ޖުމްހޫރީ ޕާޓީގެ ލީޑަރުގެ މަގާމަށް އެ ޕާޓީގެ މިހާރުގެ ވެސް ލީޑަރު ގާސިމް އިބްރާހިމް އަދި ނައިބު ލީޑަރުގެ މަގާމަށް އެމަނިކުފާނުގެ އަނބިކަނބަލުން އަދި ޓްރާންސްޕޯޓް މިނިސްޓަރު އާއިޝަތު ނަހުލާ ކުރިމަތިލައްވައިފި އެވެ.
ޖުމްހޫރީ ޕާޓީގެ ހަތަރު ވަނަ ގައުމީ ކޮންފަރެންސުން އިންތިހާބު ކުރާ ޕާޓީގެ ލީޑަރު އަދި ޑެޕިއުޓީ ލީޑަރުގެ މަގާމަށް ކުރިމަތިލުމުގެ ސުންގަޑި ހަމަވަނީ މިއަދު ހަވީރު 4:00 ޖަހާއިރަށެވެ.
ޖުމްހޫރީ ޕާޓީގެ ސެކްރެޓަރީ ޖެނެރަލް އަލީ އާރިފް ވިދާޅުވީ އެ ޕާޓީގެ ލީޑަރުގެ މަގާމަށް މިހާތަނަށް ކުރިމަތިލެއްވީ ގާސިމް އެކަނި ކަމަށެވެ. ނަމަވެސް ނައިބު ލީޑަރުގެ މަގާމަށް ނަހުލާއާއެކު 11 މީހަކު ކުރިމަތިލައްވާފައިވާ ކަމަށް އާރިފް ވިދާޅުވި އެވެ.
ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީ ފިޔަވައި ސަރުކާރު ކޯލިޝަންގައި ހިމެނޭ އެންމެ ބޮޑު ޕާޓީ ކަމަށްވާ ޖުމްހޫރީ ޕާޓީގެ ގައުމީ ކޮންފަރެންސް އޮންނަނީ ފެބްރުއަރީ 24-25 ވަނަ ދުވަހެވެ.
މިއީ ގާސިމް މި މަގާމަށް ކުރިމަތިލެއްވި ހަތަރު ވަނަ ފަހަރެވެ. އެ ޕާޓީގެ ލީޑަރުގެ މަގާމު މިހާތަނަށް އަދާ ކުރެއްވީ ވެސް އެމަނިކުފާނު އެކަންޏެވެ.
ޖުމްހޫރީ ޕާޓީގެ ގައުމީ ކޮންފަރެންސް އަންނަ ހަފުތާގައި ބާއްވާއިރު އެމްޑީޕީގެ ރިޔާސީ ޓިކެޓު ކާމިޔާބު ކުރެއްވި މިހާރު ރައީސް އިބްރާހިމް މުހައްމަދު ސޯލިހު ބޭނުންފުޅު ވަނީ ކޯލިޝަނަކާއެކު ސެޕްޓެމްބަރު މަހު ބާއްވާ ރިޔާސީ އިންތިހާބަށް ކުރިމަތިލެއްވުމަށެވެ.
އެކަމަކު ރިޔާސީ އިންތިހާބަށް ޖުމްހޫރީ ޕާޓީން ގެންގުޅޭ ވިސްނުމެއް އަދި ނޭނގެ އެވެ. މިހާރު މިއޮތް ކޯލިޝަން ދަމަހައްޓަން ބޭނުންވާކަން އެ ޕާޓީން ބުނެފައެއްނުވެ އެވެ. ގިނަ ސިޔާސީ ޕާޓީ އެކުލެވޭ ގޮތަށް ރާއްޖޭގައި ބޭއްވި ތިން އިންތިހާބުގެ ތެރެއިން ދެ އިންތިހާބުގައި ގާސިމް ވާދަ ކުރެއްވި އެވެ.
