ފަނޑިޔާރުންގެ ތަމްރީނުތަކަށް ދިގު މުއްދަތަށް ވީއްލޭނެ އުސޫލެއް އެކުލަވާލުމަށް ޖުޑީޝަލް ސާވިސް ކޮމިޝަން (ޖޭއެސްސީ)އިންް ނިންމައިފި އެވެ.
ޖޭއެސްސީން މިއަދު ނެރުނު ނޫސް ބަޔާނެއްގައި ބުނެފައި ވަނީ، މިހާތަނަށް ދިގު މުއްދަތަށް ފަނޑިޔާރުން ވީއްލޭނެ އުސޫލެއް ނެތް ކަމަށެވެ. އެހެން ނަމަވެސް ފަނޑިޔާރުންގެ ގާބިލުކަން އިތުރުކުރުމަކީ މުހިންމު ކަމެއް ކަމުގައި ދެކޭތީ، ފަނޑިޔާރުން އަމިއްލައަށް ހޯދާ ފުރުސަތުތަކުގަ އާއި ތަމްރީން ޕްރޮގްރާމްތަކާއި، ކޯސްތަކަށް ވީއްލުމަށް އުސޫލެއް ކަނޑައެޅުމަށް ނިންމާފައިވާ ކަމަށް އެ ބަޔާނުގައި ބުނެފައި ވެއެވެ.
އަދި މިފަދައިން ވީއްލާއިރު މުސާރަ އާއި އިނާޔަތް ހަމަޖެހިގެންދާނެ ކަމަށާއި، މި އުސޫލު އެކުލަވާލުމުގެ މަސައްކަތް މިހާރު އެ ކޮމިޝަނުން ކުރަމުންް އަންނަ ކަމަށް ޖޭއެސްސީން ވަނީ ބުނެފަ އެވެ.
މި އުސޫލުގެ އެންމެ މުހިންމު އެއް ބޭނުމަކީ ފަނޑިޔާރުން އެކި ތަމްރީނު ޕްރޮގުރާމުތައް ފުރިހަމަކުރުމަށްޓަކާ މަގާމުން ދުރުނުވެ އެކަން ކުރެވޭނެ އިންތިޒާމް ހަމަޖައްސައިދިނުމަށް ކަމަށް ވެސް އެ ކޮމިޝަނުން ބުނެފައި ވެއެވެ.
ޖޭއެސްސީން ބުނީ މި ނިންމުން ނިންމާފައި ވަނީ ފަނޑިޔާރުކަމަށް އައްޔަނުވުމަށްފަހު ދިގުމުއްދަތުގެ ތަމްރީން ފުރުސަތުގައި ފަނޑިޔާރުން ބައިވެރިވުމަށް ހުރަސްތަކެއް ހުރުމުން ކަމަށެވެ.
އަދި މިފަދަ އުސޫލެއް އެކުލަވާލުމުގެ ސަބަބުން ފަނޑިޔާރުންނަށް އިތުރަށް ތައުލީމު އުނގެނުމަށް ހިތްވަރު ލިބުމާއި، މިދާއިރާގެ ހުނަރާއި، ގާބިލްކަން އިތުރު ކުރުމަށް ހިތްވަރުލިބުމަށް ބާލު ލިބޭނެ ކަމަށް ޖޭއެސްސީން ވަނީ ބުނެފަ އެވެ.
