މި މަހުގެ ފަސް ވަނަ ދުވަހު ޗައިނާގެ "ޖާސޫސީ ބެލޫނެއް" ބަޑިޖަހާ ވައްޓާލި ފަހުން އެމެރިކާ އަދި ކެނެޑާގެ ވައިގެ ސަރަހައްދުން ގޮތް ނޭނގޭ ތިން އުޅަނދެއް ބަޑިޖަހައި ވައްޓާލައިފި އެވެ.
ގޮތް ނޭނގޭ އުޅަނދެއް އެންމެ ފަހުން ވައްޓާލާފައި ވަނީ އެމެރިކާގެ މިޝިގަންގައި އޮންނަ ލޭކް ހުރޮން މަތިންނެވެ. ރިޕޯޓުތައް ބުނާ ގޮތުގައި މިޝިގަން މަތިން ވައްޓާލި އުޅަނދު ދަތުރުކުރަމުން ދިޔައީ ވައިގެ ދަތުރުފަތުރަށް ބުރޫއަރާ އުސްމިނެއްގަ އެވެ. އެ އުޅަނދު ވައްޓާލުމުގައި އެމެރިކާގެ އަސްކަރިއްޔާ އަދި މިޝިގަންގެ ނޭޝަނަލް ގާޑުގެ ޕައިލެޓުން ބައިވެރިވި އެވެ.
މިދިޔަ ހޮނިހިރު ދުވަހު ކެނެޑާގެ ވައިގެ ސަރަހައްދުން ދަތުރުކުރަމުންދިޔަ ގޮތް ނޭނގޭ އުޅަނދެއް ވެސް ވަނީ ވައްޓާލައިފަ އެވެ. އެ ގައުމުގެ ބޮޑުވަޒީރު ޖަސްޓިން ޓުރްޑޯގެ އޯޑަރަށް އެ އުޅަނދު ވައްޓާލީ އެމެރިކާ އަސްކަރިއްޔާގެ ފައިޓާ ޖެޓަކުންނެވެ. ސާޅީސް ހާސް ފޫޓު މަތިން އުދުހެމުން ދިޔަ އެ އުޅަނދު ވައްޓާލުމަށް ފަހު ޓުރްޑޯ ވަނީ އެމެރިކާގެ ރައިސް ޖޯ ބައިޑަންއަށް ގުޅުއްވާ މި އުޅަނދު ތަކާއި ގުޅޭ ގޮތުން މަޝްވަރާކޮށް މި ކަމުގައި ދެ ގައުމު އެކީ މަސައްކަތް ކުރުމާމެދު ވާހަކަ ދައްކަވާފަ އެވެ.
ތިންވަނަ އަށް މިފަދަ އުޅަނދެއް ވައްޓާލާފައިވަނީ އެމެރިކާގެ އެންމެ ދެކުނު އަދި އެންމެ އެކަހެރި ސްޓޭޓު، އަލަސްކާގެ ވައިގެ ސަރަހައްދުންނެވެ. ބައިޑެންގެ ސީދާ އޯޑަރަށް ހުކުރު ދުވަހު ވައްޓާލި އެ އުޅަނދުވެސް އުދުހެމުން ދިޔައީ 40،000 ފޫޓު މަތިންނެވެ. އެ އުޅަނދު ވައްޓާލީ އެމެރިކާގެ ރައްޔިތުންގެ ރައްކާތެރިކަން ކަށަވަރުކޮށްދީ އެ ގައުމުގެ ސިޔާދަތު ދެމެހެއްޓުމަށް ކަމަށް ޕެންޓަގަން އިން ދިން ބަޔާނުގައި ވަނީ ބުނެފަ އެވެ.
މި މަހުގެ ފަސް ވަނަ ދުވަހު ވައްޓާލީ ސީދާ ޗައިނާގެ ޖާސޫސީ ބެލޫނެއް ކަމަށް އެމެރިކާއިން ބުނި ނަމަވެސް ފަހުން ވައްޓާލި އުޅަނދުތަކުގެ ތަފުސީލެއް އަދި ދީފައެއް ނުވެ އެވެ.
