މި އަހަރުގެ މިހާތަނަށް ރާއްޖެ ޒިޔާރަތްކުރި ފަތުރުވެރިންގެ އަދަދު ދެލައްކައިން މައްޗަށް ގޮސްފައިވާ ކަމަށް ޓޫރިޒައަމް މިނިސްޓަރީން ބުނެފި އެވެ.
ޓޫރިޒަމް މިނިސްޓަރީގެ ތަފާސްހިސާބުތައް ދައްކާ ގޮތުގައި މި އަހަރުގެ ޖެނުއަރީ މަހުގެ އެއްވަ ދުވަހުން ފެށިގެން ފެބްރުއަރީ މަހުގެ އަށްވަނަ ދުވަހުގެ ނިޔަލަށް ރާއްޖެއަށް 220،574 ފަތުރުވެރިން ޒިޔާރަތްކޮށްފައިވެ އެވެ.
މި އަހަރު ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރީ ރަޝިޔާއިންނެވެ. ރަޝިއާއިން ރާއްޖެއަށް 28،873 ފަތުރުވެރިން ޒިޔާރަތްކޮށްފައިވެ އެވެެ.
ދެވަނައަށް ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރި ގައުމަކީ އިންޑިއާ އެވެ. އެ ގައުމުން ރާއްޖެއަށް 24،127 ފަތުރުވެރިން ވަނީ ޒިޔާރަތްކޮށްފަ އެވެ. އަދި ތިން ވަނަގައި އޮތް އިޓަލީއިން 20،692 ފަތުރުވެރިން މި މުއްދަތުގައި ޒިޔާރަތްކޮށްފައިވެ އެވެ.
މި ލިސްޓުގައި ދެން ހިމެނެނީ، އިނގިރޭސިވިލާތް، ޖަރުމަނުވިލާތް، އެމެރިކާ، ފްރާންސް، ޗައިނާ، ސްވިޓްޒަލޭންޑްގެ އިތުރުން ޕޮލޭންޑެވެ.
ރާއްޖޭގައި ފަތުރުވެރިންނަށް ހިދުމަތްދިނުމަށް މިހާރު 1،217 ތަނަކަށް ވަނީ ހުއްދަ ދީފަ އެވެ. އޭގެތެރެއިން މިހާރު ހިދުމަތްދެމުން އަންނަނީ، 1،213 ތަނަކުންކަމަށް ވާއިރު، އެއީ 168 ރިސޯޓާއި، 13 ހޮޓަލާއި، 880 ގެސްޓްހައުސްގެ އިތުރުން 152 ސަފާރީ އެވެ.
މި އަހަރަށް ސަރުކާރުން އަމާޒުހިފާފައި ވަނީ 1.8 މިލިއަން ފަތުރުވެރިން ގެނެސް ޓޫރިޒަމްގެ ރެކޯޑެއް ހެދުމަށެވެ.
