ރާއްޖޭގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަންގެ ކޯޗުކަމާ ހަވާލުވާ ގޮތަށް ގިނަ ވާހަކަތަކެއް ދެއްކުމުގެ ބަދަލުގައި އެ ޓީމާ އެކު ސީރިއަސް މަސައްކަތްތަކެއް ކޮށް، ކުރިމަތިވާ ހުރިހާ ސުވާލަކަށް ޖަވާބުދޭން ބޭނުންވަނީ ދަނޑުމަތީގައި ނަތީޖާ ނެރެގެން ކަމަށް މާޒިޔާގެ އާ ކޯޗު ބަލްގޭރިއާގެ އިވާން ވެންކޯވް ކޮލޭވް ބުނެފި އެވެ.
ޔޫރަޕާއި އޭޝިއާގައި ކޯޗިންގެ ގިނަ ތަޖުރިބާތަކެއް ހާސިލްކޮށްފައިވާ އިވާން، 65، މާޒިޔާގެ ކޯޗުކަމާ ހަވާލުވެ، އިއްޔެ ވަނީ ކޮންޓްރެކްޓްގައި ސޮއިކޮށްފަ އެވެ.
އިވާން އަކީ ފުރަތަމަ ޑިވިޝަނުގައި މާޒިޔާ އަށް ކޯޗުކޮށްދޭނެ ހަތަރު ވަނަ ބިދޭސީ ކޯޗެވެ.
"މާޒިޔާ އިން މި ފުރުސަތު ދިނީތީވެ ވަރަށް ބޮޑަށް އުފާކުރަން. އަހަރެން ވަރަށް ހިތްހަމަޖެހޭ މާޒިޔާއާ ދެކެވުނު ވާހަކަތަކާ މެދު، އެކަމަކު، އަހަރެން މަސައްކަތް ފެށުމުގެ ކުރިން މާ އިތުރު ވާހަކަތަކެއް ނުދައްކާނަން،" އިންޑޮނީޝިއާ އާއި މިޔަންމާ އަދި ބަލްގޭރިއާގެ 21 އަހަރުން ދަށުގެ ޓީމަށް ކޯޗުކޮށްދިން އިވާން ބުންޏެވެ.
"އަހަރެންގެ ވަޒީފާ އަށް ވާން ޖެހޭނީ މާ ގިނަ ވާހަކަތަކެއް ދެއްކުމުގެ ބަދަލުގައި، ސީރިއަސް މަސައްކަތްތަކެއް ކޮށް، ދަނޑުމަތީގައި ޖަވާބު ދިނުން. އެއީ ކޯޗެއްގެ މަސައްކަތް އޮންނަން ޖެހޭނެ ގޮތަކީ ވެސް، އަހަންނަށް ވެވޭނެ ވައުދަކީ ރަނގަޅު ކުޅުމެއް ދައްކަން މަސައްކަތް ކުރެވޭނެ ކަމުގެ ޔަގީންކަން ދިނުން،"
އިވާން، މިޔަންމާގެ ޔަންގޮން ޔުނައިޓެޑާ ހަވާލުވެހުރިއިރު، ވަނީ 2013 ވަނަ އަހަރުގެ އޭއެފްސީ ކަޕްގައި ރާއްޖޭގެ ނިއު ރޭޑިއަންޓާ ކުޅެފަ އެވެ. އެ ގޮތުން، ނިއު އަތުން މާލޭގައި 3-1 އިން ބަލިވިއިރު، މިޔަންމާގައި ކުޅުނު މެޗުން ވަނީ 2-0 އިން މޮޅުވެފަ އެވެ.
އެ މެޗުތަކާއި ފަހުން ފަހަށް އައިސް، ރާއްޖޭގެ ފުޓްބޯޅައިން ފެނުނު ކަންކަމުގެ އަލީގައި އިވާން ރާއްޖޭގެ ކުޅުންތެރިންނާ ބެހޭގޮތުން ބުނީ "ހުނަރު އެބަހުރި" ކަމަށެވެ.
"ހަގީގަތުގައި މި ވަގުތު އަހަންނަށް ފެންނަ މަންޒަރުތަކުން ބުނެވޭނީ ރާއްޖޭގެ ކުޅުންތެރިންނަކީ ހުނަރުވެރި ކުޅުންތެރިންނޭ. އަހަރެންގެ ދެކޭ ގޮތުގައި އެކުގައި ގުޅިގެން ސީރިއަސްކޮށް މަސައްކަތް ކޮށްފިއްޔާ އަހަރެމެންނަށް ޓީމު ވަރަށް ރަނގަޅުކުރެވޭނެ. ކުރިއަށް ވުރެ މާ ވަރުގަދަ ވެސް ކުރެވޭނެ،" 40 އަށް ވުރެ ގިނަ އަހަރު ކޯޗިންގައި މަސައްކަތް ކޮށްފައިވާ އިވާން ބުންޏެވެ.
"މީގެ އޮތީ އެންމެ ގޮތެއް، އަހަރެމެން ޖެހޭނީ ވަރަށް ގަޔާވެގެން ސީރިއަސްކޮށް މި މަސައްކަތް ކުރުން. އަހަރެން ފުރަތަމަ ބަލާލަން ބޭނުމީ ކުޅުންތެރިން. އަހަރެން އެ ކުޅުންތެރިންގެ ސްކިލް އާއި ޓެކްނިކް ދެން ކޮމްބިނޭޝަން ބަލާފައި، އެ މީހުން ތިބި ކޮންޑިޝަނެއް ވެސް އެނގެން އެބަޖެހޭ،"
އިވާން މުޅިން ކަހަލަ ގޮތަކަށް އޭޝިއާ ފުޓްބޯޅައިގައި މަަސައްކަތް ކޮށްފައިވަނީ އާސިއާން ސަރަހަައްދުގެ ގައުމުތަކުގަ އެވެ. މާޒިޔާ އަކީ އިވާން ދެކުނު އޭޝިއާގެ ކްލަބަކަށް ކޯޗުކޮށްދޭނެ ފުރަތަމަ ފަހަރެވެ.
އިވާން ބުނީ އޭޝިއާގައި މަސައްކަތް ކުރާއިރު، އޭނާ އަބަދުވެސް ކުޅުންތެރިންނަށް ވިސްނައިދެނީ މި ބައްރުގެ އެންމެ މައްޗަށް ދެވޭނީ ކިހާ މަސައްކަތްތަކެއް ކޮށްގެން ކަމަށެވެ.
"ވަރަށް މުހިންމު ކަމެއް، ޓީމުގެ ކުޅުންތެރިން އެބަ ވިސްނަން ޖެހޭ އޭޝިއާ ލެވަލްގެ އެންމެ މައްޗަކީ ކޮބައިތޯ، މިސާލަކަށް ޖަޕަނީސް ފުޓްބޯޅަ، ކޮރެއާ ފުޓްބޯޅަ، ޗައިނީސް ފުޓްބޯޅަ، (ސައުދީ) އަރަބިއްޔާ ފުޓްބޯޅަ، އަހަރެމެން ކުރިއަރަންޏާ މަޑުމަޑުން އެ ހިސާބަށް ހުނަރުގެ ބޭނުން ހިފައިގެންދާންވީ. މި ހުރިހާ ކަމެއް ކުރެވޭނީ ވަރަށް ސީރިއަސް މަސައްކަތްތަކެއް ކުރެވިގެން، އެކުގައި އެންމެން ތިބެގެން،" އިވާން ބުންޏެވެ.
"މި ޓީމާ (މާޒިޔާއާ) އެކު އަހަރެން ބޭނުންވާ ގޮތެއް އެނގޭނީ ކުޅުންތެރިންނާ އެކު ކޮންމެ ވެސް ވަރަކަށް މަަސައްކަތް ކޮށްލެވުނީމަ، އެ އަށް ފަހު ތި ސުވާލަށް ޖަވާބު ދެވޭނެ،"
މާޒިޔާ އިން އާ ސީޒަަނަށް ޕްރީ ސީޒަން ޕްރެކްޓިސް ފެށުމަށް ހަމަޖެހިފައިވަނީ މިއަދު ހަވީރު އެވެ.
