ފޯ ނޭޝަންސް ކަޕް ވޮލީބޯޅަ މުބާރާތުގެ ފިރިހެން ޑިވިޝަނުގެ ލީގު ބުރުގެ ފަހު މެޗުގައި، އަފްގާނިސްތާނާ ދެކޮޅަށް ރޭ ރާއްޖެ އިން މޮޅަށް ކުޅުނު ކަމަށާއި، މެޗުން ބަލިވީ އެންމެ މުހިންމު ދަނޑިވަޅުގައި ރެފްރީގެ ނިންމުންތައް ގޯސްވެގެން ކަމަށް ގައުމީ ފިރިހެން ވޮލީބޯޅަ ޓީމްގެ ކޯޗު، ބްރެޒިލްގެ ސާޖިއޯ ވެލޯސޯ ބުނެފި އެވެ.
ރޭ އަފްގާނިސްތާން އަތުން ބަލިވެ ލީގު ބުރުގައި ރާއްޖެ އަށް ލިބުނީ ތިން ވަނަ އެވެ. އެހެންކަމުން، މިރޭ ރާއްޖެ ސެމީ ފައިނަލްގައި ކުޅެން ޖެހޭނީ މެލޭޝިއާއާ ދެކޮޅަށެވެ.
އަފްގާނިސްތާން އަތުން ބަލިވި މެޗާ ގުޅޭގޮތުން ކޯޗު ވެލޯސޯ ބުނީ އެ މެޗުން ބަލިވީ ޓީމުން މޮޅަށް ކުޅެމުން ދިޔަ ދަނޑިވަޅުގައި ރެފްރީގެ ނިންމުންތައް ގޯސްވެގެން ކަމަށެވެ. އެ ދަނޑިވަޅުގައި ކުޅުންތެރިންގެ ފޯކަސްވެސް ދިޔައީ ކަމަށާއި، ހުރިހާ ގޮތަކުން ބަލާއިރު ވެސް ރާއްޖޭގެ ޓީމުން މެޗު ފެށި ވަރަށް މޮޅަށް ކަމަށް ވެލޯސޯގެ ވާހަކައިގައި ވަނީ ފާހަގަކޮށްފަ އެވެ.
"ސެޓުގެ ފަހުކޮޅު ޖެހިޖެހިގެން ފަސް މިސްޓޭކް އެ ފެނުނީ ރެފްރީގެ. އަހަރުމެންނަށް ލިބެންޖެހޭ ފަސް ޕޮއިންޓް އެ ދިނީ އެ ޓީމަށް. އެކަމަކު ވެސް މައްސަލައެއް ނެތް. އަހަރެން ބޭނުންވި ގޮތަށް ޓީމުން ކުޅެފި" ވެލޯސޯ ބުންޏެވެ.
ބަހްރޭން ޓީމަށް ކުރިން ކޯޗުކޮށްދިން ވެލޯސޯ ބުނީ މެޗުގެ ފުރަތަަމަ ދެ ސެޓު ގެއްލުމުން ރާއްޖެ އަށް ލީގު ބުރުގެ އެއް ވަނަ ހޯދުމުގެ ފުރުސަތު ގެއްލުނީ ކަމަށާއި، ފަހު ސެޓުގައި ހުރިހާ ޒުުވާން ކުޅުންތެރިން އެރުވީ އެހެންވެގެން ކަމަށެވެ.
ބެންޗުގައި ތިބި ހުރިހާ ކުޅުންތެރިން އެރުވި ނަމަވެސް ރާއްޖެ ޓީމުން ވަރަށް ރަނގަޅަށް ކުޅެ އަފްގާނިސްތާން ޕްރެޝަރަށް ދުއްވާލި ކަމަށެވެ. ވެލޯސޯ ދެކޭގޮތުގައި ރޭގެ މެޗުގައި ފުރުސަތު ދިން ޒުވާން ކުޅުންތެރިން ފަހު ސެޓުގައި ދެއްކި ކުޅުމަކީ ސެމީ މެޗަށް ނިކުންނައިރު އެއީ ލިބޭ ބޮޑު ހިތްހަމަޖެހުމެކެވެ.
މެލޭޝިއާއާ ދެކޮޅަށް ކުޅޭ ސެމީ ފައިނަލު މެޗާ މެދު އިތުބާރު އޮތީ ކިހާވަރަކަށްތޯ އެހުމުން ވެލޯސޯ ބުނީ ފުރަތަމަ މެޗުގައި މެލޭޝިއާ އަތުން ބަލިވީ ބޭކާރު ޕްރެޝަރެއް ކުޅުންތެރިން ބޮލަށް ލައިގެން ކުޅުމުން ކަަމަށެވެ. ނަމަވެސް އޭގެ ފަހުން ޓީމުން މިދިޔަ ދެ މެޗުގައި މިސްޓޭކްތައް މަދުކޮށް ކުޅުން ބޮޑުތަނުން ރަނގަޅުކޮށްފި ކަމަށާއި، މިރޭ ތަފާތު ފެންނާނެ ކަމުގެ ޔަގީންކަން އެބައޮތް ކަމަށް ވެލޯސޯ ވަނީ ބުނެފަ އެވެ.
"އެއް އަހަރު ފަހުން ވާދަވެރި މެޗަކަށް ނިކުތީ މެލޭޝިއާ އާ ދެކޮޅަށް. އެހެންވެ ކުދިން އެ ލެވެލް އަށް ސެޓުވާން ވަގުތު ނެގި. މިހާރު މިތިބީ މެންޓަލީ ވެސް ބޭނުންވާ ގޮތަށް ސެޓުވެފައި. އެހެންވީމަ މާދަމާރޭ (މިރޭ) ތަފާތު ކުޅުމެއް ދެއްކޭނެކަމުގެ އުއްމީދު އެބައޮތް" އޭޏާ ބުންޏެވެ.
ކޯޗު ބުނީ މިދިޔަ ދެ މެޗުގައި ރާއްޖޭގެ ޓީމަށް ސަޕޯޓަރު ކުރަން އައި ސަޕޯޓަރުންގެ ސަބަބުން ޓީމަށް ރަނގަޅު އަސަރެއްކޮށްފި ކަމަށާއި، ސެމީ މެޗުގައި ވެސް އެ ސަޕޯޓް ލިބޭނެ ކަމުގެ ޔަގީންކަން އެބައޮތް ކަމަށެވެ.
ރާއްޖެއާ އާއި މެލޭޝިއާ ކުޅޭ ސެމީ ފައިނަލް މެޗު ފަށާނީ މިރޭ 8:30 ގަ އެވެ.
