ރައީސް އިބްރާހީމް މުހައްމަދު ސޯލިހްއާއި ނައިބު ރައީސް ފައިސަލް ނަސީމްގެ ތެރެއިން މި ވަގުތު ގާނޫނީ ގޮތުން ރައީސުލްޖުމްހޫރިއްޔާއަކީ ކޮން ބޭފުޅެއް ކަން ޔަގީން ނުވާތީ އުފެދިފައިވާ ދުސްތޫރީ މައްސަލައަށް ހައްލެއް ހޯދުމަށް ގޮވާލައި ރައްޔިތުންގެ މަޖިލީހަށް ގަރާރެއް ހުށަހަޅައިފި އެވެ.
މީގެ އަހަރެއް ކުރިން ރައީސް ސޯލިހް، ތައިރޮއިޑް ފަރުވާއަކަށް އޮޕަރޭޝަނެއް ކުރެއްވި ވަގުތު ކޮޅަށް ނައިބު ރައީސް ފައިސަލްއަށް ވަގުތީ ގޮތުން ރައީސްގެ މަސްއޫލިއްޔަތުތަކާ ހަވާލުވެވަޑައިގަންނަވަން ރައީސް ކަމުގެ ހުވާ ކުރެއްވި އެވެ.
މަސްއޫލިއްޔަތުތަކާ ނައިބު ރައީސް ހަވާލުވެވަޑައިގަތީ އެންމެ ތިން ގަޑިއިރަށެވެ. އެއަށް ފަހު ރައީސް އޮފީހުން ބުނީ ރައީސްގެ މަސްއޫލިއްޔަތުތަކާ ރައީސް ސޯލިހް އަލުން ހަވާލުވެވަޑައިގެންނެވި ކަމަށެވެ. އެ ކަން ކުރީ ގާނޫނު އަސާސީގެ 123 ވަނަ މާއްދާގައިވާ ގޮތުގެ މަތިން މަޖިލީހުގެ ރައީސަށް އެކަން ލިއުމުން އެންގެވުމަށް ފަހުގައި ކަމަށް ވެސް ރައީސް އޮފީހުން ބުންޏެވެ.
އޭގެ އަހަރެއް ފަހުން މަހިބަދޫ ދާއިރާގެ މެންބަރު އަހުމަދު ތޯރިގް ހުށަހެޅުއްވި ގަރާރުގައިވާ ގޮތުން ގާނޫނު އަސާސީގައި ނައިބު ރައީސްގެ ދުސްތޫރީ ޒިންމާތައް ބަޔާން ކޮށްފައިވާއިރު، އެ ޒިންމާތަކުގެ ތެރޭގައި ވަގުތީ ގޮތުން ވެރިކަމާ ހަވާލުވުން ނުހިމެނޭ ކަމަށް ބުނެފައިވެ އެވެ.
"އެކަމުގެ ސަބަބުން މިހާރު އުފެދިފައިވަނީ ދުސްތޫރީ އޮޅުންބޮޅުންގަނޑެއް ކަމުގައިވާތީ މި މައްސަލައިގައި ފައިސިލާކުރަނިވި ހެއްލެއް ދިވެހި ރާއްޖޭގެ ސުޕްރީމް ކޯޓުން ހޯދައިދޭން ޖެހޭ ކަމަށް ދެކޭ ކަމަށް ވާތީ އެފަދަ ހައްލެއް ހޯދުމަށް ގޮވާލައި،" ގަރާރުގައި ބުނެފައިވެ އެވެ.
އިދިކޮޅުން ވަނީ މި މައްސަލަ ދުސްތޫރީ މައްސަލައެއްގެ ގޮތުގައި ސުޕްރީމް ކޯޓަށް ވެސް މި ހަފްތާގައި ހުށަހަޅައިފަ އެވެ.
