އެމެރިކާގެ މަތިން ދަތުރުކުރަމުން ދިޔަ ޗައިނާގެ ޖާސޫސީ އުޅަނދެއް ކަމަށް ބެލެވޭ ބޮޑު ބެލޫން، އެ ގައުމުގެ ރައީސް ޖޯ ބައިޑެންގެ އަމުރުފުޅަށް ހޮނިހިރު ދުވަހު ވައްޓާލައިފި އެވެ.
އެ އުޅަނދު ދަތުރުކުރަމުން ދިޔައީ 60،000 ފޫޓު މަތިން، ވައި ޖެހޭ ކޮޅަކަށް ކަމަށް ޕެންޓަގަން އިން ވަނީ ބުނެފަ އެވެ. އެމެރިކާގެ ހުޅަނގު ބިތުން އިރުމަތީ އެ ބެލޫން ދަތުރު ކުރަމުން ދިޔައިރު، އަސްކަރީ މުހިންމު ތަންތަން ހުރަސްކޮށްފައިވެ އެވެ.
ބަޑި ޖަހައި ބެލޫން ވައްޓާލަން ބައިޑެން ފުރަތަމަ ބޭނުންވީ ބުދަ ދުވަހު އެވެ. ނަމަވެސް ދަތުރުކުރަމުން ދިޔަ މިސްރާބަށް ބަލައި، ބެލޫން ބިމަށް ވައްޓާލުމުގެ ބަދަލުގައި ލަފާ ދިނީ ކަނޑުގެ ސަރަހައްދަކަށް ވައްޓާލުމަށެވެ. ބެލޫން ވައްޓާލީ ސައުތު ކެރޮލައިނާގެ އައްސޭރި ފަށަށެވެ.
އެއަށް ފަހު އެމެރިކާގެ ރައީސް ވިދާޅުވީ އެކަން ކާމިޔާބު ކަމާއެކު ކޮށްފި ކަމަށެވެ. އަދި އޮޕަރޭޝަން ހިންގި އަސްކަރީ އޮފިސަރުންނަށް އެ މަނިކުފާނު ތައުރީފު ކުރެއްވެވި އެވެ.
ޖާސޫސީ އުޅަނދެއް ކަމަށް އެމެރިކާއިން ބުނާ ބެލޫން ފެނުމާއެކު އެމެރިކާ އާއި ޗައިނާގެ ގުޅުން ގޯސްވެ، އެމެރިކާގެ ސެކްރެޓަރީ އޮފް ސްޓޭޓް، އެންޓޮނީ ބްލިންކަން ޗައިނާއަށް ކުރައްވަން އޮތް ރަސްމީ ދަތުރުފުޅު ވެސް ވަނީ ކެންސަލްކޮށްފަ އެވެ.
ބްލިންކަން ޗައިނާ އަށް ވަޑައިގަތުމަށް ކުރިން ހަމަޖެހިފައި އޮތީ ފެބްރުއަރީ 5 ގަ އެވެ. އެ ދަތުރު ކެންސަލް ކުރެއްވުމަށް ފަހު އޭނީ ވަނީ ޗައިނާގެ ބެލޫނަކީ އެމެރިކާގެ މިނިވަންކަމަށް ދިން ހަމަލާއެއްގެ ގޮތުގައި ސިފަކުރައްވައިފަ އެވެ.
މިކަމާ ގުޅިގެން ޗައިނާއިން ބުނެފައިވަނީ އެމެރިކާގެ ވައިގެ ސަރަހައްދުން ފެނިފައިވާ އުޅަނދަކީ އެ ގައުމުން މޫސުމީ ތަހުލީލުތައް ކުރަން ބޭނުންކުރާ އުޅަނދެއް ކަމަށާއި، އެ އުޅަނދު އެމެރިކާގެ ވައިގެ ސަރަހައްދަށް ގޮސްފައިވަނީ ކޮންޓްރޯލް ނެއްޓިގެން ކަމަށެވެ.
