އައްޑޫ އަތޮޅުގައި ހުޅުވި ފުރަތަމަ ރިސޯޓު ޝަންގްރިއްލާ ރިސޯޓް އެންޑް ސްޕާ ބަންދުކޮށްފައި އޮތް މައްސަލައިގައި ޓޫރިޒަމް މިނިސްޓަރު ޑރ. އަބްދުﷲ މައުސޫމްގެ ފަރާތުން އެދެވޭ ޖަވާބެއް ނުލިބޭ ކަމަށް ވިދާޅުވެ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ނުރުހުން ފާޅުކުރައްވައިފި އެވެ.
ޝަންގްރިއްލާ ބަންދުކުރީ ކޮވިޑުން ލިބުނު ގެއްލުމުން އަރައި ނުގަނެވިގެން ކަމަށް ބުނި އޮގަސްޓު 20، 2020 ގަ އެވެ. އޭގެ ކުރިން ވެސް ގެއްލުމުގައި ހިންގަމުން އަންނަ އެ ރިސޯޓު ބަންދުކުރުމުން އެތަނުގައި ވަޒީފާ އަދާކުރާ 500 ވަރަކަށް މީހުންގެ ވަޒީފާ ގެއްލުނު ކަމަށް މީޑިއާ ރިޕޯޓުތައް ބުނެ އެވެ.
މި ރިސޯޓަކީ 2005 ގައި ދިވެހި ސަރުކާރާއި ހޮންގްކޮންގްގެ ޝަންގްރިއްލާ ކުންފުނި ގުޅިގެން އުފެއްދި ޖޮއިންޓް ވެންޗާއެއް ކަމުގައިވާ އައްޑޫ އިންވެސްޓްމަންޓްސް އިން ހިންގާ ކުންފުންޏެކެވެ. ގާތްގަނޑަކަށް 150 މިލިއަން ޑޮލަރު (1.04 ބިލިއަން ރުފިޔާ) ހަރަދުކޮށްގެން ތަރައްގީކުރި 284 އެނދުގެ ރިސޯޓަކީ އެހާތަނަށް ރާއްޖޭގެ އެންމެ އަގު ބޮޑު ރިސޯޓެވެ.
ޝަންގްރިއްލާ ވިލިގިއްޔަކީ އައްޑޫ އަތޮޅުގައި ހުޅުވި ފުރަތަމަ ރިސޯޓު އަދި ސަރުކާރާއި ގުޅިގެން އުފެއްދި ޖޮއިންޓް ވެންޗާއެއްގެ ދަށުން ތަރައްގީކޮށް ހުޅުވި ފުރަތަމަ ރިސޯޓު ވެސް މެ އެވެ.
ރިސޯޓުގެ އޮޕަރޭޝަން ހުއްޓި، އެތަނަށް ކޮންމެ އަހަރަކު އެތައް މިލިއަން ރުފިޔާގެ ގެއްލުން ވަމުން އަންނާތީ އެތަނުގެ ސަރުކާރު ހިއްސާ ދޫކޮށްލައިގެން ވެސް ތަން ހުޅުވަން މަސައްކަތް ކުރަމުން ދާ ކަމަށް ރައީސް އިބްރާހިމް މުހައްމަދު ސޯލިހު ވަނީ ވިދާޅުވެފަ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ހިތަދޫ މެދު ދާއިރާގެ މެންބަރު އަހުމަދު ރަޝީދު ވަނީ ޝަންގްރިއްލާ ހުޅުވޭނެ ދުވަހަކާ މެދު މިނިސްޓަރާ ސުވާލުކުރައްވައިފަ އެވެ.
އެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ އެތަން ހުޅުވޭނެ ކަމަށް މިދިޔަ އަހަރު ވެސް، އަދި އޭގެ ކުރީ އަހަރު ވެސް އުންމީދު ކުރި ކަމަށެވެ.
"ޕްރައިވެޓު ވިޔަފާރިއެއް، ސަރުކާރުން ކޮށްދެވެން އޮތް އެންމެ ބޮޑު ކަންތައް ކޮށްދީފިން، އެއީ ކުލި ވަރަށް ކުޑަ ކޮށްދީފިން،" މައުސޫމް ވިދާޅުވި އެވެ.
މައުސޫމް ވިދާޅުވީ އެ ތަނުގައި އޮތް ސަރުކާރުގެ ހިއްސާ ދޫކޮށްލަން ނިންމައިފައިވާ ކަމަށާއި އެއާއެކު ދެން އޮންނާނީ އެތަން ރެނޮވޭޓު ކުރުމުގެ މަސައްކަތް ކަމަށެވެ.
މިނިސްޓަރުގެ ސުވާލާ ގުޅިގެން ރިޔާސަތުގައި އިންނެވި ނަޝީދު ވިދާޅުވީ މެންބަރު ސުވާލު ކުރެއްވީ ޝަންގްރިއްލާ ހުޅުވޭނެ ދުވަހަކާ ގުޅޭ ގޮތުން ކަމަށެވެ.
"އުންމީދު ކުރަނީ މި އަހަރު ތެރޭގައި، 2023 ވަނަ އަހަރު ތެރޭގައި އެ ރަށް ހުޅުވޭނެ ހިސާބަށް ދާނެ.." އެކަމަށް މައުސޫމް ވިދާޅުވި އެވެ.
އެހެންނަމަވެސް މައުސޫމްގެ ޖަވާބު ފުރިހަމަނުކުރެވެނިސް މެދުކަނޑާލައްވައި ނަޝީދު ވިދާޅުވީ ރިސޯޓު ހުޅުވޭނީ ހިއްސާދޫކޮށްލުމުން ކަން އެންމެނަށް ވެސް އެނގޭ ކަމަށާއި އެ މަސައްކަތް އޮތީ ހުއްޓިފައި ކަމަށެވެ.
"ކޮން އިރަކުންތޯއޭ ހިއްސާ ދޫކުރެވޭނީ، ކާކުތޯއޭ އެއްބަސްނުވެގެން އުޅެނީ، އަޅުގަނޑު ދެކޭ ގޮތުގައި ޝަންގްރިއްލާގެ މައްސަލަ ތަކުރާރުކޮށް މެންބަރުން އެބަ ސުވާލު ކުރައްވާ، އެއަށް އެކަށީގެންވާ ޖަވާބެއް ލިބޭތަނެއް ނުފެނޭ،" ނަޝީދު ނުރުހުން ފާޅުކުރެއްވި އެވެ.
ނަޝީދު ވިދާޅުވީ މިއަދު ވެސް އެކަމާ ގުޅޭ ގޮތުން ސުވާލު ކުރުމުން އެދެވޭ ޖަވާބެއް ނުލިބޭ ކަމަށާއި އެއީ "ވަރަށް ބޮޑު ހިތާމައެއް" ކަމަށެވެ.
