އަމީނީ މަގު އަވަހަށް ނިންމުމަށްޓަކައި ތާރު އެޅުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން އެމްޓީސީސީއާ ހަވާލުކޮށްފި އެވެ.
އާރުޑީސީން ބުނީ އަމީނީ މަގުގައި ހޮޅިވަޅުލައި، އެހެން މަސައްކަތް ނިމިފައިވާ ބައިތަކުގައި ތާރުޅުމުގެ މަސައްކަތް ބުރާސްފަތި ދުވަހު އެމްޓީސީސީއާ ހަވާލުކުރީ އެ ކުންފުނިން ގެނެސްފައިވާ މެޝިންތައް ބަހައްޓާނެ ބިމެއް ހަމަޖެހިފައި ނެތުމާއި، އެމްޓީސީސީން މިހާރު ވެސް ތާރުއެޅުމުގެ މަސައްކަތްތަކެއް އެއާޕޯޓުގައި ކުރިއަށް ގެންދާތީއާއެކު އަމީނީ މަގުގެ މަސައްކަތް ހަލުވި ކުރުމަށް ކަމަށެވެ.
ޕްލޭނިން މިނިސްޓްރީގެ ސްޓޭޓު މިނިސްޓަރު އަކްރަމް (ވ) އާއި އާރުޑީސީގެ މެނޭޖިން ޑިރެކްރު މޫސާ އަލިމަނިކު (ކ) ރޭގެ ވަގުތެއްގައި އަމީނީ މަގުގައި. -- ފޮޓޯ: ހުސައިން ޝާފިއު
"ނުވެގެން އެއްވެސް މަސައްކަތެއް އެއްވެސް ބަޔަކާ ހަވާލު ކޮށްފައި ނުވާނެ. މާލޭގެ އަމީނީމަގުގައި ތާރު އެޅުމަށް ބޭނުންވާ މެޝިނަރީޒް އަދި މެޓީރިއަލް މުޅި މަގަށް ބޭނުންވާ ވަރަށް އާރުޑީސީގައި އެބަހުރި. ޝެޑިއުލް އާ އެއްގޮތަށް ތާރުގެ މަސައްކަތް ކުރިއަށް ގެންދިއުމަށް މިވަގުތަށް އޮތް ދައްޗަކީ [މެޝިނަރީޒް ބެހެއްޓުމަށް] ބިމުގެ ދަތިކަން،" އާރުޑީސީގެ މީޑިއާ އޮފިޝަލް ވިދާޅުވި އެވެ.
ޕްލޭނިން މިނިސްޓްރީގެ ސްޓޭޓު މިނިސްޓަރު އަކްރަމް ކަމާލުއްދީން ވިދާޅުވީ އާރުޑީސީގެ މެޝިންތައް ބަހައްޓާނެ ބިން ހަމަޖެހުނުހާ އަވަހަކަށް އަމީނީމަގުގެ ދެން އޮތް ބައިގައި ތާރުއެޅުމުގެ މަސައްކަތް ކުރިއަށް ގެންދާނީ އެ ކުންފުނިން ކަމަށެވެ.
އަމީނި މަގު ޒަމާނީ ފެންވަރަށް ތަރައްގީކުރުމުގެ ގޮތުން ތާރު އަޅައިގެން އެ މަގު ހެދުމުގެ މަސައްކަތް އާރުޑީސީން ފެށީ މިދިޔަ އަހަރު އޯގަސްޓު، 30، ގަ އެވެ. މި މަސައްކަތް އެ ކުންފުންޏާ ހަވާލު ކުރީ 210 ދުވަސް ތެރޭގައި ނިންމާ ގޮތަށެވެ. އެހެންކަމުން މެއި 28، 2023 އަށް އެ މުއްދަތު ހަމަވާނެ އެވެ.
ތާރު އަޅައިގެން އަމީނީ މަގު ހެދުމުގެ މަސައްކަތް ތާވަލު ކުރި ދުވަހަށް ނުނިމޭނެ ކަމަށާއި ނިމޭނެ ކަމަށް މިހާރު ލަފާ ކުރެވެނީ ސެޕްޓެމްބަރުގެ ނިޔަލަށް ކަމަށް ޕްލޭނިން މިނިސްޓަރު މުހައްމަދު އަސްލަމް ބުދަ ދުވަހު މަޖިލީހުގައި ވިދާޅުވި އެވެ.
ޖުމްލަ 15 ސެގްމަންޓަކަށް ބަހާލައިގެން އަމީނީ މަގު ހެދުމަށް ހަވާލުކޮށްފައި ވަނީ 84 މިލިއަން ރުފިޔާ އަށެވެ.
