އެމެރިކާގެ މަތިން ފެނުނު ޗައިނާގެ ޖާސޫސީ އުޅަނދެއް ކަމަށް ޝައްކުކުރެވޭ އުޅަނދެއްގެ ސަބަބުން އެމެރިކާގެ ސެކްރެޓަރީ އޮފް ސްޓޭޓް، އެންޓޮނީ ބްލިންކަން އެ ގައުމަށް ކުރައްވަން އޮތް ރަސްމީ ދަތުރުފުޅު ކެންސަލް ކުރައްވައިފި އެވެ.
ބްލިންކަން ޗައިނާ އަށް ރަސްމީ ދަތުރުފުޅެއްގައި ވަޑައިގަތުމަށް ކުރިން ހަމަޖެހިފައި އޮތީ މި މަހުގެ ފަސްވަނަ ދުވަހުން ހަ ވަނަ ދުވަހަށެވެ. ދަތުރު ކެންސަލް ކުރެއްވުމަށްފަހު ބްލިންކަން ވަނީ ޗައިނާގެ މި އަމަލަކީ އެމެރިކާގެ މިނިވަންކަމަށް ދިން ސީދާ ހަމަލާއެއްގެ ގޮތުގައި ސިފަކުރައްވާފަ އެވެ.
މިކަމާ ގުޅިގެން ޗައިނާއިން ބުނެފައިވަނީ އެމެރިކާގެ ވައިގެ ސަރަހައްދުން ފެނިފައިވާ އުޅަނދަކީ އެ ގައުމުން މޫސުމީ ތަހުލީލުތައް ކުރަން ބޭނުންކުރާ އުޅަނދެއް (ހޮޓް އެއާ ބެލޫން އެއް) ކަަމަށާއި، އެ އުޅަނދު އެމެރިކާގެ ވައިގެ ސަރަހައްދަށް ގޮސްފައިވަނީ ކޮންޓްރޯލް ނެއްޓިގެން ކަމަށެވެ.
ނަމަވެސް އެމެރިކާގެ ދިފާއީ އިދާރާ ޕެންޓަގަން އިން ވަނީ މި އުޅަނދަކީ ޗައިނާއިން ޖާސޫސް ކުރުމަށް ބޭނުންކުރާ އުޅަނދެއްކަމަށް ޝައްކުކުރެވޭ ކަމަށް ބުނެފަ އެވެ.
މި އުޅަނދު ދަތުރުކުރަމުންދަނީ 60،000 ފޫޓު މަތިން ވައި ޖެހޭ ކޮޅަކަށް ކަމަށް ޕެންޓަގަން އިން ވަނީ ބުނެފަ އެވެ. އެގޮތުން އެމެރިކާގެ ހުޅަނގު ބިތުން އިރުމަތީ ބިތަށް ދަތުރުކުރަމުންދާ އެ އުޅަނދު މިހާރު އޮތީ ގައުމުގެ މެދުގައި ކަމަށް ޕެންޓަގަން އިން ވަނީ ބުނެފަ އެވެ.
ޗައިނާގެ 'ޖާސޫސީ' އުޅަނދާއި ގުޅިގެން އެމެރިކާގެ އިދިކޮޅުން ދަނީ އެ އުޅަނދު ވައްޓާލުމަށް ގޮވާލަމުންނެވެ. އެގޮތުން ކުރީގެ ރައީސް ޑޮނާލްޑް ޓްރަމްޕް ވެސް ވަނީ އެ އުޅަނދު ބަޑިޖަހާ ވައްޓާލުމަށް ގޮވާލާފަ އެވެ.
