މޯލްޑިވްސް ޓޫރިޒަމް ޑިވެލޮޕްމެންޓް ކޯޕަރޭޝަން (އެމްޓީޑީސީ)ގެ އާ އަމާޒަކީ އަލަށް ތަރައްގީކުރާ ރިސޯޓުތަކާއެކު އިންޑަސްޓްރީގެ އެންމެ އުހަށް ކުންފުނި ގެންދިއުން ކަމަށް އެ ކުންފުނީގެ މެނޭޖިން ޑިރެކްޓަރު ތަޒުމީލް އަބްދުއް ސޮމަދު މިރޭ ވިދާޅުވެއްޖެ އެވެ.
އެމްޓީޑީސީ އަށް 15 އަހަރު ފުރުން ފާހަގަ ކުރަން ކުރުނބާ މޯލްޑިވްސްގައި ބޭއްވި ޖަލްސާގައި ތަޒުމީލް ވިދާޅުވީ އެމްޓީޑީސީ އުފެދިގެން އައީ ވަރަށް މާތް މަގުސަދެއްގައި ކަމަށާއި، 2006 ގައި ކުންފުނި އުފެއްދި މަގުސަދަކީ އިގުތިސޯދީ ދިރުން ކަމުގައިވާ ޓޫޒިއަމްގެ މަންފާ އާއި ނަފާ ހުރިހާ ރައްޔިތުންނަށް ލިބި ދިނުން ކަމަށެވެ.
ހިއްސާދާރުން ކުރި އިންވެސްޓެމްންޓު ކުރު މުއްދަތެއްގެ ތެރޭގައި ލިބުނަސް ބޮޑެތި ގޮންޖެހުންތަކެއް ކުރިމަތިވި ކަމަށް ތަޒުމީލް ވިދާޅުވި އެވެ. ފާހަގަ އެ ކުރެއްވީ 2010 ވަނަ އަހަރު ޓޫރިޒަމް ގާނޫނަށް ގެނައި ބަދަލާއެކު ރިސޯޓުތަކުގެ ބިމު ކުލި ބޮޑުވެ، ކުރިމަތިވި މާލީ ގޮންޖެހުމުގެ ވާހަކަ އެވެ.
"މިއަދު މި ކުންފުންޏަކީ އެންމެ ހިއްސާދާރުން ގިނަ އަހަރުން އަހަރަށް ފައިދާވަމުން އަންނަ ކުންފުންޏެއް. ހިއްސާދާރުންނަށް ފައިދާވާނެ ފެންވަރު ހުރި ކުންފުންޏެއް. މި ސިނާއަތުގެ އެންމެ ކުރިއަށް ދިއުމަކީ އަޅުގަނޑުމެންގެ އަމާޒު،" އޭނާ ވިދާޅުވި އެވެ.
އާ އަމާޒަށް ދިއުމަށްޓަކައި ހދ. އަތޮޅުގައި ހަދާ ރިސޯޓު 2024 ވަނަ އަހަރު ހުޅުވޭއިރު، 230 އެނދުގެ އާ ރިސޯޓެއް ތަރައްގީކުރަން ޕްލޭން ކޮށްފައިވާކަން އިއުލާނު ކުރެއްވެވި އެވެ.
"އެ ގާބިލުކަން [އާ ރިސޯޓު ހެދުން] ކުންފުނީގައި އެބަ ހުރި. މި ރިސޯޓު ތަރައްގީ ކުރެވޭނީ ޒަމާނީ ފެންވަރަށް ހުރިހާ ގިންތިއަކަށް ހިދުމަތް ދެވޭ ގޮތަށް،" ތަޒުމީލް ވިދާޅުވި އެވެ.
ޔޫއޭއީގެ ކުންފުންޏަކާއެކު ޖޮއިންޓް ވެންޗާ ހަދައިގެން ތަރައްގީކުރާ ރާއްޖޭގެ އެންމެ އެނދުނު ގިނަ ރިސޯޓުކަމުގައިވާ ހދ. ނާގޯށި 2024 ގައި ހުޅުވާނެ ކަމަށް ވެސް އޭނާ ވިދާޅުވި އެވެ. އެއީ 1600 އެނދުގެ ރިސޯޓެކެވެ.
ނާގޯށި ވެގެންދާނީ ރާއްޖޭގައި ހަދާ އެންމެ ބޮޑު ރިސޯޓަށެވެ. އެ ރިސޯޓުގެ މަސައްކަތް ނުނިމި ލަސްވެގެން ދިޔުމުން އެއްބަސްވުން ބާތިލުކުރުމަށް ފަހު އަލުން 50 އަހަރަށް ދިނީ 2017ގަ އެވެ.
އާ ވެބްސައިޓް، ލޯގޯ އަދި އޮފީސް އިމާރާތް
އެމްޓީޑީސީގެ ލޯގޯ ބަދަލުކޮށް އާ ލޯގޯ އަކާއި އާ ވެބްސައިޓް މިރޭ އިފްތިތާހު ކުރި އެެވެ. އަދި ހުޅުމާލޭގައި ހަދާ ހަތް ބުރީގެ އޮފީސް އިމާރާތް އިފްތިތާހުކޮށް ދެއްވީ ވެސް ޖަލްސާގެ ޝަރަފުވެރި މެހްމާން ފޮރިން މިނިސްޓަރު އަބްދުﷲ ޝާހިދު އެވެ.
އެ އޮފީސް އިމާރާތެއް ހެދުމަށްޓަކައި ހުޅުމާލޭގެ ފުރަތަމަ ފިޔަވަހިން 6000 ގެ ބިމެއް ގަނެފައިވާ ކަމަށާއި މި އަހަރު ތެރޭގައި އޮފީސް އިމާރާތުގެ މަސައްކަތް ފަށާނެ ކަމަށް ތަޒުމީލް ވިދާޅުވި އެވެ.
އެމްޓީޑީސީ ތަރައްގީކޮށް، ހިންގަމުން އަންނަނީ މައިނާ އިންޓަނޭޝަނަލް ކުންފުންޏަށް ސަބް ލީޒްކޮށްގެން ހިންގާ ބ. ކިހަވަށް ހުރަވަޅި (އަނަންތާރާ ކިހަވަށް) އަދި ތުރުކީގެ އަހްމެޓް އައިދިޒް ކުންފުންޏަށް ސަބް ލީޒް ކޮށްގެން ހިންގާ ގދ. މަގުދުވާ (އަޔާދާ މޯލްޑިވްސް)އެވެ.
އެމްޓީޑީސީގެ 47 ޕަސެންޓް ހިއްސާ ސަރުކާރަށް އޮތްއިރު، 53 ޕަސެންޓް އޮތީ އާންމުންނަށެވެ.
