ފަހަތުން އަރައި ސިންގަޕޫރު ބަލިކޮށް ހޯދި މޮޅަކީ ފޯ ނޭޝަންސް ކަޕް ކާމިޔާބުކުރަން ނުކުތް އަފްގާނިސްތާން ފިރިހެން ޓީމަށް ލިބުނު ރަނގަޅު ފެށުމެއް ކަމަށް ކޯޗު މުހައްމަދު ސާބިރު ނޫރީ ބުނެފި އެވެ.
ފޯ ނޭޝަންސް ކަޕްގެ ފުރަތަމަ މެޗުގައި އަފްގާނިސްތާނުން ސިންގަޕޫރު އަތުން މޮޅުވީ 3-1 ސެޓުންނެވެ. މެޗުގެ ސެޓުތައް އެ ޓީމުން 22-25، 25-23، 25-23 އަދި 25-23 އިން ގެންދިޔައިރު، ދެ ވަނަ މެޗުގައި މިއަދު މެންދުރު ފަހު،ނ އަފްގާނިސްތާން ނިކުންނާނީ މެލޭޝިއާ އާ ދެކޮޅަށެވެ. ލީގު ބުރުގެ ފަހު މެޗުގައި އަފްގާނިސްތާނުން މާދަމާރޭ ރާއްޖެއާ ދެކޮޅަށް ކުޅޭއިރު ހަތަރު ޓީމު ވެސް ސެމީ ފައިނަލުގައި ކުޅޭނެ އެވެ. އެ ގޮތުން ސެމީގައި ވާދަކުރާނީ ލީގު އުސޫލުން ކުޅެ ޓީމްތައް އެތުރޭ ތަރުތީބަށް ބަލައިގެންނެވެ. އެއް ވަނަ ހަތަރު ވަނަ ޓީމާ ކުޅޭއިރު، ދެ ވަނަ ކުޅޭނީ ތިން ވަނަ ޓީމާ އެވެ.
ސިންގަޕޫރު އަތުން ހޯދި މޮޅަށް ފަހު ކޯޗު ސަބީރު ނޫރީ ބުނީ ފުރަތަމަ މެޗަކީ ކޮންމެ މުބާރާތެއްގެ ވެސް މުހިންމު މެޗެއް ކަމަށާއި، ފުރަތަމަ މެޗުން މޮޅުވެވުމަކީ ބޮޑު ހިތްހަމަޖެހުމެއް ކަމަށެވެ. އޭނާ ބުނީ އޭނާ އަށް އޮތް އެންމެ ބޮޑު އިތުބާރަކީ ޓީމްގެ "ފައިޓިން ސިޕިރިޓް" ކަމަށާއި، އެއް ސެޓު ގެއްލިފައި އޮއްވައި ފަހަތުން އަރައި މޮޅުވެވުނީ ގޭމް ޕްލޭނާ އެއްގޮތަށް ކުޅުންތެރިން މަސައްކަތް ކުރުމުން ކަމަށެވެ.
"މެޗުން މޮޅުވެވުމަކީ ހިތްހަމަޖެހުމެއް. އެއް ސެޓު ގެއްލިފައި އޮއްވައި ފަހަތުން އަރައި ދެން އައި ތިން ސެޓު މި ހޯދީ. ވަރަށް ރަނގަޅަށް ޓީމުން ކުޅުނު. މިސްޓޭކްތައް ރަނގަޅުކުރަމުން ގޮސް ކުޅުނީ. އޭގެ ތަފާތު ފެނުނު." ސަބީރު ބުންޏެވެ.
އޭނާ ބުނީ އެ ޓީމުން މުބާާރާތަށް ރަނގަޅަށް ތައްޔާރުވި ކަމަށާއި، ޕްރެކްޓިސްތަކުގައި ފައިދާ ވަރަށް ރަނގަޅަށް ޓީމަށް ކުރާ ކަމަށެވެ. މުހިންމު ދަނޑިވަޅުތަކުގައި ލީޑު ގެއްލުނަސް ހަމަޖެހިލައިގެން ހުރެ ޓީމަށް އިރުޝާދުދެވޭ އެންމެ މުހިންމު ކަމަކީ ވެސް އެއީ ކަމަށް އޭނާ ބުންޏެވެ.
ސަބީރު ބުނީ ބެންޗުން އެރުވި ކުޅުންތެރިންނާ އެކު އޭނާ ގޭމަށް ގެންނަން ބޭނުންވި ބަދަލުތައް ވަރަށް ރަނގަޅަށް މަސައްކަތްކުރި ކުރި ކަމަށެވެ. ކުރިއަށް ހުރި މެޗުތަކުގައި އެ ޓީމު މި އަށް ވުރެ ވަރުގަދަކޮށް ފެންނާނެކަމުގެ ޔަގީންކަން އެބައޮތް ކަމަށް ވެސް ސަބީރު ވަނީ ބުނެފަ އެވެ.
"މުހިންމު ދަނޑިވަޅުގައިވެސް އަހަންނަށް އިނގޭ އަހަރެންގެ ގޭމް ޕްލޭނަށް ކުޅެފިއްޔާ ކާމިޔާބު ވާނެކަން. އެ އިތުބާރު އޮތީމަ ހަމަޖެހިލައިގެން ހުރީ. އަދި މި އަށް ވުރެ މޮޅަށް އަދި ޓީމު ކުޅޭނެކަމުގެ ޔަގީންކަން އެބައޮތް. އަންނަ މެޗުގައި އަފްގާން ވަރުގަދަކޮށް ފެންނާނެ." ސަބީރު ބުންޏެވެ.
މުބާރާތުގައި އަފްގާނިސްތާން ކުޅޭ ދެ ވަނަ މެޗުގައި މިއަދު މެންދުރު ފަހު މެލޭޝިއާއާ ދެކޮޅަށް ނުކުންނައިރު، ލީގު ބުރުގެ ފަހު މެޗުގައި ރާއްޖެއާ ދެކޮޅަށް ކުޅޭނީ މާދަމާރޭ އެވެ.
