ޕެރިސް (ފެބްރުއަރީ 10) - މީގެ ދެ އަހަރެއްހާ ދުވަސް ކުރިން ޔޫރަޕްގެ ނަން މަޝްހޫރު 12 ޓީމަކުން ފައްޓަން މަސައްކަތް ކުރި ޔޫރަޕިއަން ސުޕަ ލީގު ހުއްޓުމަކަށް ފަހު އެނބުރި އައިއިރު، އާ ފޯމެޓެއްގެ ދަށުން ލީގު ލޯންޗްކުރާއިރު، 60 ނޫނީ 80 ޓީމު އޭގައި ޝާމިލުވާނެ ކަމަށް ސުޕަ ލީގު ޕްރޮމޯޓްކުރާ ކުންފުނި، އޭ22 ސްޕޯޓްސް މެނޭޖްމަންޓް އިން ބުނެފި އެވެ.
މީގެ ދެ އަހަރު ކުރިން، 2021 ވަނަ އަހަރުގެ އޭޕްރީލް މަހު 18 ވަަނަ ދުވަހު 12 ކްލަބާ އެކު ސުޕަ ލީގު އިއުލާނުކުރި ނަމަވެސް އެކި ފިއްތުންތަކާ ހުރެ 72 ގަޑިއިރު ވެސް ނުވަނީސް އޭގެ ތެެރެއިން ނުވަ ޓީމެއް ވަނީ އެ ލީގުން ވަކިވެފަ އެވެ.
ފީފާ އާއި ޔުއެފާ އަދި ގައުމުތަކުގެ ފުޓްބޯޅަ އެސޯސިއޭޝަންތަކުގެ ޕްރެޝަރާ ހެދި ސުޕަ ލީގުން ވަކިވި ކްލަބްތަކަކީ އިނގިރޭސި ޕްރިމިއާ ލީގުގެ މެންޗެސްޓާ ޔުނައިޓެޑާއި މެންޗެސްޓާ ސިޓީ، ލިވަޕޫލް، އާސެނަލް، ޓޮޓެންހަމް، ޗެލްސީ، އިޓަލީގެ އޭސީ މިލާނާއި އިންޓަ މިލާން އަދި ސްޕެއިނުގެ އެތުލެޓިކޯ މެޑްރިޑް އެވެ. ލީގުން ވަކިނުވެ ދެމި އޮތީ ރެއާލާއި ބާސެލޯނާ އަދި ޔުވެންޓަސް އެވެ. އެކި ފަހަރު މަތިން ރެއާލްގެ ރައީސް ފްލޮރެންޓީނޯ ޕެރޭޒް އާއި ބާސެލޯނާގެ ރައީސް ޔޮއާން ލަޕޯޓާ ވަނީ "ފަރުދާގެ ފުރަގަހުގައި" ސުޕަ ލީގުގެ މަސައްކަތް ކުރިއަށްދާ ކަމަށް ވިދާޅުވެފަ އެވެ.
އެންމެ ފުރަތަމަ ސުޕަ ލީގު އިއުލާނުކުރިއިރު، އޮތީ 20 ކްލަބްގެ ލީގަކުން ފަށާ ގޮތަށެވެ. އޭގެ ތެރޭގައި ރެލިގޭޓް ނުވާ ގޮތަށް ފައުންޑަ މެމްބަރުންގެ ގޮތުގައި 12 ކްލަބް ހިމެނެ އެވެ. ދެން، އޭގެ އަށް އިތުރު ވަނީ ތިން ކްލަބެއްގެ އިތުރުން، ގައުމުތަކުން ކާމިޔާބު ހޯދައިގެން ސުޕަ ލީގަށް ކޮލިފައިވާ ފަސް ޓީމެކެވެ.
މި ފޯމެޓްގައި ގިނަ މައްސަލަތަކެއް ހުރި ކަމަށް، އޭރު ވެސް ފުޓްބޯޅައިގެ ތަޖުރިބާކާރުން ދިޔައީ ބުނަމުންނެވެ. ސުޕަ ލީގުގެ މަސައްކަތް، ކުރަމުން އަންނަ އޭ22 ސްޕޯޓްސް މެނޭޖްމަންޓްގެ ޗީފް އެގްޒެކްޓިވް، ބާން ރެއިޗާޓް ވިދާޅުވީ، ސުޕަ ލީގުގެ މަސައްކަތް ހުއްޓުމަކަށް ނާންނަކަމަށާއި މީގެ ކުރަން ޖެހޭ އެހެން ކަންކަން ނިންމަން މަޑުޖައްސާލީ ކަމަށެވެ.
އެ ގޮތުން، ކުރަން ޖެހުނު އެއް ކަމަކީ ސުޕަ ލީގުގެ ފޯމެޓް މުރާޖާ ކުރުން ކަމަށާއި އެ ގޮތުން އަލަށް އެކުލަވާލެވޭ ފޯމެޓްގައި 60 ނޫނީ 80 ވަރަކަށް ޓީމު، ސުޕަ ލީގުގެ ތެރެއަށް ވަންނާނެ އޭ22 އިން ބުނެ އެވެ. ފޯމެޓާ ބެހޭގޮތުން ތަފްސީލީ މައުލޫމާތުތަކެއް ހިއްސާކުރުުމުގެ ބަދަލުގައި ރެއިޗާޓް ވިދާޅުވީ ލީގުގައި ބައިވެރިވާ ކޮންމެ ޓީމެއް ވެސް އަމިއްލަ ގައުމުގެ ޑޮމެސްޓިކް ސީޒަން ކުޅެވޭނެ ކަމަށާއި ސުޕަ ލީގުގައި ގިނަ ވެގެން ކުޅެން ޖެހޭނީ 14 މެޗު ކަމަށެވެ.
ލީގުގެ ފައުންޑަރު މެމްބަރުން ރެލިގޭޓްނުވާ ގޮތަށް އޮންނަ މާއްދާ އުވާލާނެ ކަމަށް ދެކެވޭ ވާހަކައާ ބެހޭގޮތުން އޭ22 އިން ސީދާ ޖަވާބެއް ނުދެ އެވެ.
ސުޕަ ލީގު ހުއްޓުވުމުގެ މަސައްކަތް ޔުއެފާ އިން އަންނަނީ ފީފާއާ ގުޅިގެން އަދިވެސް ކުރަމުންނެވެ.
ބާސެލޯނާގެ ރައީސް، ލަޕޯޓާ، ސްޕެއިންގެ މީޑިއާތަކަށް ދިން އިންޓަވިއުއެއްގައި ވިދާޅުވީ ސުޕަ ލީގު ފަށަން ކުރަން ޖެހޭ ކަންކަން ވަރަށް ހަލުވި ދުވެލީގައި ކުރިއަށްދާ ކަމަށާއި ރަސްމީ ސިފައެއްގައި އެކަން ކުރެވޭނެ ގޮތްތަކެއް ހޯދުމަށް ޔުއެފާއާ އެކު މަޝްވަރާ ކުރަން އަބަދުވެސް ތައްޔާރަށް ހުރި ކަމަށެވެ.
ސުޕަ ލީގެއް އައުމުގެ ފައިދާ ކްލަބްތަކަށް މާލީ ގޮތުންނާއި ސަޕޯޓަރުންނަށް ފުޓްބޯޅައިގެ ފޯރީގެ ތެރެއިން ކުރާނެ ކަމަށް ލަޕޯޓާ ވަނީ ވިދާޅުވެފަ އެވެ.
