މި ސަރުކާރުގެ ގެދޮރުވެރިންގެ ޕްރޮގްރާމްގެ ދަށުން ފްލެޓާއި ގޯތި ލިބޭ ފަރާތްތައް ކަނޑައެޅުމަށް "ގެދޮރުވެރިންގެ ކޮމިޓީ"ގެ ނަމުގައި ކޮމިޓީއެއް އެކުލަވާލައިފި އެވެ.
ޕްލޭނިން މިނިސްޓްރީން މިއަދު ބުނީ ބިންވެރިޔާ އަދި ގެދޮރުވެރިޔާ ސްކީމަށް ކުރިމަތިލާފައިވާ ފަރާތްތައް އިވެލުއޭޓްކޮށް، ބިމާއި ފްލެޓް ދޭނެ ފަރާތްތައް ކަނޑައަޅާނީ އެ ކޮމިޓީން ކަމަށެވެ.
ކޮމިޓީގައި ހިމެނިވަޑައިގަންނަވާ މެންބަރުން؛
- ސްޓޭޓް މިނިސްޓަރު އަކްރަމް ކަމާލުއްދީން، ޗެއާޕާސަން
- އަނަސް އަބްދުއްސައްތާރު، ކޯ-ޗެއާ
- މަރިޔަމް ނާޒިމާ، މއ. އެރިޒޯނާ
- އައިޝަތު ރަޝީދާ، ހ. ރެޖީނާ ހައުސް
- މުހައްމަދު އާރިފް، ހއ. އިހަވަންދޫ ނެދުންގެ
ފަސް މެންބަރުންގެ މައްޗަށް އެކުލެވޭ ގެދޮރުވެރިންގެ ކޮމިޓީގެ ފުރަތަމަ ބައްދަލުވުން މިއަދު ބާއްވާފައިވާ ކަމަށް ވެސް ޕްލޭނިން މިނިސްޓްރީން ބުނެފައިވެ އެވެ.
ގޯއްޗާއި ފްލެޓަށް ކުރިމަތިލުމަށް ސަރުކާރުން ހުޅުވާލީ މިދިޔަ ޖޫން 26 ވަނަ ދުވަހު އެވެ. މިހާރު ނިންމާފައި ވަނީ ހުޅުމާލޭން 1،000 ގޯތީގެ އިތުރުން، ގުޅީފަޅުން 2،000 ގޯއްޗާއި އަދި ގިރާވަރު ފަޅު ހިއްކާ އެ ބިމުން މަދުވެގެން 2,000 ގޯތި މާލޭ ރަށްވެހިންނަށް ދިނުމަށެވެ. އެ 5،000 ގޯތީގެ ތެރެއިން ފުރަތަމަ ބުރުގައި ދޫކުރާނީ 3،000 ގޯއްޗެވެ.
މިދިޔަ އޮކްޓޫބަރު މަހުގެ 15 ވަނަ ދުވަހަށް އެ މުއްދަތު ހަމަވި އިރު، ބިންވެރިޔާ ސްކީމްގެ ދަށުން ދޫކުރުމަށް ކަނޑައެޅި 3000 ގޯއްޗަށް އެދި ޖުމްލަ 15،164 މީހުން ހުށަހަޅާފައިވެ އެވެ. އަދި ގެދޮރުވެރިޔާ ސްކީމްގެ ދަށުން ދޫކުރުމަށް ކަނޑައެޅި 4000 ފުލެޓަށް އެދި 20،697 މީހުން ހުށަހަޅާފައިވެ އެވެ.
ޕްލޭނިން މިނިސްޓްރީން މީގެ ކުރިން ހާމަކޮށްފައިވާ ގޮތުގައި މި ދެ ސްކީމުގެ ދަށުން ވެސް ބޯހިޔާވަހިކަން ލިބޭ މީހުންގެ ވަގުތީ ލިސްޓު މާޗު މަހު އާންމު ކުރެވޭނެ ކަމަށެވެ.
ބިންވެރިޔާ ސްކީމްގެ ދަށުން މާލެ ސަރަހައްދުން ދޫކުރުމަށް ހަމަޖެހިފައިވާ 3000 ގޯތީގެ ތެރެއިން ހުޅުމާލެއިން ދޫކުރާ 1000 ގޯތި ދިނުމަށް އެޗްޑީސީން ވަނީ ހުޅުމާލޭގެ ދެވަނަ ފިޔަވަހީގެ 62 ސަރަހައްދަކުން 1.25 މިލިއަން އަކަފޫޓުގެ ބިން ކަނޑައަޅާފަ އެވެ.
ބިންވެރިޔާ ސްކީމްގެ ދަށުން ދޫކުރާ ގޯތީގެ ތެރެއިން އެންމެ ކުޑަ ގޯތީގައި ވެސް 1250 އަކަފޫޓު ހުންނާނެ ކަމަށް އޭރު ސަރުކާރުން ކުރި އިއުލާނުގައިވެ އެވެ.
ގެދޮރުވެރިޔާ ސްކީމްގެ ދަށުން ދޫކުރުމަށް ހަމަޖެހިފައިވާ ފުލެޓުތަކުގެ ތެރެއިން އެފްޑީސީއާއި ޖޭއެމްސީ ގުޅިގެން ހުޅުމާލޭގައި އިމާރާތް ކުރަމުން އަންނަ "އަމާން އުދަރެސް" ގެ އަށް ޓަވަރުގެ މަސައްކަތް އަންނަ ޖުލައި މަހަށް އެއްކޮށް ނިންމާލެވޭނެ ކަމަށް ފަހި ދިރިއުޅުން ކޯޕަރޭޝަނުން ވަނީ ހާމަކޮށްފަ އެވެ.
