޓޯނީ އެއްބަސްވުމާ އެކު، މި ކުށާ ގުޅިގެން އޭނާ އަށް ބޮޑު އަދަބަކާ ކުރިމަތިލާންޖެހުމުގެ ފުރުސަތު ބޮޑުވެއްޖެ އެވެ.
އިނގިރޭސި އެފްއޭ އިން ހަދާފައިވާ ބެޓިންގެ ގަވައިދުތަކާ ހިލާފުވެގެން، ޓޯނީގެ 232 މައްސަލައެއް ނޮވެމްބަރު މަހު ފާހަގަކޮށްފައިވާއިރު، އިތުރު 30 މައްސަލައެއް ޑިސެމްބަރު މަހު ވަނީ ފާހަގަކޮށްފަ އެވެ.
އިނގިރޭސި އެފްއޭގެ ބެޓިން ގަވައިދުތައް ބުނާގޮތުން އެ އެސޯސިއޭޝަންގެ ދަށުން ކުޅޭ ލީގެއްގެ ކުޅުންތެރިއަކަށް މެޗުތަކަށް ބެޓު ކުރުމަކީ މަނާ ކަމެެކެވެ. އަދި ބެޓިންގެ ބޭނުމަށް މެޗުތަކާ ގުޅޭ އެއްވެސް މައުލޫމާތެއް ހިއްސާކުރުމަކީ ވެސް މަނާ ކަމެކެވެ.
ޓޯނީ، 26، ވަނީ އޭނާއާ ދެކޮޅަށް ހުށަހަޅާފައިވާ ބައެއް މައްސަލަތަކަށް އެއްބަސްވެފަ އެވެ. އެކަމަކު، އެހެން ބައެއް މައްސަލަތަކަށް އޭނާ އެއްބަހެއްނުވެ އެވެ.
ބެޓިންގެ ގަވައިދާ ހިލާފުވެފައިވާ ކަމަށް ފާހަގަވެފައިވަނީ 25 ފެބްރުއަރީ 2017 އިން ފެށިގެން 23 ޖެނުއަރީ 2021 ގެ މުއްދަތަށެވެ. މި މުއްދަތުގައި ޓޯނީ ވަނީ ބްރެންޓްފޯޑްގެ އިތުރުން ސްކަންތޯޕް ޔުނައިޓަޑާއި ވިގަން އެތުލެޓިކް އަދި ޕީޓަބަރާ ޔުނައިޓަޑަށް ކުޅެފަ އެވެ.
މި ސީޒަންގެ ޕްރިމިއާ ލީގުގައި 21 މެޗުން 14 ލަނޑު ޓޯނީ ޖަހާފައިވާއިރު، ބްރެންޓްފޯޑް މި ވަގުތު އޮތީ ތާވަލްގެ ނުވަ ވަނައިގަ އެވެ. އަދި ޔޫރަޕްގެ ފުޓްބޯޅައިގެ ޖާގައެއް ހޯދުމުގެ ފުރުސަތު ވެސް ބްރެންޓްފޯޑަށް އެބައޮތެވެ.
މި މައްސަލައާ ގުޅިގެން ޓޯނީ އަށް ސަސްޕެންޝަނެއް އަންނާނެ ކަމަށް ބެލެވެ އެވެ. އެހެންވެއްޖެނަމަ، އެއީ ބްރެންޓްފޯޑަށް ލިބޭނެ ވަރަށް ބޮޑު ގެއްލުމެކެވެ.
