ލިވަޕޫލް (ފެބްރުއަރީ 14) - އިނގިރޭސި ޕްރިމިއާ ލީގުގައި ރޭ އެވަޓަން 2-0 އިން ބަލިކޮށް، ލިވަޕޫލުން 2023 ވަނަ އަހަރު ފެށި ފަހުން ލީގުގައި ފުރަތަމަ ފަހަރަށް މޮޅެއް ހޯދައިފި އެެވެ.
ރޭގެ މެޗުގެ ކުރިން، މި އަހަރު ލީގުގައި ލިވަޕޫލް ކުޅުނު ހަތަރު މެޗުގެ ތެރެއިން އެއް މެޗު އެއްވަރުވިއިރު، ތިން މެޗުން ވަނީ ބަލިވެފަ އެވެ. އެހެންވެ، ލިވަޕޫލަށް އޮތީ ނަތީޖާ ނުނެރެވި ޕްރެޝަރު ބޮޑުވެފަ އެވެ. ރޭގެ މެޗުގެ ކުރިން ލިވަޕޫލް އެންމެ ފަހުން ލީގު މެޗަކުން މޮޅުވީ ޑިސެމްބަރު 31 ވަނަ ދުވަހު ލެސްޓާ ސިޓީ އަތުންނެވެ.
ލިވަޕޫލަށް ރޭ ލިބުނު ޕޮއިންޓްތަކާ އެކު އެ ޓީމު ވަނީ ލީގުގެ ނުވަ ވަނަ އަށް ޖެހިލައިފަ އެވެ. އެއީ 21 މެޗުން 32 ޕޮއިންޓް ހޯދައިގެންނެވެ. ކުރިން ނުވަ ވަނައިގައި އޮތް ޗެލްސީ ވަނީ 10 ވަނަ އަށް ވެއްޓިފަ އެެވެ. ޗެލްސީ އަށް 22 މެޗުން ލިބުނީ 31 ޕޮއިންޓެވެ.
ލިވަޕޫލްގެ އެންފީލްޑް ސްޓޭޑިއަމްގައި ރޭ ކުޅުނު މެޗު ފަށައިގެން އެވަޓަން އިން ވެސް ރަނގަޅު ކުޅުމެއް ދައްކަމުން ދަނިކޮށް، ލިވަޕޫލުން ލީޑުނެގީ 36 ވަނަ މިނިޓްގައި މުހައްމަދު ސަލާހު ޖެހި ގޯލުންނެވެ. މިއީ އެވަޓަން އަށް ލިބުނު ކޯނަރެއްގައި އެ ޓީމުގެ ޖޭމްސް ޓާކޯސްކީ ބޮލުން ޖެހި ބޯޅައެއް ދަނޑިއަށް އަމާޒުވެ، އަލުން ކުޅުުމުގެ ތެރެއަށް އެނބުރި އައުމުން، ލިވަޕޫލުން ކައުންޓަ އެޓޭކެއްގައި އަރައި، ޖެހި ގޯލެކެވެ. ލިވަޕޫލް ހާފުގެ ތެރެއިން އެ ޓީމުގެ ޑާވިން ނޫނޭޒް ހިފައިގެންދިޔަ ބޯޅަ ގޯލު ކުރިމައްޗަށް ހުރަސްކޮށްލުމުން ސަލާހު ވަނީ ގޯލަށް ފޮނުވާލައިފަ އެވެ.
ފަސް މެޗަށް ފަހު ލީގުގައި ސަލާހުގެ ގޯލެއް ފެނުނުއިރު، މިއީ ސަލާހުގެ ބައިވެރިވުން އޮވެގެން، ލިވަޕޫލްގެ ދަނޑުގައި ލީގުގައި އެ ޓީމުން ޖެހި 100 ވަނަ ގޯލެވެ. ސަލާހު ވަނީ ލިވަޕޫލް ދަނޑުގައި ލީގުގައި އެ ޓީމަށް ކުޅެދިން 104 މެޗުން 71 ލަނޑު ޖަހައި، 29 ލަނޑު ޖަހަން ފުރުސަތު ތަނަވަސްކޮށްދީފަ އެވެ.
ދެ ވަނަ ހާފްގެ ކުޅުން ފެށިގެން ހަތަރު މިނިޓް ތެރޭ ލިވަޕޫލުން ދެ ވަނަ ގޯލު ޖެހި އެވެ. މިއީ ޓްރެންޓް އަލެކްސަންޑާ އާނޯލްޑް ނެގި ހުރަހަކަށް އަރައި، ކޯޑީ ގަކްޕޯ ޖެހި ގޯލެކެވެ. މިއީ ޖެނުއަރީ ޓްރާންސްފާގައި ޕީއެސްވީ އައިންދޯވަން ދޫކޮށް ލިވަޕޫލާ ގުޅުނު ފަހުން އެ ޓީމަށް ކުޅެދިން އަށް މެޗުން ގަކްޕޯ ޖެހި ފުރަތަމަ ގޯލެވެ.
އަނިޔާއިން ރަނގަޅުވެ، ރޭގެ މެޗުގެ ދެ ވަނަ ހާފުގައި ލިވަޕޫލްގެ ޑިއޯގޯ ޖޮޓާ އާއި ރޮބާޓޯ ފިރްމީނޯ ވަނީ ކުޅެން ނުކުމެފަ އެވެ.
ރޭގެ މެޗަކީ އެވަޓަންގެ ކޯޗުކަމާ ޝޯން ޑައިޝް ހަވާލުވި ފަހުން އެ ޓީމު ބަލިވި ފުރަތަަމަ މެޗެވެ. ޑައިޝް، އެވަޓަން ގޮވައިގެން ނުކުތް ފުރަތަމަ މެޗުގައި މިދިޔަ ހަފްތާގައި ވަނީ ލީގުގެ އެއް ވަނައިގައި އޮތް އާސެނަލް ބަލިކޮށްފަ އެވެ.
