މީގެ ދެ ހަފުތާ ކުރިން އައި ބާރުގަދަ ބިންހެލުމުގައި ވެއްޓުނު އިމާރާތެއްގެ ދަށުގައި އުފަންވި ކުއްޖާގެ ބޮޑު ދައިތަ، އެ ކުއްޖާ އެޑޮޕްޓްކޮށްފި އެވެ.
އިމާރާތް ވެއްޓުމުން އެ ކުއްޖާގެ މަންމަ އާއި ބައްޕަ މަރުވި އެވެ. އިމާރާތުގެ ދަށުން ކުއްޖާ ސަލާމަތް ކުރުމުން، އެތައް ހާސް ބަޔަކު އެޑޮޕްޓް ކުރަން ހުށަހެޅި އެވެ.
ޑީއެންއޭ ޓެސްޓެއް ހެދުމަށް ފަހު ބޮޑު ދައިތައަކީ ލޭގެ ގުޅުން އޮތް އާއިލީ މީހެއްކަން ކަށަވަރުވުމުން އެ ކުއްޖާ ވަނީ ހޮސްޕިޓަލުން ދޫކޮށްލައިފަ އެވެ. ޑޮކްޓަރުން ބުނީ ކުއްޖާގެ ހާލު ރަނގަޅު ކަމަށެވެ.
"އެއީ މިހާރު އަހަރެންގެ ދަރިއެއް. އަހަރެންގެ އުފަން ދަރިންނާއި އެ ކުއްޖާއާ އެއްވެސް ތަފާތެއް ނުކުރާނަން،" ބޮޑު ދައިތަގެ ފިރިމީހާ ހަލީލް އަލް ސަވާދީ އޭޕީ ނޫހަށް ބުންޏެވެ.
އެ ކުއްޖާ ސަލާމަތް ކުރިތާ ކުޑައިރުކޮޅެއް ފަހުން ރެސްކިއު ޓީމުން އެ ކުއްޖާއަށް ކީ ނަމަކީ "އާޔާ" އެވެ. އަރަބި ބަހުން އޭގެ މާނައަކީ މުއުޖިޒާތެވެ.
އެހެން ނަމަވެސް، މިހާރު އެ ކުއްޖާގެ އާއިލާއިން ވަނީ، ކުއްޖާގެ މަންމައަށް ނިސްބަތްކޮށް، އަފްރާއަށް ނަން ބަދަލުކޮށްފަ އެވެ.
ތުއްތު ކުއްޖާ އެޑޮޕްޓް ކުރުމަށް އެތައް ހާސް ބަޔަކު ހުށަހެޅުމުން، ހޮސްޕިޓަލުގައި އޮއްވައި ވަގަށް ގެންގޮސްފާނެތީ ކަންބޮޑުވި ކަމަށް ސަވާދީ ބުންޏެވެ.
ހާލާ އާއި ސަވާދީގެ އަންހެން ދަރިފުޅު އުފަންވީ ބިންހެލުން އައިތާ ތިން ދުވަސް ފަހުން.
ސަވާދީ ބުނީ އެ އާއިލާގެ ހާލަތު ގޯސް ނަމަވެސް، އާއިލީ ގުޅުމެއް ނެތް ބަޔަކާ އަފްރާ ހަވާލުކުރުމަށް ވުރެ ބޮޑު ދައިތަ ކައިރީގައި ހުރުން މާ ރަނގަޅު ވާނެ ކަމަށެވެ.
ސަވާދީ އާއި އޭނާގެ އަންހެނުން ހާލާގެ ގެ ވެސް ވަނީ ބިންހެލުމުގައި ސުންނާފަތިވެފަ އެވެ. އެ މީހުން މިހާރު ދިރިއުޅެނީ ތިމާގެ ބަޔެއްގެ ކައިރީގަ އެވެ.
ބިންހެލުން އައި އިރު ހާލާ ވެސް އިނީ ބަލިވި އެވެ. އެ ދެމަފިރިންގެ އަންހެން ދަރިފުޅު އުފަންވީ ބިންހެލުން އައިތާ ތިން ދުވަސް ފަހުންނެވެ.
