ރައްޔިތުންގެ މަޖިލީހުގައި މިއަދު އޮތް ޖަލްސާގައި އަޑުގަދަކޮށް ނުރުހުން ފާޅުކުރީ ބަހުސެއްގައި ވާހަކަ ދައްކަވަމުން ގެންދެވި ދެ މެންބަރަކާ މެދު މަޖިލީހުގެ ރިޔާސަތުން ތަފާތުކޮށް އަމަލުކޮށްފައިވާތީ ކަމަށް މަޖިލީހުގެ މާފަންނު ހުޅަނގު ދާއިރާގެ މެންބަރު މުހައްމަދު ފަލާހް ވިދާޅުވެއްޖެ އެވެ.
މިއަދުގެ ޖަލްސާގައި ހުށަހެޅިފައި އޮތް ސަރުކާރު އޮފީސްތަކަށް އިމާރާތްތައް ކުއްޔަށް ހިފުން ހުއްޓުވުމާ ގުޅޭ ގަރާރަކަށް ބަހުސްގައި ހަނިމާދޫ ދާއިރާގެ މެންބަރު އަބްދުލްގަފޫރު މޫސާ ދެއްކެވީ މިދިޔަ މަހު އޮތް އެމްޑީޕީގެ އެތެރޭގެ ރިޔާސީ ޕްރައިމަރީއާ ގުޅޭ ވާހަކަ އެވެ.
ހުށަހެޅިފައިވާ ގަރާރުގެ މައުޟޫއުގެ ބޭރުން ވާހަކަ ދައްކަވާތީ ކަމަށް ވިދާޅުވެ އޭރު ރިޔާސަތުގައި އިންނެވި ވިލުފުށި ދާއިރާގެ މެންބަރު ހަސަން އަފީފް ވަނީ ގަފޫރުގެ ވާހަކަތައް ހުއްޓުވައިފަ އެވެ. އެއާއެކު، އެމްޑީޕީގެ ބައެއް މެންބަރުން ތަޅުމުގައި އަޑުގަދަކުރައްވަން ފެއްޓެވި އެވެ.
އޭގެ ތެރެއިން އެއް މެންބަރަކީ ފަލާހެވެ. މަޖިލީހުގެ ގަވާއިދަށް ހުރުމަތްތެރިކޮށް ހިތުމަށް ރިޔާސަތުން ތަކުރާރުކޮށް އެންގެވި ނަމަވެސް، ފަލާހު އަޑުގަދަކުރުން ހުއްޓައެއް ނުލި އެވެ. ފަހުން އޭނާގެ ނަން އިއްވައި، ތަޅުމުން ނެރުނެވެ. އޭރު ރިޔާސަތުގައި އިންނެވީ ވިލުފުށީ ދާއިރާގެ މެމްބަރު ހަސަން އަފީފް އެވެ.
ފަލާހު ވަނީ ނުރުހުން ފާޅުކުރި ސަބަބު "އަދަދު" ނޫހަށް ކިޔައިދެއްވައިފަ އެވެ. އޭނާ ވިދާޅުވި ގޮތުގައި، ނުރުހުން ފާޅުކުރި މައިގަނޑު ސަބަބަކީ ދެ މެންބަރަކާ މެދު ރިޔާސަތުން ދެ ގޮތަކަށް އަމަލު ކުރުމެވެ.
"އުނގޫފާރު ދާއިރާގެ އިއްޒަތްތެރި މެންބަރު [މުހައްމަދު ވަހީދު] ވެސް ވާހަކަ ދެއްކެވީ ހުށަހެޅިފައި އޮތް މައްސަލައަކަށް ނޫން، ހަނިމާދޫ ދާއިރާގެ އިއްޒަތްތެރި މެންބަރު [ގަފޫރު] ވާހަކަ ދެއްކެވީމައި މި އެންގެވީ ހުށަހެޅިފައި އޮތް މައްސަލައަކާ ބަހުސް ކުރުމަށް،" ފަލާހު ވިދާޅުވި އެވެ.
މެންބަރު ވަހީދު އެ ގަރާރަށް ބަހުސް ކުރެއްވި އިރު ވެސް އެމްޑީޕީގެ ރިޔާސީ ޕްރައިމަރީ އާއި، އެމްޑީޕީގެ ޕާލިމެންޓްރީ ގްރޫޕުން ބައެއް މެންބަރުންނަށް ދާދި ފަހުން އެޅި ފިޔަވަޅުތަކާ ގުޅޭ ގޮތުން ވާހަކަ ދެއްކެވި އެވެ. އޭރު މައުޟޫއުއަށް ވާހަކަ ދެއްކެވުމަށް ރިޔާސަތުން ވިދާޅެއް ނުވެ އެވެ.
އެމްޑީޕީގެ ތެރޭގައި ދެ ފެކްޝަން އުފެދިފައިވާއިރު މަޖިލީހުގެ ތެރޭގައި އެ ދެ ފެކްޝަނުން ހޫނު ބަހުގެ ހަމަލާތައް ބަދަލުކުރެ އެވެ. މަޖިލީހަށް ހުށަހެޅޭ މައްސަލަތަކާއި، ބިލުތަކާއި، ގަރާރުތަކުގެ ބަހުސްތަކުގައި ވެސް ދެ ފެކްޝަނުގެ މެމްބަރުންގެ ހިޔާލު ތަފާތެވެ.
ރިޔާސަތުގައި އާންމުކޮށް ތިއްބަވަނީ ނަޝީދު ފެކްޝަންގެ ދެ މެމްބަރުން ކަމަށްވާ އަފީފާއި މަޖިލީހުގެ ނައިބު ރައީސް އީވާ އަބްދުﷲ އެވެ. އެ ބޭފުޅުން ރިޔާސަތުގައި ތިއްބަވާއިރު ތަފާތު ކުރައްވާ ކަމަށް ރައީސް ސޯލިހުގެ ފެކްޝަން މެމްބަރުން ތުހުމަތު ކުރައްވަ އެވެ.
