ރައީސް އިބްރާހިމް މުހައްމަދު ސޯލިހުގެ ވެރިކަމުގެ ފުރަތަމަ ދައުރުގެ ފަހު ރިޔާސީ ބަޔާން ވެގެން ދިޔައީ ތާރީހީ ބަޔާނަކަށެވެ. އިއްޔެ ރައްޔިތުންގެ މަޖިލީހަށް އިއްވެވި އެ ބަޔާނުގައި ވަނީ އުއްމީދާއި ގައުމުގެ އިޖުތިމާއީ އިގުތިސޯދީ އާ ތަސައްވުރެއް ކުރައްސަވައި ދެއްވާފައިވެ އެވެ.

ވޭތުވެ ދިޔަ ހަތަރު އަހަރު ދަތިކަމެއް ކުރިމަތި ނުވެ ރިޔާސީ ބަޔާން އިއްވެވި ނަމަވެސް އިއްޔެގެ ރިޔާސީ ބަޔާން އިއްވެވީ ދެ ވަނަ ފަހަރަށް ޕޯޑިއަމް އަށް ވަޑައިގަތުމަށް ފަހު އެވެ. ފުރަތަމަ ފަހަރު ރިޔާސީ ބަޔާން ފެއްޓެވުމާއެކު އިދިކޮޅު ބައެއް މެމްބަރުން މަޖިލީހުގެ ނިޒާމު ގެއްލުވާލުމަށް އަޑުއުފުއްލަވަން ފެއްޓެވުމުން ކުޑަ ވަގުތުކޮޅަކަށް ޖަލްސާ މެދުކަނޑާލެއްވެވި އެވެ.

އެއަށް ފަހު، މަޖިލީހުން ނުކުމެވަޑައިގަތުމަށް ނަން އިއްވަވާފައިވާ ހަތަރު މެމްބަރުން މާލަމުން ބޭރުކުރި އެވެ. އެއީ ނައިފަރު ދާއިރާގެ މެމްބަރު އަހުމަދު ޝިޔާމް، މާވަށު ދާއިރާގެ މެމްބަރު މުހައްމަދު ސައީދު، ތޯރިގް އިބްރާހިމް އާއި ފެލިދޫ ދާއިރާގެ މެންބަރު އިބްރާހިމް ފަޒުލް ރަޝީދެވެ.

ރިޔާސީ ބަޔާން ރައީސް ސޯލިހު އިއްވެވި ޖަލްސާއަށް، ރިޔާސީ ޕްރައިމަރީގައި ފިކުރެއްގެ ދިރުމުގެ ޝިޔާރުގައި ވާދަކުރެއްވި އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ތާއިދު ކުރައްވާ ގިނަ މެމްބަރު ވަޑައިނުގަންނަވަ އެވެ. އެމްޑީޕީގެ ރިޔާސީ ޕްރައިމަރީން ނަޝީދު ބަލިވެވަޑައިގަތުން އެ މަނިކުފާނު ފުރިހަމައަށް ގަބޫލު ނުކުރައްވަ އެވެ.

ސިޔާސީ ގޮތުން ހަލަބޮލިވެފައި އޮތް މިދަނޑިވަޅުގައި، ދެ ވަނަ ދައުރަކަށް ވާދަކުރެއްވުމުގެ ރިޔާސީ ޓިކެޓާއެކު ހުންނެވި ރައީސް ސޯލިހު އިއްވެވި ރިޔާސީ ބަޔާނުގައި ގިނަ އުއްމީދުތަކެއް ރައްޔިތުންނަށް ދެއްކާފައިވެ އެވެ. އިޖުތިމާއީ އެތައް މައްސަލަތަކަށް ހައްލު ގެންނަވާނެ ކަމާއި، އިގުތިސޯދު ދެގުނަ ކުރައްވާނެ ކަމަށް ވިދާޅުވި އެވެ.

ރިޔާސީ ބަޔާނުން ފާހަގަ ކުރެވުނު މުހިންމު ހަބަރުތައް

މުހިންމު ބައެއް ހަބަރުތައް

• ރައީސް އިބްރާހިމް މުހައްމަދު ސޯލިހުގެ މި ރިޔާސީ ދައުރުގެ ފަހު ރިޔާސީ ބަޔާން އިއްވުމުގެ ޖަލްސާއަށް، މަޖިލީހުގެ މައިނޯރިޓީ ލީޑަރުންނަށް ވަންނަން ފުރުސަތު ނުދިނުމުން ކަންބޮޑުވުން ފާޅުކުރެއްވި އެވެ.

• ވެރިކަން ކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ތެރޭގައި އުފެދިފައިވާ ހިޔާލު ތަފާތުވުންތަކުގައި ރައީސް މުހައްމަދު ނަޝީދަށް ތާއިދު ކުރައްވަމުން ގެންދެވި ހެންވޭރު އުތުރު ދާއިރާގެ މެމްބަރު އިބްރާހިމް މުއިއްޒު ފަޅި ބަދަލުކުރައްވައި ރައީސް އިބްރާހިމް މުހައްމަދު ސޯލިހުގެ ކެމްޕާ ގުޅިވަޑައިގެންފި އެވެ.

• ރިސޯޓުތަކާއި ސިނާއީ ރަށްރަށުގައި މަދުވެގެން 30 މީހުންް ވޯޓުލުމަށް ރަޖިސްޓްރީކޮށްފި ނަމަަ ވޯޓު ފޮށި ބަހައްްޓާނެ ކަމަށް އިލެކްޝަން ކޮމިޝަން (އީސީ)އިން ބުނި ކަމަށް އިއްޔެ ރިޕޯޓުކުރި އެވެ.

• އެފްއޭއެމް 17 އަަހަރުން ދަށުގެ އިންޓަ ސްކޫލް ފުޓްބޯޅަ މުބާރާތުގައި ކ. ގުރައިދޫ ސްކޫލް އަތުން ކަލާފާނު ސްކޫލް 2-1 އިން މޮޅުވި މެޗަށް ފަހު ގުރައިދޫ ޓީމުގެ ކުޅުންތެރިންގެ ބެލެނިވެރިންނާއި އޮފިޝަލުންގެ އިތުރުން ކުޅުންތެރިން ހިމެނޭ ގޮތަށް މާރާމާރީ ހިންގައި ރެފްރީ އަށް ހަމަލާ ދިނެވެ.

ދުވަހުގެ ކޯޓޭޝަން

އިއްޔެގެ ރިޔާސީ ބަޔާނުގައި ރައީސް އިބްރާހިމް މުހައްމަދު ސޯލިހު ވިދާޅުވީ؛

2028 ނިމޭއިރު، ރާއްޖޭގެ އިގުތިސޯދު ދެގުނަ ވެގެންދާނެ ބޮޑު ބަދަލެއް. 2018 ވަނަ އަހަރު ރާއްޖޭގެ ޖުމްލަ އުފެއްދުންތެރިކަމަކީ 81 ބިލިއަން ރުފިޔާ. ނަމަވެސް އޭގެ 10 އަހަރު ފަހުން،، ރާއްޖޭގެ އިގުތިސޯދު ދެގުނަކޮށް، 2028 ވަނަ އަހަރު ރާއްޖޭގެ އުފެއްދުންތެރިކަން 177 ބިލިއަން ރުފިޔާއަށް ގެންދެވޭނެ. އިގުތިސޯދަށް މިއަންނަ ކުރިއެރުންތަކާއެކު ދައުލަތަށްލިބޭ އާމްދަނީވެސް 2018 ވަނަ އަހަރާ އަޅާބަލާއިރު ދެގުނަ ކުރެވި 2028 ވަނަ އަހަރު 45 ބިލިޔަން ރުފިޔާ ދައުލަތަށް ލިބޭނެ.

ދުވަހުގެ ފޮޓޯ

ރައީސް އިބްރާހިމް މުހައްމަދު ސޯލިހު ރިޔާސީ ބަޔާން އިއްވެވުމަށް ޕޯޑިއަމް ކައިރީގައި ހުއްޓިވަޑައިގަތުމުން، އެކަމަށް ހުރަސް އެޅުއްވުމަށް ޕީޕީއެމްގެ ޑެޕިއުޓީ ލީޑަރު އަދި ނައިފަރު ދާއިރާގެ މެމްބަރު އަހުމަދު ޝިޔާމް އަޑުގަދަ ކުރަނީ. -- ފޮޓޯ: ރައްޔިތުންގެ މަޖިލީހުގެ އިދާރާ