ލަންޑަން (ފެބްރުއަރީ 14) - ޗެލްސީގެ އާ ވެރިޔާ، ޓޮޑް ބޯލީ، އެ ކްލަބް ހިންގުމާ ހަވާލުވެ، ކުރު މުއްދަތެއްގެ ތެރޭގައި ޓީމު ވަރުގަދަ ކުރަން އެ ކުރި އިންވެސްޓްމަންޓްގެ ޕްރެޝަރު އެ ކްލަބާ ގުޅުން ހުރި ކޮންމެ މީހަކަށް ވެސް އޮންނާނެ ކަމަށް ޗެލްސީގެ ކޯޗު ގްރަހަމް ޕޮޓާ ބުނެފި އެވެ.
މިދިޔަ އަހަރު، އެމެރިކާގެ މަހުޖަނު ބޯލީ ޗެލްސީ ހިންގުމުގެ މެޖޯރިޓީ ހިއްސާދާރަކަށް ވެ، ފުރަތަމަ ސީޒަނުގައި މި ވަނީ އާ ކުޅުންތެރިން ގަންނަން 603 މިލިއަން ޑޮލަރު ހަރަދުކޮށްފަ އެވެ. ބޯލީގެ ތަސައްވުރާ އެއްގޮތަށް ކުރިއަށްދާ ކޯޗެއް ގެނައުމަށް ޗެލްސީން ވަނީ ތޯމަސް ޓުޗެލް ވަކިކޮށް، މިދިޔަ ސެޕްޓެމްބަރު މަހު، އިނގިރޭސި ކޯޗު، ޕޮޓާ ގެނެސްފަ އެވެ.
ޗެލްސީގެ ކޯޗުކަމުގެ ފުރަތަމަ ހަފްތާތަކުގައި ޕޮޓާ ވަނީ ޕްރެޝަރުގައި ވެސް ނަތީޖާ ނެރުމުގައި ރަނގަޅު މަސައްކަތެއް ކޮށްފަ އެެވެ. އެކަމަކު، މިދިޔަ ދޮޅު މަހެއްހާ ދުވަސްތެރޭ ޗެލްސީގެ ނަތީޖާތަކަށް ވަރަށް ބޮޑަށް އަސަރުކުރިއިރު، ޕޮޓާގެ މުސްތަގުބަލާ ބެހޭގޮތުން، ޗެލްސީގެ ސަޕޯޓަރުން ހިމެނޭހެން ގިނަ ބަޔަކު އަންނަނީ ސުވާލު އުފައްދަމުންނެވެ.
"ޕްރެޝަރު އޮންނާނެ، އަމުދުން މި ސީޒަނުގައި ޗެލްސީ އަށް އެ ބުނާ ހުރިހާ ޕްރެޝަރެއް ވެސް އޮންނާނެ. ޗެލްސީން ކާމިޔާބު ހޯދާފައި އޮތީ ވެސް މި ފަދަ ޕްރެޝަރު ހާލަތްތަކުގެ ތެރެއިން ކުރިއަށް ގޮސްގެން، އެހެންވީމަ މި ކްލަބްގައި އެ ކަން ކުރެވޭނެ،" ޗެމްޕިއަންސް ލީގުގެ ނޮކައުޓް ބުރުގައި މާދަމާރޭ ބޮރޫޝިއާ ޑޯޓްމަންޑާ ދެކޮޅަށް ކުުޅުމުގެ ކުރިން ބޭއްވި ނޫސްވެރިންގެ ބައްދަލުވުމުގައި ޕޮޓާ ބުންޏެވެ. "ޗެލްސީއާ ގުޅުން ހުރި ކޮންމެ މީހަކަށް ވެސް ޕްރެޝަރުގެ ވާހަކަ އަލެއް ނުވާނެ،"
ޕޮޓާ ބުނީ ޗެލްސީން ސީޒަނެއްގެ ތެރޭގައި އެހާ ގިނަ ކުޅުންތެރިން ގެެނެސް، ޓީމެއްގެ ގޮތުގައި ކުޅެލަން މެޗުތަކެއް ބޭނުންވާނެ ކަމަށެވެ. އެކަމަކު، އެ އަށް އޮތް ހުރަހަކީ ސީޒަންގެ ފަހު ކޮޅުގައި މި ލިބޭ މެޗުތަކުގެ ވަގުތުތަކުގައި މާ ގިނައިން ޓީމު ރޭވުމުގައި މަސައްކަތް ކުރަން ވަގުތު ލިބެން ނެތުން ކަމަށް ޕޮޓާ ވަނީ ބުނެފަ އެވެ.
ޗެލްސީއާ އެކު މުސްތަގުބަލުގައި ރަނގަޅު ކާމިޔާބީތަކެއް ހޯދިދާނެތޯ އަމާޒުވި ސުވާލުގެ ޖަވާބުގައި ޕޮޓާ ބުނީ މިހާރު ކޯޗިން ވަޒީފާ އޮތްގޮތުން އެއްވެސް ކްލަބެއްގައި ދުރުރާސްތާ ޓާގެޓްތަކެއް ހަދައިގެން މަސައްކަތް ކުރެވޭނެ ކަމަށް ނުދެކޭ ކަމަށެވެ.
"ދުރު ރާސްތާ ވިސްނުމެއްގައި ޓާގެޓްތަކެއްގެ ވާހަކަ ކޯޗިން ވަޒީފާގައި ހުރެ މިހާރު ދެއްކޭނެ ކަމަށް އަހަރެން ނުދެކެން،" ޕޮޓާ ބުންޏެވެ.
"މިހާރު، ކޯޗެއްގެ ވަޒީފާ އޮންނަނީ ޝޯޓް ޓާމް ނޫނީ ލޯންގް ޓާމް ނޫނީ މީޑިއަމް ޓާމްތޯ މި އިނގެނީ ނަތީޖާތަށް ހުންނަ ގޮތުން،"
އިނގިރޭސި ޕްރިމިއާ ލީގުގެ 10 ވަނައިގައި ޗެލްސީ އޮތްއިރު، އެ ޓީމު ވަނީ އެފްއޭ ކަޕާއި ލީގު ކަޕުން ކަޓައިފަ އެވެ. މި ފަހަރު ތަށްޓެއް ހޯދަން ޗެލްސީ އަށް އޮތް ހަމައެކަނި މަގަކީ ޗެމްޕިއަންސް ލީގެވެ.
ޕޮޓާ ބުނީ މި ވަގުތު ޗެމްޕިއަންސް ލީގު ކާމިޔާބު ކުރުމުގެ ވާހަކަ ދެއްކުމަށް ވުރެ، އޭނާގެ ފޯކަސް އަކީ ޑޯޓްމަންދް އަތުން މޮޅުވެވޭނެ ގޮތަކަށް ޓީމު ރޭވުމަށް ސިކުނޑި ހުސްކުރުމަށް ކަމަށެވެ.
