ރޯމް، އިޓަލީ (ޖޫން 2) - ޔޫރަޕްގެ ބޮޑެތި ބައެއް ކްލަބުތަކުން އެއްވެގެން ހަދަން އުޅުނު ސުޕަ ލީގުން ޔުވެންޓަސް ވެސް ވަކިވެއްޖެ އެވެ.
ޔުވެންޓަސް އަކީ ޔުއެފާ އިން ވަކިވެ، ޔޫރަޕިއަން ސުޕަ ލީގު (އީއެސްއެލް) އުފެއްދުމަށް އެއްވި 12 ކްލަބުގެ ތެރެއިން އެއް ކްލަބެވެ.
އެކަމަކު, ޔުވެންޓަސް ވަނީ ސުޕަ ލީގުން ވަކިވެ، ޔޫރަޕިއަން ކްލަބު އެސޯސިއޭޝަން (އީސީއޭ)އާ އަލުން ގުޅުމަށް އެދިފަ އެވެ.
ޔުވެންޓަސް އިން ވަނީ ސުޕަ ލީގުން ވަކިވާން ނިންމައި، އެ ލީގުން ވަކިވުމުގެ މަސައްކަތް މިދިޔަ އަހަރު ފަށައިފަ އެވެ. ސުޕަ ލީގުން ވަކިވުމަށް ރެއާލް އާއި ބާސާލޯނާގެ އޮތޮރައިޒޭޝަން (ހާއްސަ ހުއްދައެއް) އެ ކްލަބުން ބޭނުންވި އެވެ.
ސުޕަ ލީގުގެ އުފެއްދުމުގެ ހުވަފެން ދޫނުކޮށް، އެ ލީގުގައި މިހާރު ތިބީ ސްޕެއިންގެ ބޮޑު ދެ ބާރު ކަމަށްވާ ބާސެލޯނާ އާއި ރެއާލް މެޑްރިޑެވެ.
ސުޕަ ލީގު އުފެއްދުމަށް އުޅުނު 12 ކްލަބުގެ ތެރޭގައި އިނގިރޭސި ޕްރިމިއާ ލީގުގެ ހަ ކްލަބު ވެސް ހިމެނެއެވެ. އެކަމާ ގުޅިގެން މި ހަ ކްލަބު ވެސް 2021 ވަނަ އަހަރު އީސީއޭ އިން ވަކިކުރިއެވެ. އެކަމަކު، ސުޕަ ލީގުން ވަކިވުމުން، އެ ހަ ކްލަބުވެސް ވަނީ އީސީއޭއަށް އަލުން ވައްދައިފައެވެ.
އީސީއޭގެ ޗެއާމަން ނާސިރު އަލް ހަލީފާ ވަނީ ޔުވެންޓަސްގެ ނިންމުމަށް މަރުހަބާ ކިޔައިފަ އެވެ.
"ޔުވެންޓަސް މި ޖަމިއްޔާއަށް އެނބުރި އައުމަކީ ލިބުނު ފަހުރެއް. ޔުވެންޓަސްއަކީ މުއްސަނދި ތާރީހެއް އޮތް ކްލަބެއް،" ޕީއެސްޖީގެ ޗެއާމަންކަން ވެސް ކުރައްވާ ނާސިރު ވިދާޅުވި އެވެ.
އީއެސްއެލް ހެދުމަށް ޔޫރަޕްގެ ކްލަބުތަކުން މަސައްކަތް ފެށުމާ އެކު، ޔުއޭފާ އާއި ފީފާގެ އިންޒާރު ކްލަބުތަކަށް ލިބުނެވެ. އަދި ކްލަބުތަކުގެ ސަޕޯޓަރުން ވެސް ވަނީ އެކަމާ ދެކޮޅަށް އަޑު އުފުލައިފަ އެވެ.
ޔުވެންޓަސް ސުޕަ ލީގުން މި ވަކިވީ އެ ލީގުގައި ކްލަބުތައް ބައިވެރިވުން ފީފާ އާއި ޔުއޭފާ އަށް ނުހުއްޓުވޭނެ ކަމަށް ކޯޓް އޮފް ޖަސްޓިސް އޮފް ދަ ޔޫރަޕިއަން ޔޫނިއަން އިން މިދިޔަ އަަހަރުގެ ޑިސެމްބަރު މަހު ނިންމާފައި ވަނިކޮށެވެ.
