މި ހަފުތާ ބަންދު ކުރިއަށްދާ ޖުމްހޫރީ ޕާޓީގެ ކޮންގްރެސްގައި ނައިބު ރައީސް ފައިސަލް ނަސީމް ބައިވެރިވަޑައިނުގަތީ އާލާސްކަންފުޅެއްގައި އުޅުއްވާތީ ކަން އެނގިއްޖެ އެވެ.
އިއްޔެ ފެށި އެ ކޮންގްރެސްގައި މިއަދަށް މުހިންމު ބަހުސެއް ވެސް ތާވަލުކޮށްފައިވެ އެވެ. އެއީ ކުރިއަށް އޮތް ރިޔާސީ އިންތިހާބުގައި ޖޭޕީން ވާދަކުރަން ނިންމުމަށް އެ ޕާޓީގެ ކައުންސިލަށް ކޮންގްރެސް އިން ލަފާ ދިނުމަށް ގޮވާލާ ގަރާރެއްގެ ބަހުސެކެވެ. ޖޭޕީން ވާދަކުރަން އަދި ނުކުރަން ނިންމުމުގެ ބާރު ވެސް ދީފައި އޮންނަނީ ޕާޓީގެ ކައުންސިލަށެވެ.
އަންނަ ސެޕްޓެމްބަރު މަހުގެ ނުވަވަނަ ދުވަހު އޮންނަ ރިޔާސީ އިންތިހާބަށް، ޖޭޕީގެ މުސްތަގުބަލު ވެސް ކަނޑައެޅުމަށް ކުރިއަށްދާ މުހިންމު ކޮންގްރެސްގައި ނައިބު ރައީސް ބައިވެރިވެވަޑައިގެންފައި ނެތުމުން، "އަދަދު" ނޫހުން ކުރި ސުވާލެއްގެ ޖަވާބުގައި އެމަނިކުފާނުގެ އަރިސް ބޭފުޅަކު ވިދާޅުވީ ނައިބު ރައީސް އުޅުއްވަނީ ރޯގާގެ އާލާސްކަންފުޅެއްގައި ކަމަށެވެ.
ޖޭޕީގެ ކޮންގްރެސްގައި އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދާއި ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން އަދި އެމްއާރުއެމްގެ ރައީސް އަހުމަދު ފާރިސް މައުމޫން ބައިވެރިވެވަޑައިގެންނެވިއިރު، ރައީސް އިބްރާހީމް މުހައްމަދު ސޯލިހަށް ވެސް ދައުވަތު ފޮނުވި އެވެ. ނަމަވެސް ރައީސް ސޯލިހު ހުންނެވީ ނުރަސްމީ ދަތުރުފުޅެއްގައި ސިންގަޕޫރުގަ އެވެ.
ރައީސް ސޯލިހުގެ ސަރުކާރު އެކުލަވާލާފައިވަނީ ޖޭޕީގެ އިތުރަށް އަދާލަތު ޕާޓީއާއި އެމްއާރުއެމް ހިމެނޭ ކޯލިޝަނަކުންނެވެ. ފައިސަލް ނަސީމް ނައިބު ރައީސަކަށް ހުންނެވީ ޖޭޕީއަށް ލިބުނު ސްލޮޓަކުންނެވެ. ޖޭޕީގެ ސްލޮޓްގައި ކެބިނެޓުގައި ވެސް ތިން ވަޒީރަކު ތިއްބަވަ އެވެ. އަދި ސަރުކާރުގެ ބައެއް ކުންފުނިތަކުގެ އިސް މަގާމުތަކުގައި ވެސް ޖޭޕީގެ ބޭފުޅުން ތިއްބަވަ އެވެ.
އެމްޑީޕީގެ ރިޔާސީ ޕްރައިމަރީ ކާމިޔާބު ކުރެއްވުމަށް ފަހު، ރައީސް ސޯލިހު ވަނީ އަންނަ ރިޔާސީ އިންތިހާބުގައި ވެސް އެމަނިކުފާނާއެކު ކޯލިޝަން ހެއްދެވުމަށް މިހާރު ސަރުކާރު ކޯލިޝަންގައި ހިމެނޭ އަނެއް ތިން ޕާޓީއަށް ވެސް ދައުވަތު ދެއްވައިފަ އެވެ. މިހާތަނަށް އެ ދައުވަތު ގަބޫލުކުރެއްވީ އަދާލަތު ޕާޓީން އެކަންޏެވެ.
