ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ފެކްޝަނަށް ނިސްބަތްވާ ގިނަ މެންބަރުން، ރައީސް އިބްރާހީމް މުހައްމަދު ސޯލިހުގެ މި ރިޔާސީ ދައުރުގެ ފަހު ރިޔާސީ ބަޔާން އިއްވަވާ މަޖިލީހުގެ ޖަލްސާއަށް ހާޒިރުނުވާ ކަން އެނގިއްޖެ އެވެ.
މިއަދު ހެނދުނު ނުވައެއް ޖެހިއިރު ފެށި ޖަލްސާއަށް، ރައީސް ނަޝީދު ފެކްޝަންގެ މެންބަރުންގެ ތެރެއިން ހާޒިރުވީ އެމަނިކުފާނުގެ އިތުރަށް ކުޅުދުއްފުށި އުތުރު ދާއިރާގެ މެންބަރު ޔާސިރު އަބްދުލް ލަތީފް އަދި ހިތަދޫ މެދު ދާއިރާގެ މެންބަރު އަހުމަދު ރަޝީދު އެކަންޏެވެ.
މަޖިލީހުގެ ޖަލްސާ ފެށި ވަގުތު، އިދިކޮޅު ޕީޕީއެމާއި ޕީއެންސީގެ މެންބަރުން ވެސް އެ ކޯލިޝަންގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީން މިނިވަން ކުރުމަށް ގޮވާލައި އިހުތިޖާޖް ކުރަން ފެށުމުން ޖަލްސާ ކުރިއަށް ގެންދެވޭ ގޮތެއް ނުވި އެވެ. ޖަލްސާ ވަނީ މި ވަގުތަށް މެދުކަނޑަލައިފަ އެވެ.
ނަޝީދު ފެކްޝަންގެ ގިނަ މެންބަރުން މަޖިލީހަށް ވަޑައިގެންފައި ނެތްއިރު، މިދިޔަ ޖެނުއަރީ މަހުގެ 28 ވަނަ ދުވަހު އޮތް އެމްޑީޕީގެ ރިޔާސީ ޕްރައިމަރީ ރައީސް ކާމިޔާބު ކުރެއްވީ ވޯޓުލީ މީހުންގެ 61 އިންސައްތަ ހޯއްދަވައިގެންނެވެ. ނަޝީދަށް ލިބިވަޑައިގަތީ 39 އިންސައްތަ ވޯޓެވެ.
ނަމަވެސް ނަޝީދުގެ ފެކްޝަނުން ރައީސަށް ތާއީދު ކުރުމަށް އަދި ނުނިންމަ އެވެ. އެމަނިކުފާނު މަސައްކަތް ކުރައްވަނީ "ފިކުރެއްގެ ދިރުން" ނަމުގައި އެމްޑީޕީގެ ގޮފިތަކެއް އުފެއްދުމަށެވެ. އެ ގޮފިތަކަށް 50،000 މެންބަރުން ހިމެނުމަށް ފަހު، ކެންޑިޑޭޓާ މެދު ފަހުން ގޮތެއް ނިންމާނެ ކަމަށް ނަޝީދު ވިދާޅުވެފައިވެ އެވެ.
އޭގެ އިތުރަށް އެމްޑީޕީގެ އެތެރޭގައި އުފެދިފައިވާ ދެ ފެކްޝަނާ ވެސް އެކުގައި ރިޔާސީ އިންތިހާބުގައި މަސައްކަތް ކުރެވޭނެ ގޮތެއް ހޯދުމަށް އެ ޕާޓީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒު އިސްމާއީލަށް ނަޝީދު ގޮވާލައްވާފައިވެ އެވެ.
މިހާތަނަށް 2008، 2013 އަދި 2018 ގައި ވެސް އެމްޑީޕީގެ ޕްރައިމަރީން ރިޔާސީ ކެންޑިޑޭޓް ގޮތުގައި ނިންމީ ނަޝީދެވެ. ނަމަވެސް 2018 ވަނަ އަހަރު، ނަޝީދަށް އިއްވާފައިވާ ޖަލު ހުކުމުގެ ސަބަބުން ވާދަނުކުރެވޭނެތީ، ރައީސް ސޯލިހަށް ޓިކެޓު ދިނުމަށް އެމްޑީޕީގެ ކޮންގްރެސް މެދުވެރިކޮށް ނިންމީ އެވެ.
ރައީސް ސޯލިހު ވެރިކަމާ ހަވާލުވެވަޑައިގެންނެވި ފަހުން، އެމްޑީޕީގެ އެތެރޭގައި ދެ ފެކްޝަނެއް ވަނީ އުފެދިފަ އެވެ. އޭގެ ފަހުން އެ ޕާޓީގެ އެތެރޭގައި ބޭއްވި ކޮންމެ އިންތިހާބެއް ވެސް، ނަޝީދުގެ ފެކްޝަންގެ މައްޗަށް ސޯލިހުގެ ފެކްޝަން ކުރި ހޯދާފައިވެ އެވެ.
