ޕާޓީތަކުގެ ކަންކަމުގައި ގޮތް ނިންމާއިރު ހަމައެކަނި އިސް ސަފުގެ މަޝްވަރާގެ މަތިން ގޮތް ނިންމުން ހުއްޓާލަން ޖެހޭ ކަމަށް ޖުމްހުރީ ޕާޓީގެ އަލަށް އިންތިހާބުވި ނައިބު ލީޑަރު އައިޝަތު ނަހުލާ ވިދާޅުވެއްޖެ އެވެ.
ރޭ ދަރުބާރުގޭގައި އޮތް އެ ޕާޓީގެ ގައުމީ ކޮންފަރެންސް ނިންމުމުގެ ރަސްމިއްޔާތުގައި ވާހަކަ ދައްކަވަމުން ނަހުލާ ވިދާޅުވީ މިހާރު ގިނަ ޕާޓީތަކުން ފެންނަމުންދާ ހަގީގަތަކީ ޕާޓީތަކުގެ ނިންމުންތަކުގައި ހަމައެކަނި އިސް ސަފުގަ މަޝްވަރާކޮށް ކަން ނިންމަމުންދާ ތަން ކަމަށެވެ.
ނަމަވެސް، އޭނާ ގަބޫލުކުރައްވާ ގޮތުގައި ކޮންމެ ޕާޓީއެއްގެ ވެސް އެންމެ މުހިންމު ރައުސުލްމާލަކީ އެ ޕާޓީއެއްގެ އާންމު މެންބަރުން ކަމަށެވެ. އަދި، ޕާޓީއެއްގެ ކޮންމެ ނިންމުމެއްގައި ވެސް ޕާޓީގެ އާންމެ މެންބަރުންގެ ހިޔާލާއި ފިކުރު އަދި އެންމެންގެ ބައިވެރިވުން އޮންނަންވާނެ ކަމަށް ނަހުލާ ވިދާޅުވި އެވެ.
"ޕާޓީއެއް ދެމެހެއްޓެނިވި ގޮތެއްގައި ކުރިއަށް ގެންދިއުމަށްޓަކާ، ޕާޓީގެ ކުރިއެރުމަށް، އާންމު މެންބަރުންގެ ބަސް އެއީ ޕާޓީގެ މަތިން ތިރިއަށް އަދި ތިރިން މައްޗަށް ވެސް ހިއްސާކުރެވޭ އެއްޗެއް ކަމުގައި ވާންޖެހޭ," މި ސަރުކާރުގެ ޓްރާންސްޕޯޓު މިނިސްޓަރުގެ މަގާމުގައި ހުންނެވި ނަހުލާ ވިދާޅުވި އެވެ.
މީގެއިތުރުން، ޕާޓީގެ ގްރާސްރޫޓަކީ ޕާޓީ ދެމެހެއްޓެނިވި ގޮތުގައި ކުރިއަރައި މުހިންމު އެތައް ނިންމުންތަކެއް ނިންމާ އަދި އެ ނިންމުންތަކަށް ވާސިލްވުމަށްޓަކައި ބާރުވެރި ކުރުވޭ، އަދި ބާރުވެރި ވާންޖެހޭ ފަރާތް ކަމަށް ނަހުލާ ވިދާޅުވި އެވެ.
ނަހުލާ މިފަދައިން ވާހަކަ ދައްކަވާފައިމިވަނީ ހޮނިހުރު ދުވަހުގެ ރޭ، މި އަހަރު ބާއްވާ ރިޔާސީ އިންތިހާބުގައި ޖޭޕީއިން ވަކިން ވާދަކުރުމަށް ނުވަތަ އެ ޕާޓީ އިސްވެ އޮވެ އުފައްދާ ކޯލިޝަނެއް ވާދަކުރުމަށް ޕާޓީގެ ކައުންސިލަށް ލަފާދީފައިވާ ދަނޑިވަޅެއްގަ އެވެ.
އެފަދައިން އެ ޕާޓީގެ ގައުމީ ކޮންފަރެންސަށް ހުށަހެޅި ގަރާރު ބަހުސަކަށްފަހު ފާސްކުރީ ހާޒިރީންގެ އިއްތިފާގުންނެވެ.
ރިޔާސީ އިންތިހާބުގައި ޖޭޕީއިން ކަންކުރާނެ ގޮތް ނިންމާނީ އަލަށް އިންތިހާބުވި އެ ޕާޓީގެ ކައުންސިލުންނެވެ.
މިހާރު ވެސް ވެރިކަންކުރާ ކޯލިޝަނުގައި އޮތް ޖޭޕީއިން މި އަހަރުގެ އިންތިހާބަށް ވެސް އެމްޑީޕީއާ އެކު ކުރިއަށް ދިއުމަށް އެދި އެ ޕާޓީގެ ކެންޑިޑޭޓު ރައީސް އިބްރާހިމް މުހައްމަދު ސޯލިހު ވަނީ ޖޭޕީގެ ލީޑަރު ގާސިމް އިބްރާހިމަށް ސިޓީއެއް ވެސް ފޮނުއްވާފަ އެވެ.
