ދުނިޔޭގެ އެތުލެޓިކްސް ޖަމިއްޔާ، ވޯލްޑް އެތުލެޓިކްސްގެ ކޯޗިން ކޯހުގެ ލެވަލް ދޭއް ފުރިހަމަ ކުރުމުގެ ފުރުސަތު ސާއިދު ސްޕޯޓްސްގެ ކޯޗު އަހުމަދު ހަސަން (ކުލޫ) އާއި ގައުމީ ކޯޗިން ޕޫލުގެ، ފާތިމަތު ޔަސްމަން އަށް ލިބިއްޖެ އެވެ.
އެތުލެޓިކްސް އެސޯސިއޭޝަން އޮފް މޯލްޑިވްސް އިން މިއަދު ބުނީ ވޯލްޑް އެތުލެޓިކްސް ލެވެލް 2 ކޯޗިން ކޯހުގައި ބައިވެރިވުމަށް ޔަސްމަން އާއި ކުލޫ، މިއަދު، ތައިލެންޑްގެ ވެރިރަށް ބެންކޮކަށް ފުރާފައިވާ ކަމަށެވެ.
އެ ގޮތުން، ގައުމީ ކޯޗިން ޕޫލުގައި އައްޑޫގައި މަސައްކަތްކުރާ ޔަސްމަން، މި ލިބުނު ފުރުސަތުގައި ކޯޗިން ކޯހުގައި ލެވެލް 2 ފުރިހަމަ ކުރާނީ ތުރޯ އިން އިންނެވެ. އަދި، ގައުމީ އެތުލެޓިކްސް ޓީމުގައި ކުރިން ހިމެނި ގިނަ މުބާރާތްތަކެއްގައި ވާދަކުރި، ކުލޫ ލެވަލް ދޭއް ފުރިހަމަކުރާނީ، މިޑްލް އެންޑް ލޯންގް ޑިސްޓެންސް އިންނެވެ.
ޔަސްމަން އާއި ކުލޫގެ ކޯޗުކަމުގައި، ގިނަ އެތުލީޓުންތަކެއް ވަނީ، ނިމިދިޔަ ގައުމީ ޖޫނިއާ އެތުލެޓިކްސް މުބާރާތާއި އިންޓަ ސްކޫލް އެތުލެޓިކްސް މުބާރާތުގައި ވާދަކޮށްފަ އެވެ.
އެތުލެޓިކްސް އެސޯސިއޭޝަނުން ބުނެފައިވަނީ، ވޯލްޑް އެތުލެޓިކްސް އިން އެކި ސަރަަހައްދުތަކުގައި ގާއިމްކޮށްފައިވާ ޑިވެލޮޕްމަންޓް ސެންޓަރުތަކުގައި، ކުރިއަށްދާ މި ފަދަ ކޯސްތަކުން ފުރުސަތު ލިބުމާ އެކު، ޝައުގުވެރިވާ ކޯޗުންނަށް އެ ފުރުސަތު ހުޅުވާލާ ކަމަށެވެ. އަދި ޝައުގުވެރިކަން ފާޅުކުރާ ކޯޗުންގެ ސީވީތައް ބެލުމަށް ފަހު، އެންމެ ރަނގަޅު ކޯޗުންނަށް މި ފުރުސަތު ފަހިކޮށްދޭ ކަމަށެެވެ.
