ޖުމްހޫރީ ޕާޓީ (ޖޭޕީ)ގެ ޑެޕިއުޓީ ލީޑަރުގެ މަގާމަށް އެ ޕާޓީގެ ލީޑަރު ގާސިމް އިބްރާހީމްގެ އަނބިކަނބަލުން އަދި ޓްރާންސްޕޯޓް މިނިސްޓަރު އައިޝަތު ނަހުލާ ހިމެނޭހެން ފަސް ބޭފުޅަކު އިންްތިހާބުކޮށްފި އެވެ.
ވާދަކަވެރިކަން ބޮޑުވި ޖުމްހޫރީ ޕާޓީގެ ޑެޕިއުޓީ ލީޑަރުގެ މަގާމަށް 12 ބޭފުޅަކު ކުރިމަތިލެއްވި އެވެ. އޭގެ ތެރޭގައި މިހާރު ހިންގާ ސަރުކާރު ކޯލިޝަންގެ މިނިސްޓަރުންނާއި އިސް މަގާމުތަކުގައި ތިއްބެވި ބޭފުޅުން އަދި ރައްޔިތުންގެ މަޖިލީހުގެ މެމްބަރުންނާއި ކުރީގެ މެމްބަރުން ވެސް ހިމެނިވަޑައިގަންނަވަ އެވެ.
ވާދަކުރެއްވި މިނިސްޓަރުންނާއި ސްޓޭޓު މިނިސްޓަރުންނާއި ސަރުކާރުގެ އިސް މަގާމުތަކުގައި ތިއްބެވި ޖޭޕީގެ މެމްބަރުންގެ ތެރެއިން ޑެޕިއުޓީ ލީޑަރު ކަމަށް އިންތިހާބުވީ ހަމައެކަނި ނަހުލާ އެވެ.
އެ މަގާމަށް ވާދަކުރެއްވި ފިޝާރީޒް މިނިސްޓަރު ޑރ. ހުސައިން ރަޝީދު ހަސަން އާއި އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރު ހަސަން މުޣުނީ އާއި ކޮންޓްރޯލާ އޮފް އިމިގްރާޝަން ހަނަފީ އާއި ރައްޔިތުންގެ މަޖިލީހުގެ އިސްދޫ ދާއިރާގެ މެންބަރު އަލީ ހަމީދަށް ވަނީ ނާކާމިޔާބީ ލިބިވަޑައިގެންފަ އެވެ.
ކޮންގްރެސްގެ 680 ބައިވެރިންގެ ވޯޓު ދިން ނައިބު ލީޑަރުގެ ވާދަވެރި އިންތިހާބުގައި އެންމެ ގިނަ ވޯޓު ލިބިވަޑައިގަތީ އެ ޕާޓީގެ ކައުންސިލް މެމްބަރެއްގެ ގޮތުގައި ހުންނެވި މިނިސްޓަރު ނަހުލާއަށެވެ. ދެން އެ މަގާމަށް އިންތިހާބުވީ ކުރީގެ ޓްރާންސްޕޯޓް މިނިސްޓަރު އަމީން އިބްރާހީމާއި، މީގެ ކުރިން ޖުމްހޫރީ ޕާޓީގެ ނައިބު ރައީސްގެ މަގާމު ފުރުއްވާފައިވާ އަހުމަދު ސައުދާއި، މަޖިލީހުގެ ކުރީގެ މެންބަރު އަލީ ޝާހް، އަދި އިގްބާލް އާދަމް އެވެ.
ޑެޕިއުޓީ ލީޑަރު އިންތިހާބުގެ ނަތީޖާ؛
- ޓްރާންސްޕޯޓް މިނިސްޓަރު އައިޝަތު ނަހުލާ - 558 ވޯޓު
- ކުރީގެ ޓްރާންސްޕޯޓް މިިނިސްޓަރު އަމީން އިބްރާހިމް - 327 ވޯޓު
- ފުވައްމުލަކު އުތުރު ދާއިރާގެ ކުރީގެ މެންބަރު އަލީ ޝާހު - 277 ވޯޓު
- ފެނަކަ ކޯޕަރޭޝަންގެ ކުރީގެ ޗެއާމަން އިގްބާލް އާދަމް - 263 ވޯޓު
- ޖޭޕީގެ ކުރީގެ ނައިބު ރައީސް އަހުމަދު ސައުދު - 275 ވޯޓު
- ތިނަދޫ ދެކުނު ދާއިރާގެ ކުރީގެ މެންބަރު އަބްދުﷲ އަހުމަދު (އަބްޅޯ) - 258 ވޯޓު
- އެންވަޔަރަމަންޓްގެ ސްޓޭޓް މިނިސްޓަރު ހަސަން މުޣުނީ - 255 ވޯޓު
- އިސްދޫ ދާއިރާގެ މެންބަރު އަލީ ހަމީދު - 198 ވޯޓު
- ފިޝަރީޒް މިނިސްޓަރު ޑރ. ހުސައިން ރަޝީދު ހަސަން - 147 ވޯޓު
- އިމިގްރޭޝަން ކޮންޓްރޯލަރު މުހައްމަަދު އަހުމަދު (ހަނަފީ) - 143 ވޯޓު
- ޔަޝްފާ އަބްދުލްޣަނީ - 138 ވޯޓު
- ކެޔޮދޫ ދާއިރާގެ ކުރީގެ މެންބަރު މޫސާ ނިޒާރު - 102 ވޯޓު
ޖޭޕީގެ ޑެޕިއުޓީ ލީޑަރުންގެ ގޮތުގައި ފަސް ބޭފުޅަކު އިންތިހާބުކޮށްފައިވާއިރު، އެހެން ބޭފުޅަކު ކުރިމަތިނުލުމުން އިންތިހާބަކާ ނުލައި އެ ޕާޓީގެ ލީޑަރަކަށް ހޮވިފައި ވަނީ، އެ ޕާޓީ އުފެދުނީއްސުރެ ވެސް ވޭތުވެދިޔަ 15 އަހަރު އެ މަގާމު ފުރުއްވަމުން ގެންދަވާ، ވިޔަފާރިވެރިޔާ އަދި ރައްޔިތންގެ މަޖިލީހުގެ މާމިގިލީ ދާއިރާގެ މެމްބަރު ގާސިމް އިބްރާހީމެވެ.
ޑެޕިއުޓީ ލީޑަރުގެ މަގާމުގެ އިތުރަށް ޖޭޕީގެ ކައުންސިލަށް 25 މެންބަރުން ވެސް ކޮންގްރެސްއިން އިންތިހާބު ކުރި އެވެ. އެ ޕާޓީގެ އަސާސީ ގަވާއިދު ބުނާ ގޮތުން ރިޔާސީ އިންތިހާބުގައި ޕާޓީން އަމަލު ކުރާނެ ގޮތް ނިންމުމުގެ ބާރު އޮންނާނީ ޕާޓީގެ ކައުންސިލަށެވެ.
އިއްޔެ މެންދުރުފަހު ފެށި އިންތިހާބުތަކުގެ ވޯޓު ލުން ނިމުނީ އިއްޔެ ހަވީރު ފަހެއް ޖަހަނިކޮށެވެ. އޭގެ ފަހުން ވޯޓު ގުނުމުގެ މަސައްކަތް ފަށައި، ހުރިހާ ފޮއްޓެއްގެ ނަތީޖާ ގުނައި ނިމުުނީ މިއަދު ހެނދުނު ހައެއް ޖެހި ފަހުންނެވެ. ވޯޓު ގުނުމުގެ މުޅި މަރުހަލާއަށް 10 ގަޑިއިރަށް ވުރެ ގިނަ ވަގުތު ހޭދަވި އެވެ.
ރޭ 9:30 ހާއިރު ވޯޓު ގުނުމުގެ މަސައްކަތް ދެ ގަޑިިއިރެއްހާ އިރަށް މެދު ކަނޑައިލި އެވެ. އެއީ ކޮންގްރެސްއަށް ހުށަހެޅިފައިވާ ގަރާރުގެ އެޖެންޑާ ކުރިއަށް ގެންދިއުމަށާއި ވޯޓު ގުނުމުގައި ހަރަކާތްތެރިވަމުން ދިޔަ އޮފިޝަލުންނަށް ހުސް ވަގުތުކޮޅެއް ދިނުމުގެ ބޭނުމުގައި ކުރި ކަމެކެވެ.
މި ހަފުތާ ބަންދު ދަރުބާރުގޭގައި ކުރިއަށް ގެންދިޔަ ޖޭޕީގެ ކޮންގްރެސަށް ރިޔާސީ އިންތިހާބުގައި ޕާޓީން ވާދަކުރުމަށް ކައުންސިލަށް ލަފާ ދިނުމަށް ގޮވާލާ ގަރާރެއް ވެސް ހުށަހެޅި އެވެ. ކުުރީގެ މެންބަރު އަބްދުﷲ އަހުމަދު ހުށަހެޅުއްވި ގަރާރު ފާސްވީ ކޮންގްރެސްގައި ބައިވެރިވި މަންދޫބުންގެ އިއްތިފާގުންނެވެ.
ކޮންގްރެސް އިން އެ ގަރާރު ފާސްކުރި ނަމަވެސް އެ ގަރާރަށް ކައުންސިލުން އަމަލުކުރުން ލާޒިމެއް ނޫނެވެ.
ޖޭޕީން ރިޔާސީ އިންތިހާބަށް ކުރިމަތިލުމަށް ކޮންގްރެސްއިން ލަފާ ދީފައިވާއިރު, ކުރިއަށް އޮތް ރިޔާސީ އިންތިހާބުގައި ޖުމްހޫރީ ޕާޓީގެ ލީޑަރު ގާސިމް އިބްރާހިމް، ރައީސް އިބްރާހިމް މުހައްމަދު ސޯލިހާ އެކު ކޯލިޝަން ހެދުމުގެ އުއްމީދު ބޮޑު ކަމަށް ރައީސް ސޯލިހުގެ ފަޅިން ވަނީ ބުނެފަ އެވެ.
