ރައީސް އިބްރާހީމް މުހައްމަދު ސޯލިހްއާއި ނައިބު ރައީސް ފައިސަލް ނަސީމްގެ ތެރެއިން މި ވަގުތު ގާނޫނީ ރައީސުލްޖުމްހޫރިއްޔާއަކީ ކޮން ބޭފުޅެއް ކަން ޔަގީން ކުރަން އިދިކޮޅު ޕީޕީއެމާއި ޕީއެންސީން ސުޕްރީމް ކޯޓަށް ދުސްތޫރީ މައްސަލައެއް ހުށަހަޅައިފި އެވެ.
މީގެ އަހަރެއް ކުރިން ރައީސް ސޯލިހް، ތައިރޮއިޑް ފަރުވާއަކަށް އޮޕަރޭޝަނެއް ކުރެއްވި ވަގުތު ކޮޅަށް ނައިބު ރައީސް ފައިސަލްއަށް ވަގުތީ ގޮތުން ރައީސްގެ މަސްއޫލިއްޔަތު ހަވާލުވެވަޑައިގަންވަން ރައީސް ކަމުގެ ހުވާ ކުރެއްވި އެވެ.
މަސްއޫލިއްޔަތުތަކާ ނައިބު ރައީސް ހަވާލުވެވަޑައިގަތީ އެންމެ ތިން ގަޑިއިރަށެވެ. އެއަށް ފަހު ރައީސް އޮފީހުން ބުނީ ރައީސްގެ މަސްއޫލިއްޔަތުތަކާ ރައީސް ސޯލިހް އަލުން ހަވާލުވެވަޑައިގެންނެވި ކަމަށެވެ. އެ ކަން ކުރީ ގާނޫނު އަސާސީގެ 123 ވަނަ މާއްދާގައިވާ ގޮތުގެ މަތިން ރައްޔިތުންގެ މަޖިލީހުގެ ރައީސް އެ ކަން ލިއުމުން އެންގެވުމަށް ފަހުގައި ކަމަށް ވެސް ރައީސް އޮފީހުން ބުންޏެވެ.
މި ކަން ހިނގިތާ އަހަރެއް ފަހުން ޕީޕީއެމާއި ޕީއެންސީގެ ލީޑާޝިޕްގެ އިތުރަށް އެ ކޯލިޝަންގެ ލީގަލް ޓީމުގައި އުޅުއްވާ ގާނޫނީ ވަކީލުން ވަނީ މިއަދު ހެނދުނު އެގާރަ ޖަހާކަށް ހާއިރު ސުޕްރީމް ކޯޓަށް ވަޑައިގެން ދުސްތޫރީ މައްސަލައެއް ގޮތުގައި ހުށަހަޅުއްވައިފަ އެވެ.
ލީގަލް ޓީމުގައި ހިމެނޭ ވަކީލު އަހުމަދު ސިއްދީގު ވިދާޅުވީ ފައިސަލް ނަސީމް ކުރެއްވި ހުވަޔަކީ ގާނޫނު އަސާސީގައި ކުރައްވަން އޮތް ހުވަޔެއްތޯ ސާފުކުރުމުގެ ގޮތުން ގާނޫނު އަސާސީ މާނަކުރުމަށް އެދިފައިވާނެ ކަމަށެވެ.
"މި މައްސަލަ ސުޕްރީމް ކޯޓުން ބަލައިގަންނާނެ ކަމަށް ވަރަށް ބޮޑަށް އުންމީދު ކުރެވޭ، ރައްޔިތުންގެ މެދުގައި މި ވަރުގެ ބޮޑު އޮޅުމެއް އުފެދިގެން އުޅޭއިރު އެ ކަން ސާފުކޮށް، ހުވާކުރި ގާނޫނީ މާއްދާ ރަނގަޅަށް މާނަކޮށްދިނުމަކީ ސުޕްރީމް ކޯޓުގެ ވަރަށް ބޮޑު ޒިންމާއެއް،" ސިއްދީގު ވިދާޅުވި އެވެ.
ރައީސް ކަމުގެ ހުވާ ކުރައްވަން ޖެހިވަޑައި ނުގަތަސް، ނައިބު ރައީސް އެ ކަން ކުރެއްވުމަކުން ރައީސް ސޯލިހްގެ މަގާމު ނުގެއްލޭނެ ކަމަށާއި، ގާނޫނީ ހުވާ ކުރައްވައިގެން ތިއްބެވި ދެ ރައީސުން ތިއްބެވުމުން ސުވާލުތަކެއް އުފެދޭ ކަމުގައި ވެސް ގާނޫނީ ބައެއް ވަކީލުން ވިދާޅުވެފައިވެ އެވެ.
