ރެޕް ވަލަކިޔުންތެރިޔާ ނިޕްސީ ހަސްލް މަރާލިކަމުގެ ކުށް ސާބިތުވި މީހާ 60 އަހަރަށް ޖަލަށް ހުކުމްކޮށްފި އެވެ.
އެރިކް އާރް ހޯލްޑާ ޖޫނިއާގެ މައްޗަށް ކުށް ސާބިތުވީ މިދިޔަ ޖުލައި މަހު އެވެ. އޭނާ ހަސްލް މަރާލީ 2019 ވަނަ އަހަރު ލޮސް އެންޖެލިސްގައި ހުންނަ ހަސްލްގެ ފިހާރައެއްގެ ކުރިމަތީގަ އެވެ.
މަރުވި އިރު އުމުރުން 33 އަހަރުގެ ހަސްލްގެ އަސްލު ނަމަކީ އެރްމިއާސް އާސްގެޑޯމް އެވެ. ހަސްލްއަށް އަމާޒުކޮށް ބަޑި ޖެހުމުން، އިތުރު ދެ މީހުންގެ ގަޔަށް ވަޒަން އަރައި އެ މީހުންނަށް އަނިޔާވި އެވެ. ވަކީލުން ބުނީ ހަމަލާ ދިނީ ގަސްދުގައި މަރާލުމުގެ ނިޔަތުގައި ރާވައިގެން ކަމަށެވެ.
ހަސްލް ކުޑައިރުން ފެށިގެން ދިރިއުޅުނީ ލޮސް އެންޖެލިސްގެ ދެކުނުގަ އެވެ. އޭނާ ފުރާވަރު އުމުރުގައި އުޅުނީ "ރޯލިން ސިކްޓީޒް" ގޭންގުގެ މެމްބަރެއްގެ ގޮތުގަ އެވެ.
އެ ސަރަހައްދުގެ އާއްމުންނަށް އެހީވުމުގެ ގޮތުން އިންވެސްޓުކޮށް "މެރެތޮން ކްލޯތިން" ފިހާރަ އޭނާ ހުޅުވި އެވެ. އަދި ގޭންގު ހަމަނުޖެހުން ކުޑަކުރެވޭނެ ގޮތްތަކާ ބެހޭ ގޮތުން ފުލުހުންނާ މަޝްވަރާ ކުރި އެވެ.
ރިޕޯޓުތައް ބުނާ ގޮތުން ހޯލްޑާ ހަމަލާ ދިނީ ގޭންގުތަކުގެ މައްސަލައިގައި ހަސްލް ފުލުހުންނާ ގުޅިގެން މަަސައްކަތް ކުރަމުން ދާތީ ހިތްހަމަނުޖެހިގެންނެވެ.
ހަސްލް މަރުވި ފަހުން އެންމެ މޮޅު ރެޕް ޕަފޯމަންސް އަދި އެންމެ މޮޅު ރެޕް ވަލައިގެ ގްރެމީ އެވޯޑް 2020 ވަނަ އަހަރު ލިބުނެވެ. އޭގެ އިތުރުން ހޮލީވުޑް ވޯކް އޮފް ފޭމްގައި އޭނާއަށް ހާއްސަ ތަރިއެއް ބެހެއްޓި އެވެ.
