ވިލާ ކޮލެޖާ ޖެހިގެން އޮތް ބިމުގައި އަޅާ ދަރުމަވަންތަ ސްކޫލުގެ އާ އިމާރާތުގެ މަސައްކަތް ނިންމަން ދިން ތާރީހު ފަހަނައަޅާ ގޮސްފައި ވާއިރު އަދިވެސް އެތަނުގެ މަސައްކަތް ކުރިއަށްދާ ކަމަށް އެޑިއުކޭޝަން މިނިސްޓްރީން ބުނެފި އެވެ.
ދަރުމަވަންތަ ސްކޫލު ނިމި ހުޅުވޭނީ ކޮންތާރީހެއްގައިތޯ މި ނޫހުން ސުވާލުކުރުމުން އެޑިއުކޭޝަން މިނިސްޓްރީން ވިދާޅުވީ، އެ ސްކޫލުގެ މަސައްކަތް ކުރިއަށްދާ ކަމަށާއި، ހުޅުވޭނެ ސީދާ ތާރީހެއް އެނގުމުން މީޑިއާތަކާ ހިއްސާކުރާނެ ކަމަށެވެ. އިތުރު ތަފްސީލެއް ނުދެއްވި އެވެ.
ދަރުމަވަންތަ ސްކޫމުގެ މަސައްކަތް އެންމެ ފުރަތަމަ ފަށާފައި ވަނީ ސެޕްޓެމްބަރު 2020, ގަ އެވެ. ނަމަވެސް, ކޮވިޑާ ހެދި އޭރު އެ އިމާރާތުގެ މަސައްކަތް ނިންމަން ދީފައި އޮތް އެއް އަހަރު ދުވަހުގެ މުއްދަތުގެ ތެރޭގައި ނިންމިފައެއް ނުވެ އެވެ.
އެ އިމާރާތުގެ އަދިވެސް ގިނަ މަސައްކަތްތަކެއް ވަނީ ނުނިމި އެވެ. އެޑިއުކޭޝަން މިނިސްޓްރީން ބުނީ އެ މަސައްކަތްތައް ޖުލައި މަހަށް ނިމޭނެ ކަމަށެވެ.
ދަރުމަވަންތަ ސްކޫލުގެ އާ އިމާރާތުގެ މަސައްކަތް ކުރަން ހަވާލުކޮށްފައިވަނީ އެސްޖޭ ކޮންސްޓްރަކްޝަނާ އެވެ. 74.9 މިލިއަން ރުފިޔާއަށް އަޅާ އެ އާ އިމާރާތަކީ މުޅިން ތަފާތު އަދި އެންމެ ޒަމާނީ ފެންވަރުގެ ކޮންސެޕްޓަކަށް ތައްޔާރުކުރާ ސްކޫލެއް ކަމަށްވާއިރު، އެ ސްކޫލަކީ 1000 ދަރިވަރުންގެ ޖާގައިގެ ސްކޫލެކެވެ.
ސަރުކާރުން ދަރުމަވަންތަ ސްކޫލުގެ އާ އިމާރާތެއް އަޅަން ނިންމީ، 2002 ވަނަ އަހަރު މަޖީދިއްޔާ ސްކޫލު އިމާރާތް ދެ ބައިކޮށް ދަރުމަވަންތަ ސްކޫލު ފެށިއިރު، ކިޔަވައިދެމުންދިޔަ އިމާރާތް ބާވެ ވީރާނާވާން ފެށުމުންނެވެ. އޭގެ ފަހުން ދަރުމަވަންތައިގެ ދަރިވަރުން ކިޔަވަމުންދިޔައީ އެމްއައިބީ ކުރިމައްޗަށްވާ ގޮތަށް ތައްޔާރުކުރި ވަގުތީ އިމާރާތެއްގަ އެވެ.
