ދެކުނު އެމެރިކާގެ ޗިލީގެ ޖަންގަލިތަކުގައި ރޯވެ އަނދަމުންދާ އަލިފާންގަނޑުގެ ސަބަބުން މިހާތަނަށް 22 މީހަކު މަރުވެފައިވާ ކަމަށް އެ ގައުމުން ބުނެފި އެވެ.
ޗިލީގެ އިންޓީރިއާ މިނިސްޓަރު ކެރޮލީނާ ޓޮހާ ވިދާޅުވީ އެ ހާދިސާގެ ސަބަބުން 1،429 މީހަކު ވަގުތީ ހިޔާތަކަށް ބަދަލުކޮށްފައިވާ ކަމަށާއި، 544 މީހަކަށް އަނިޔާވެފައިވާއިރު އޭގެ ތެރެއިން 16 މީހަކު ވަރަށް ބޮޑަށް ފިހިފައިވާ ކަމަށެވެ.
ޓޮހާ ވިދާޅުވީ މި ދުވަސްވަރު އެ ގައުމުގައި ރިކޯޑު މިންވަރަކަށް ހޫނުމިން އިތުރުވަމުންދާ ކަމަށެވެ. އަދި މިފަހަރު އަލިފާނުގެ ސަބަބުން އަނދާ ހުލިވެފައިވާ ޖަންގަލީގެ ސަރަހައްދަކީ އާންމުކޮށް މިފަދަ އަލިފާންތަކުގައި އަހަރެއްގެ މަތިން ގެއްލޭ ވަރުގެ ސަރަހައްދެއް ކަމަށްވެސް އޭނާ ވިދާޅުވި އެވެ.
ޗިލީގެ އަލިފާންގަނޑު ނިއްވާލުމަށް ކުރަމުންދާ މަސައްކަތްތަކަށް އެކި ގައުމުތަކުންދަނީ އެހީތެރިކަން ފޯރުކޮށްދެމުންނެވެ. އެގޮތުން އަވަށްޓެރި އާޖެންޓީނާއިން އަލިފާން ނިއްވާ މެޝިނެރީ އަދި ފަޔާފައިޓަރުން ފޮނުވުމަށް ނިންމާފައިވާކަން ޗިލީގެ ރައީސް ގެބްރިއެލް ބޮރިޗް ވަނީ އިއްޔެ އިއުލާންކުރައްވާފަ އެވެ.
ދުނިޔިއަށް ކުރިމަތިވެފައިވާ މޫސުމީ ބަދަލުގެ ސަބަބުން އާންމުކޮށް ހިނގާ ގުދުރަތީ ހާދިސާތައް ހިނގާ މިންވަރު މިހާރު ދަނީ އިތުރުވަމުންނެވެ. އެގޮތުން އެކި ގައުމުތަކުގެ ޖަންގަލިތަކުގައި ރޯވުން އިތުރުވެ، އެ ހާދިސާތަކުން ލިބޭ ގެއްލުންވެސް ދަނީ ބޮޑުވަމުންނެވެ.
