ހަނގުރާމައިގެ ހުޅުގަނޑު ފަތުރަނީ އެމެރިކާ އިސްވެ އޮވެ ހިންގާ އަސްކަރީ ކޯލިޝަން ނޭޓޯއިން ކަމަށާއި ހަނގުރާމައިގައި ރަޝިއާ ބަލިކުރެވޭނެ ކަމަށް ހީވުމަކީ ކުށް ހީއެއް ކަމަށް ރަޝިއާގެ ރައީސް ލެޑިމިއަ ޕުޓިން ވިދާޅުވެއްޖެ އެވެ.
ޔޫކްރެއިންގައި ކުރަމުންދާ ހަނގުރާމައަށް އަހަރެއް ފުރެން ގާތްވެފައި ވަނިކޮށް ޓީވީ މެދުވެރިކޮށް އަންގާރަ ދުވަހު ދެއްވި ހިތާބެއްގައި ޕުޓިން ވިދާޅުވީ "ގައުމަށް ކުރިމަތިވެފައިވާ މަސައްކަތް ހައްލުކުރާނީ ދެގޮތެއް ނުވެ، ވިސްނުންތެރިކަމާ އެކު" ކަމަށެވެ.
ހަނގުރާމަ ނުފެށުމަށް ކުރެވެން ހުރި ހުރިހާ ކަމެއް ރަޝިއާއިން ކުރި ނަމަވެސް، ހުޅަނގުގެ އެއްބާރުލުމާ އެކު ޔޫކްރެއިނުން ރާވަމުން ދިޔައީ ރަޝިއާއިން 2014 ވަނަ އަހަރުން ފެށިގެން ކޮންޓްރޯލް ކުރަމުންދާ ކްރައިމިއާއަށް ހަމަލާ ދިނުމަށް ކަމަށް ޕުޓިން ތުހުމަތު ކުރެއްވި އެވެ.
"މިހާރު ޔޫކްރެއިންގެ ރައްޔިތުންނަކީ ހުޅަނގުގެ ވެރިންނާއި ޔޫކްރެއިންގައި އޮތް ހުދުމުހުތާރް ސަރުކާރުގެ ރަހީނުން. ސިޔާސީ، އަަސްކަރީ އަދި އިގްތިސާދީ ގޮތުން ބަލާއިރު ވެސް، އެ މީހުން އެ ތިބީ މުޅި ޔޫކްރެއިން އަޅުވެތިކޮށްގެން،" ޕުޓިން ވިދާޅުވި އެވެ.
"އެ މީހުންގެ ނިޔަތަކީ ގައުމުގެ ދާހިލީ މައްސަލައެއް ދުނިޔޭގެ ބޮޑު މައްސަލައެއް ކަމަށް ހަދައިގެން އުޅުން. އެކަން އަޅުގަނޑުމެންނަށް ވަރަށް ސާފު. ރައްދު ދޭނީ އެކަމަށް ވިސްނައިގެން ތިބެ."
ޕުޓިން ވިދާޅުވީ ރަޝިއާ ބަލިނުކުރެވޭނެ ކަމަށާއި މުޖުތަމައު ބައިބައިކޮށް ފިތުނަ އުފައްދަން ހުޅަނގުން ކުރާ މަސައްކަތަށް ކުރި ނުލިބޭނެ ކަމަށެވެ. އޭގެ އިތުރުން ރަޝިއާގެ ގިނަ މީހުން ހަނގުރާމައަށް ތާއީދު ކުރާ ކަމަށް ވެސް 70 އަހަރުގެ ލީޑަރު ވިދާޅުވި އެވެ.
ހަނގުރާމައިގައި މަރުވެފައިވާ މީހުންގެ ހަނދާން އާ ކުރަމުން ޕުޓިން ވިދާޅުވީ އެ މީހުންގެ އާއިލާތަކަށް ހާއްސަ ފަންޑެއް ހުޅުވާނެ ކަމަށެވެ. ރަޝިއާ ސިފައިން ޔޫކްރެއިންގެ އިރުމައްޗަށް ވަދެ ހަނގުރާމަ ފެށީ މިދިޔަ އަހަރުގެ ފެބްރުއަރީ 24 ވަނަ ދުވަހު އެވެ.
