ފާއިތުވި ތިން އަހަރު ރާއްޖޭގެ ޗެމްޕިއަންކަން ހޯދި މާޒިޔާ ސްޕޯޓްސް އެންޑް ރެކްރިއޭޝަންގެ ހެޑް ކޯޗަކަށް ޔޫރަޕާއި އޭޝިއާ ފުޓްބޯޅައިގެ ތަޖުރިބާ ބޮޑު ކޯޗެއް ކަމަށްވާ އިވާން ވެންކޯވް ކޮލޭވް ހަމަޖައްސައި، މިއަދު އެއްބަސްވުމުގައި ސޮއިކޮށްފި އެވެ.
އިވާން، 65، އާ އެކު މާޒިޔާ އިން އެއްބަސްވުމުގައި ސޮއިކުރީ މިއަދު އެކަމަށް ހާއްސަކޮށް ގަލޮޅު ދަނޑުގައި ބޭއްވި އިވެންޓެއްގަ އެވެ. ކޯޗިންގެ ތަޖުރިބާ އަށް ބަލާއިރު، އިވާން ވަނީ 40 ވަރަކަށް އަހަރު ޕްރޮފެޝަނަލް ކޯޗެއްގެ ގޮތުގައި މަސައްކަަތްކޮށްފަ އެވެ.
އޭޝިއާގެ ބައެއް ގައުމީ ޓީމުތަކުގައި ވެސް މަސައްކަތް ކުރި އިވާން އަކީ މާޒިޔާ އަށް ފުރަތަމަ ޑިވިޝަނުގައި ކޯޗުކޮށްދޭނެ ހަތަރު ވަނަ ބިދޭސީ ކޯޗެވެ.
މާޒިޔާއާ އެކު ކޮންޓްރެކްޓްގައި ސޮއިކުރުމަށް ފަހު އިވާން ބުނީ އޭނާ އަށް އިތުބާރުކޮށް މާޒިޔާ އިން އެ ފުރުސަތު ދިނީތީވެ، އެ ކަމަށް ވަރަށް ބޮޑަށް ޝުކުރު އަދާކުރާ ކަމަށެވެ.
"އަހަރެންގެ ވަޒީފާ އަށް ވާން ޖެހޭނީ މާ ގިނަ ވާހަކަތަކެއް ދެއްކުމުގެ ބަދަލުގައި، ދަނޑުމަތީގައި ޖަވާބު ދިނުން. އެއީ ކޯޗެއްގެ މަސައްކަތް އޮންނަން ޖެހޭނެ ގޮތަކީ ވެސް،" އިވާން ބުންޏެވެ.
މާޒިޔާގެ ޗެއާމަން ސާޖިދު (ކ) އާއި ކޯޗު އިވާން ކޮންޓްރެކްޓްގައި ސޮއިކުރަނީ.-- ފޮޓޯ: މުހައްމަދު ޝާބިން/ އަދަދު
މާޒިޔާ އަށް މީގެ ކުރިން ފުރަަތަމަ ޑިވިޝަނުގައި ދެ ފަހަރެއްގެ މަތިން މެސެޑޯނިއާގެ ކޯޗު މަރުޖާން ސެކުލޮސްކީ ކޯޗުކޮށްދިނެވެ. އެއީ 2017 އާއި 2019-20 ސީޒަނުގަ އެވެ. އަދި 2020-2021 ވަނަ އަހަރުގެ ސީޒަނުގެ މެދުތެރެއިން، 2021 ގެ ޖެނުއަރީގައި މާޒިޔާގެ ކޯޗުކަމާ ހަވާލުވީ ސާބިއާގެ ރިސްޓޯ ވިޑަކޮވިޗް އެވެ. އަދި މިދިޔަ ސީޒަނުގެ މެދުތެރެއިން މާޒިޔާގެ ކޯޗުކަމާ ހަވާލުވީ މިދިޔަ އަހަރުގެ ޖެނުއަރީ މަހުގައި ސާބިއާގެ މިއޮޑްރަގް ޖެސިކް އެވެ. ޖެސިކް ވަނީ ދާދި ފަހުން ކާރު އެކްސިޑެންޓެއްގައި މަރުވެފަ އެވެ.
މާޒިޔާގެ އާ ކޯޗަށް ކަޅިއެއް
ކުރިން ޕްރޮފެޝަނަލްކޮށް ކުޅެފައިވާ، އިވާން ކޯޗިން ކެރިއަރު ފެށީ 1982 ވަނަ އަހަރު ބަލްގޭރިއާގެ ލެވްސްކީ ސޯފިއާގެ ޔޫތު ޓީމުންނެވެ. ބަލްގޭރިއާގެ ގިނަ ޓީމުތަކަށް ކޯޗުކޮށްދިނުމަށް ފަހު، އޭނާ ވަނީ ބަލްގޭރިއާގެ 19 އަހަރާއި 21 އަހަރުން ދަށުގެ ގައުމީ ޓީމުގެ ހެޑް ކޯޗެއްގެ ގޮތުގައި މަސައްކަތް ކޮށްފަ އެވެ.
އޭޝިއާގައި އިވާންގެ ފުރަތަމަ ތަޖުުރިބާ އަކީ 2002-2004 އަށް އިންޑޮނީޝިއާ ގައުމީ ޓީމަށް ކޯޗުކޮށްދިނުމެވެ. އޭގެ ފަހުން، 2004-2005 އަށް އޭނާ ވަނީ މިޔަންމާގެ ހެޑް ކޯޗެއްގެ ގޮތުގައި ވެސް މަސައްކަތް ކޮށްފަ އެވެ. އަދި 2007 ވަނަ އަހަރު އަލުން އިންޑޮނީޝިއާ ކޯޗެއްގެ ގޮތުގައި އެއް އަހަރު ހުއްޓެވެ.
އަލުން ބަލްގޭރިއާގެ 21 އަހަރުން ދަށުގެ ޓީމުގައި 2008-2009 ގައި ހުރުމަށް ފަހު އިވާން ދެން އެއްކޮށް ފެނިފައިވަނީ ކްލަބްތަކުންނެވެ. އެ ގޮތުން، މިދިޔަ 10 ވަރަކަށް އަހަރު މުޅިން ކަހަލަ ގޮތަކަށް އިވާން މަސައްކަތްކޮށްފައިވަނީ ބަލްގޭރިއާ އާއި އިންޑޮނީޝިއާގެ ކްލަބްތަކުގަ އެވެ. މާޒިޔާއާ ހަވާލުވުމުގެ ކުރިން އިވާން އެންމެ ފަހުން މަސައްކަތް ކުރީ ބަލްގޭރިއާގެ ފުރަތަމަ ޑިވިޝަނުގެ ކްލަބް، ލޮޮކޮމޯޓިވް ސޯފިއާގަ އެވެ.
މާޒިޔާއާ އެކު އިވާން މަސައްކަތް ފަށާއިރު، މިއީ ދެކުނު އޭޝިއާގެ ކްލަބަކަށް އޭނާ ކޯޗުކޮށްދޭނެ ފުރަތަމަ ފަހަރެވެ. ކްލަބް ލެވަލްގައި ކާމިޔާބަށް ބަލާއިރު، އިވާން ވަނީ ޔަންގޮން ޔުނައިޓެޑަށް 2012 އާއި 2013 ވަނަ އަހަރު މިޔަންމާ ނެޝަނަލް ލީގު ކާމިޔާބުކޮށްދީފަ އެވެ.
