ރަޝިއާއާ ގުޅޭ ބޯޑަރުގައި ސެކިއުރިޓީ ވަރުގަދަ ކުރުމުގެ ގޮތުން 200 ކިލޯމީޓަރު ދިގު ފެންސު ޖެހުމުގެ މަސައްކަތް ފިންލޭންޑުން ފަށައިފި އެވެ.
ބޯޑަރު ގާޑުން ބުނީ އެއީ ތިން މީޓަރު އުސް ފެންސެއް ކަމަށާއި އެންމެ މަތީގައި ހުންނާނީ ކަށިނަރު ކަމަށެވެ. ފެންސުގެ ބައެއް ހިސާބުތަކުގައި ނައިޓް ވިޝަން ކެމެރާ އާއި ލައިޓު އަދި ލައުޑްސްޕީކަރު ހުންނާނެ އެވެ.
ޔޫރަޕިއަން ޔޫނިއަން (އީޔޫ) ގައުމުތަކުގެ ތެރެއިން އެންމެ ދިގު ބޯޑަރެއް ރަޝިއާއާ ހިއްސާކުރަނީ ފިންލޭންޑުންނެވެ. އެއީ 1،304 ކިލޯމީޓަރުގެ ބޯޑަރެކެވެ. މިހާރު ބޯޑަރު ސެކިއުރިޓީއެއްގެ ގޮތުން ހުންނަނީ ލުއި ފިލާ ފެންސުތަކެވެ.
ސެކިއުރިޓީ ވަރުގަދަކޮށް އެހެން ފެންސެއް ޖެހުމަށް ފިންލޭންޑުން ނިންމީ ޔޫކްރެއިން ހަނގުރާމަ ފެށުމުން، ރަޝިއާ ދޫކޮށް ފިންލޭންޑަށް އެތެރެވާން އުޅޭ މީހުން އިތުރުވުމުންނެވެ.
އޭގެ އިތުރުން ވެސް ހަނގުރާމަ ފެށި ފަހުން ފިންލޭންޑުން ދަނީ އެމެރިކާ އިސްވެ ހިންގާ އަސްކަރީ ކޯލިޝަން ނޭޓޯގެ މެމްބަރުކަން ހޯދަން މަސައްކަތް ކުރަމުންނެވެ.
