މޯލްޑިވިއަން ޑިމޮކްރެޓިކް ޕާޓީގެ ރިޔާސީ ޕްރައިމަރީން ފެއިލްވެވަޑައިގެންނެވި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ އިންތިހާބު ކާމިޔާބު ކުރެއްވި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއެކު ރިޔާސީ އިންތިހާބުގައި ނުހުންނަވާނެ ކަމަށް އަނެއްކާ ވެސް މިއަދު ވިދާޅުވެއްޖެ އެވެ.
ރައީސް ސޯލިހާއެކު ނުހުންނަވާނެ ކަމަށް ނަޝީދުގެ ނުރަސްމީ "އަނެއްދިވެހިރާއްޖެ" ޓުވިޓާ އެކައުންޓުން މިއަދު ވިދާޅުވެފައި ވަނީ، ނަޝީދާއެކު މަޝްވަރާތަކެއް ކުރަމުން އަންނަ ކަމަށް ޕާޓީގެ ޗެއާޕާސަން ފައްޔާޒް އިސްމާއިލް އިއްޔެ ވިދާޅުވެފައި އޮއްވަ އެވެ.
"ރާއްޖެއަށް އަދި އެމްޑީޕީއަށް އެންމެ ހެޔޮ ގޮތް ހޯދުމަށް މަސައްކަތް ކުރަަން ޖެހެނޭ. އެހެނަސް އެއީ ރައީސް ސޯލިހާއެކު ހުރެގެން ވާން އޮތް ކަމެއްގެ ގޮތުގައި ނުފެނޭ،" ނަޝީދުގެ ނުރަސްމީ ސޯޝަލް މީޑިއާ އެކައުންޓުން އެމަނިކުފާނު ވިދާޅުވި އެވެ.
ރިޔާސީ ޕްރައިމަރީން ބަލިވި ފަހުން ނަޝީދު މަސައްކަތް ކުރަނީ އެމްޑީޕީގެ ތެރޭގައި ވަކި ފެކްޝަނެއް ހައްދަވައިގެނެވެ. "ފިކުރެއްގެ ދިރުން" ނަމުގައި ޕާޓީއަށް މީހުން ވައްދަމުންދާއިރު އެކި ކަހަލަ ސިޔާސީ ހަރަކާތްތައް ވެސް ދަނީ ބާއްވަމުންނެވެ. އަދި ނަޝީދު ގެންދަވަނީ ނުރަސްމީކޮށް ސިޔާސީ އެހެން ލީޑަރުންނާ ވެސް މަޝްވަރާ ކުރައްވަމުންނެވެ.
ދިވެހި ނޫހަކަށް އިއްޔެ ދެއްވި އިންޓަވިއުއެއްގައި ފައްޔާޒް ވިދާޅުވީ ނަޝީދާއެކު އެމްޑީޕީން މަޝްވަރާ ކުރަމުން އަންނަ ކަމަށާއި އުއްމީދު ކުރަނީ ސެޕްޓެމްބަރު 9، ގައި ބާއްވާ ރިޔާސީ އިންތިހާބު ކުރިމަތިވާއިރު ޕާޓީ އެކަތިގަނޑެއްގެ ގޮތުގައިި އޮތުން ކަމަށެވެ.
"އެކަމާ ރައީސް ނަޝީދާ އަބަދުވެސް އަޅުގަނޑުމެން ވާހަކަ ދައްކަމުން މިދަނީ. ޗެއާޕާސަނެއްގެ ހައިސއިްޔަތުން އަބަދުވެސް އަޅުގަނޑު މި ޕާޓީގައި ހުންނަ މައްސަލަތައް ރަނގަޅު ކުރަން ހުރި ކަންތައްތައް ކުރަމުންދާނަން. އަދި އަޅުގަނޑަށް ވަރަށް ބޮޑު ޔަގީންކަން ވެސް އެބައޮތް ރިޔާސީ އިންތިހާބަށް ގާތްވަމުންދާ ވަރަކަށް އަޅުގަނޑުމެންގެ ބަދަހިސަފުތަކެއް އޮންނާނެކަމުގެ،" ފައްޔާޒު ވިދާޅުވި އެވެ.
މި ފާއިތުވި ޖެނުއަރީ 28، ގައި ބޭއްވި ރިޔާސީ ޕްރައިމަރީ ރަައީސް ސޯލިހު ކާމިޔާބު ކުރެއްވީ އެ އިންތިހާބުގައި ވޯޓުލި 40،000 ވަރަކަށް މީހުންގެ ތެރެއިން 61 ޕަސެންޓު މީހުންގެ ވޯޓު ހޯދައިގެނެވެ. ނަޝީދަށް ލިބިވަޑައިގެންނެވީ 38 ޕަސެންޓު މީހުންގެ ވޯޓެވެ.
