ކަޒަކިސްތާންގެ އަސްތާނާގައި މިހާރު ކުރިއަށްދާ 10 ވަނަ އޭޝިއަން އިންޑޯ އެތުލެޓިކްސް ޗެމްޕިއަންޝިޕްގެ 60 މީޓަރު ދުވުމުގައި އަހުނާ ނިޒާރު ގައުމީ ރެކޯޑު މުގުރާލި ނަމަވެސް އޭގެ ހަތް މިނެޓު ފަހުން އޮތް ހީޓުގައި ވާދަކޮށް މަރިޔަމް ރޫޔާ އަލީ، އަހުނާގެ އެ ރެކޯޑު މުގުރާލާފަ އެވެ.
އިއްޔެ އިން ފެށިގެން އަންނަ ހޯމަ ދުވަހުގެ ނިޔަލަށް ކުރިއަށްދާ އޭޝިއަން އިންޑޯ ޗެމްޕިއަންޝިޕްގައި މި އަހަރު ރާއްޖެއިން ވާދަކުރަނީ އަހުނާ އާއި ރޫޔާ އެކަންޏެވެ. މި ދެ އެތުލީޓުން މި ގޭމްސް އަށް ހޮވުނީ މުބާރާތަށް އެތުލީޓުން ހޮވުމަށް އެސޯސިއޭޝަނުން ކުރިއަށްގެންދިޔަ ޓްރަޔަލްގައި ކުރި ހޯދައިގެންނެވެ.
އޭޝިއަން އިންޑޯ ޗެމްޕިއަންޝިޕްގެ 60 މީޓަރު ދުވުމުގެ ހީޓު ދޭއްގައި ވާދަކޮށް އަހުނާ ގައުމީ ރެކޯޑު ހެދީ 7.89 ސިކުންތުން ރޭސް ނިންމައިގެންނެވެ. މީގެ ކުރިން މި ރެކޯޑު އޮތީ 2008 ވަނަ އަހަރު ގަތަރުގެ ވެރިރަށް ދޯހާގައި ކުރިއަށްދިޔަ އޭޝިއަން އިންޑޯ ޗެމްޕިއަންޝިޕްގައި ދުވި ޖައުނާ އަބްދުﷲ ނާފިޒު އަތުގަ އެވެ. އެ ފަހަރު ޖައުނާ ރެކޯޑު ހެދީ 8.30 އިން ދުވެގެންނެވެ.
އަހުނާ ރެކޯޑު ހެދިތާ ހަތް މިނެޓު ފަހުން ރޫޔާ ވަނީ 60 މީޓަރު ދުވުމުގެ ރެކޯޑު މުގުރާލައިފަ އެވެ. ހީޓު ތިނެއްގައި ވާދަކޮށް ރޫޔާ ވަނީ 7.66 ސިކުންތުން ދުވެ، އަހުނާގެ ރެކޯޑު މުގުރާލާފަ އެވެ.
މިއީ ބައިނަލްއަގްވާމީ އެއް މުބާރާތެއްގައި ރާއްޖޭގެ ގައުމީ ރެކޯޑެއް ދެ އެތުލީޓަކު މުގުރާލި ފުރަތަމަ ފަހަރެވެ.
އޭޝިއަން އިންޑޯ ޗެމްޕިއަންޝިޕަކީ އަހުނާ ނިޒާރު ވާދަކުރި ފުރަތަމަ ބައިނަލްއަގްވާމީ ގޭމްސް އެވެ. އޭނާ އަކީ މިދިޔަ އަހަރު ކުރިއަށްދިޔަ މަކިޓާ ޖޫނިއާ ޗެމްޕިއަންޝިޕްގެ އެއް ވަނަ އަންހެން އެތުލީޓެވެ.
އަނެއްކޮޅުން މިއީ މިދިޔަ އަހަރުގެ ޖުލައި/އޮގަސްޓް މަހު އިނގިރޭސިވިލާތުގެ ބާމިންހަމްގައި ކުރިއަށްދިޔަ ކޮމަންވެލްތު ގޭމްސް އާއި މިދިޔަ އަހަރުގެ އޮކްޓޫބަރު މަހު ކުވޭތުގައި ބޭއްވި އޭޝިއާގެ 18 އަހަރުން ދަށުގެ ޔޫތު މުބާރާތުގައި ވާދަކުރި ރޫޔާ އަށް ހެދުނު ފުރަތަމަ ގައުމީ ރެކޯޑެވެ.
ރޫޔާ އާއި އަހުނާ އަކީ މި ވަގުތު ރާއްޖޭގައި އެންމެ ބާރަށް ކުރިއަރަމުން އަންނަ އުއްމީދީ އަންހެން ދުވުންތެރިންގެ ތެރެއިން ފާހަގަކޮށްލެވޭ ދެ ދުވުންތެރިންނެވެ.
