މިއުނިކް (ފެބްރުއަރީ 20) - ޖަރުމަނު ލީގުގެ ކުރީގައި އޮތް ބަޔާން މިއުނިކާއި ޔޫނިއަން ބާލިން އަށް މި ހަފްތާގައި ކުޅުނު މެޗުތަކުން މޮޅުނުވެވި ދިމާވި ހާލަތުގެ ފައިދާނަގައި ހާތާ ބާލިން އަތުން، މިރޭ، 4-1 އިން މޮޅުވެ، ބޮރޫޝިއާ ޑޯޓްމަންޑުން ލީގުގެ ރޭހުގައި މުހިންމު ފިޔަވަޅެއް ކުރިއަށް އަޅައިފި އެވެ.
ބަޔާން ވަނީ ހޮނިހިރު ދުވަހުގެރޭ ބޮރޫޝިއާ މުންޗެންގްލަޑްބެކް އަތުން ބަލިވެފަ އެވެ. އެއް ވަނަ އަށް އަރަން ޔޫނިއަން ބާލިން އަށް ފުރުސަތު ލިބިފައި އޮއްވައި، އެ ޓީމު ވަނީ މިރޭ ރެލިގޭޝަނުގައި އޮތް ޝާލްކާއާ ލަނޑެއް ނުޖެހި 0-0 އިން އެއްވަރުވެފަ އެވެ.
ޖަރުމަނު ލީގު ތާވަލުގެ ކުރީގައި އޮތް ތިން ޓީމު ވެސް މި ވަގުތު ވަނީ ޕޮއިންޓް އެއްވަރުވެފަ އެވެ. އެއް ވަނައިގައި އޮތް ބަޔާނާއި ދެ ވަނައިގައި އޮތް ޑޯޓްމަންޑާއި ތިން ވަނައިގައި އޮތް ޔޫނިއަން ބާލިން އަށް ވަނީ 21 މެޗުން 43 ޕޮއިންޓް ލިބިފަ އެވެ. ލަނޑުގެ ތަފާތަށް ބަލާއިރު، ބަޔާނަށް ފައިދާ 40 ގޯލު އޮތްއިރު، ޑޯޓްމަންޑްގެ އޮތީ 17 ގޯލެވެ. އަދި ޔޫނިއަން ބާލިންގެ 11 ގޯލެވެ. ހަތަރު ވަނައިގައި އޮތް ފްރެއިބާގަށް ވަނީ 21 މެޗުން 40 ޕޮއިންޓް ލިބިފަ އެވެ.
ޑޯޓްމަންޑް ދަނޑުގައި މިރޭ ކުޅުނު މެޗުގެ 27 ވަނަ މިނިޓްގައި އެ ޓީމަށް ލީޑުނަަގައިދިނީ މާކޯ ރެއުސް ދިން ބޯޅައަކުން ކަރީމް އަޑޭމީ ޖެހި ގޯލުންނެވެ. އޭގެ ތިން މިނިޓް ފަހުން، އަޑޭމީ ގޯލު ކުރިމައްޗަށް ހުރަސްކޮށްލި ބޯޅަ ޑޮންޔެލް މާލެން ވަނީ ގޯލަށް ވައްދާލައި، ޑޯޓްމަންޑްގެ ލީޑުފުޅާކޮށްދިފަ އެވެ.
ދެ ވަނަ ހާފުގެ ކުޅުން ފެށިގެން ދެ މިނިޓް ތެރޭ ހާތާ ބާލިން އިން ގޯލެއް ޖެހި އެވެ. ލޫކަސް ޓޫސާޓް އަށް އޭރިއާތެރެއިން ލިބުނު ފުރުސަތުން ޖެހި ބޯޅަ ގޯލަށް ވަނީ ހުރަސްދަނޑީގައި ޖެހިފަ އެވެ.
ޕްރެޝަރުގައި ކުޅެން ޖެހުނު ވަގުތު ޑޯޓްމަންޑަށް ލުޔެއް ލިބުނީ މެޗުގެ 76 ވަނަ މިނިޓްގައި ހިލޭ ޖެހުމަކުން ރެއުސް ގޯލެއް ޖަހައި، އެ ޓީމުގެ ލީޑުފުޅާކޮށްދިނުމުންނެވެ. އަދި މެޗުގެ 89 ވަނަ މިނިޓްގައި އޭރިއާތެރެއިން ލޫކަސް ބްރަންޑްޓް ވަނީ ގޯލެއް ޖަހައި އެ ޓީމަށް މެޗުގެ ތިން ޕޮއިންޓް ޔަގީންކޮށްދީފަ އެވެ.
