މިއުނިކް (ފެބްރުއަރީ 11) - ޖަރުމަނު ލީގުގައި މިރޭ ކުޅުނު މެޗުން ލީގު ތާވަލުގެ ދެ ވަނައިގައި އޮތް ޔޫނިއަން ބާލިން އިން އާރްބީ ލައިޕްޒިގު އަތުން 2-1 އިން މޮޅުވިއިރު، ބޮކުމްގެ މައްޗަށް 3-0 އިން ކުރިހޯދައި ބަޔާން މިއުނިކުން އެއް ވަަނަ މަގާމު ދަމަހައްޓައިފި އެވެ.
ބަޔާން އެއް ވަނައިގައި އޮތީ 20 މެޗުން 43 ޕޮއިންޓާ އެކު އެވެ. ދެ ވަނައިގައި އޮތް ޔޫނިއަން ބާލިން އަށް 20 މެޗުން 42 ޕޮއިންޓް ލިބިފައިވާއިރު، ތިން ވަނައިގައި އޮތް ބޮރޫޝިއާ ޑޯޓްމަންޑުން ވަނީ މިރޭ ވާޑާ ބްރެެމެން 2-0 އިން ބަލިކޮށް، 20 މެޗުން 40 ޕޮއިންޓް ހޯދައިފަ އެވެ.
އަމިއްލަ ދަނޑުގައި ކުޅުނު ބަޔާނުން ބޮކުމް ކައިރީގައި ލީޑުނެގީ މެޗުގެ 41 ވަނަ މިނިޓްގައި ތޯމަސް މުލާ ޖެހި ގޯލުންނެވެ. މިއީ ބޮކުމްގެ ކީޕަރު މެނުއަލް ރައިމަން ހެދި ގޯހެއްގެ ފައިދާނަގައި މުލާ ޖެހި ގޯލެކެވެ. ފުރަތަމަ ހާފު ނިމުމުގެ ކުރިން ބަޔާނަށް ދެ ވަނަ ގޯލެއް ޖަހައިދޭން ލެއޯން ގޮރެޓްޒްކާ އަށް ލިބުނު ފުރުސަތުގެ ބޭނުން ނުހިފުނެވެ.
ބަޔާނުން ލީޑުފުޅާކުރީ މެޗުގެ 64 ވަނަ މިނިޓްގައި ޖަމާލް މުސިއާލާ ދިން ބޯޅައަކުން އޭރިއާތެރެއިން ކިންގްސްލީ ކޯމަން ޖެހި ގޯލުންނެވެ. އޭގެ 10 މިނިޓް ފަހުން، މެޗުގެ 74 ވަނަ މިނިޓްގައި ބަޔާންގެ ތިން ވަނަ ގޯލު ޖެހީ ޕެނަލްޓީ އަކުން ސާޖް ގްނަބްރީ އެވެ. މި ޕެނަލްޓީ ލިބުނީ ބޮކުމް އޭރިއާތެރެއިން ގްނަބްރީ އަށް ކުރި ފައުލަކަށެވެ.
މިއީ ނޮވެމްބަރު މަހުގެ ފަހުން ލީގުގައި ބަޔާނުން ޖެހިޖެހިގެން ތިން މޮޅު ހަމަކުރި ފުރަތަމަ ފަހަރެވެ. މެޗަށް ފަހު ބަޔާންގެ ކޯޗު ހޫލިއަން ނާގަލްސްމަން ބުނީ މެޗުން މޮޅުވުމުން އެ ހިތްހަމަޖެހުން އޮތް ނަމަވެސް މުޅި މެޗަށް ބަލާއިރު ބޭނުންވި ވަރަށް ނުކުޅެވުނު ކަމަށެވެ.
ލައިޕްޒިގުން ޔުނިއަން ބާލިން ކޮޅަށް ލީޑުނެގީ 24 ވަނަ މިނިޓްގައި ބެންޖަމިން ހެންރިޗްސް އޭރިއާބޭރުން ޖެހި ގޯލުންނެވެ. މެޗުގެ 61 ވަަނަ މިނިޓްގައި ޔޫނިއަން ބާލިން އަށް އެއްވަރުކޮށްދިނީ ޖަނިކް ހެބަރާ ޖެހި ވޮލީންނެވެ.
މެޗުގެ 71 ވަނަ މިނިޓްގައި ޔޫނިއަން މޮޅުކޮށްދިން ލަނޑު ޖެހީ އެ ޓީމުގެ ޑިފެންޑަރު، ރޮބިން ކްނޮޗް އެވެ. މިއީ ލައިޕްޒިގުގެ މޯ ސިމަކަން އަތުގައި ބޯޅަ ޖެހުމުން ދިން ޕެނަލްޓީ އެކެވެ. ލައިޕްޒިގަށް އެއްވަރުކޮށްދޭން ޔޫސެފް ޕޯލްސަން ޖެހި ގޯލު ވަނީ އޮފްސައިޑް ކަމަށް ނިންމައިފަ އެވެ.
ވާޑާ ބްރެމެން ދަނޑުގައި ޑޯޓްމަންޑް މޮޅުވީ ދެ ވަނަ ހާފުގައި ޖެހި ދެ ގޯލުންނެވެ. ޑޯޓްމަންޑްގެ ލަނޑުތައް ޖެހީ ޖޭމީ ބައިނޯ ގިޓެންސް އާއި ހޫލިއަން ބްރަންޑްޓް އެވެ.
