ސެވިލް، ސްޕެއިން (ފެބްރުއަރީ 2) - ސްޕެނިޝް ލީގުގައި ރޭ ކުޅުނު މެޗުން ރަށުންބޭރުގައި 2-1 އިން ރެއާލް ބެޓިސް ބަލިކޮށް ބާސެލޯނާ އިން ލީގުގެ އެއް ވަނައިގައި އަށް ޕޮއިންޓުގެ ލީޑެއް ނަގައިފި އެވެ.
ރޭގެ ނަތީޖާ އަށް ފަހު، ބާސެލޯނާ ލީގުގެ އެއް ވަނައިގައި އޮތީ 19 މެޗުން 50 ޕޮއިންޓް ހޯދައިގެންނެވެ. ދެ ވަނައިގައި އޮތް ރެއާލް މެޑްރިޑަށް 18 މެޗުން 42 ޕޮއިންޓް ލިބިފައިވާއިރު، މިރޭ ރެއާލުން ވެލެންސިއާއާ ދެކޮޅަށް ނުކުންނާނެ އެވެ.
ބެޓިސް ދަނޑުގައި ރޭ ކުޅުނު މެޗުގައި ބާސެލޯނާގެ ރަފީނިއާ ވަނީ އެ ޓީމަށް ފުރަތަމަ ހާފުގައި ގޯލެއް ޖަހައިދީފަ އެވެ. ފްރެންކީ ޑި ޔޯން ނެގި ހުރަހަކުން ރަފީނިއާ ބޮލުން ޖެހި މި ގޯލު ވަނީ ވީޑިއޯ އެސިސްޓަންޓް ރެފްރީ (ވީއޭއާރް)ގެ އެހީގައި ބެލުމަށް ފަހު ބަލައިނުގަންނަން ނިންމައިފަ އެވެ. މި ހާފުގައި ބާސެލޯނާގެ ޕެޑްރީ ގޮންޒާލޭޒަށް ގޯލު ޖަހަން ހުސްކޮށް ލިބުނު ފުުރުސަތު ހުއްޓުވީ ބެޓިސްގެ ކީޕަރު، ރުއީ ސިލްވާ އެވެ.
ފުރަތަމަ ހާފުގައި ބެޓިސްގެ ކެޕްޓަން، ސާޖިއޯ ކަނަލޭސް އަށް އޭރިއާތެރެއިން ހުސްކޮށް ލިބުނު ފުރުސަތުން އޭނާ ޖެހި ބޯޅަ ބާސެލޯނާގެ ފުލްބެކް، އަލެހަންދްރޯ ބާލްޑޭ ވަނީ ބްލޮކްކޮށްފަ އެވެ.
ބާސެލޯނާގެ ޕެޑްރީ ދެ ވަނަ ހާފް ފެށިގެން ދެ ވަނަ މިނިޓްގައި ޖެހި ޝޮޓް ކީޕަރު ރުއީ ސިލްވާ ވަނީ މަތަކޮށްފަ އެވެ. އެކަމަކު، މެޗުގެ 65 ވަނަ މިނިޓްގައި ބާސެލޯނާ އިން ވަނީ ރަފީނިއާގެ ގޯލުން ލީޑުނަގައިފަ އެވެ. މިއީ، ހިލޭ ޖެހުމަކުން ޑި ޔޯން އަވަސްކޮށްލާފައި ބާލްޑޭ އަށް ދިނުމުން އޭނާ ހުރަސްކޮށްލި ބޯޅައަކަށް ހުސްކޮށް އަރައި، ރަފީނިއާ ޖެހި ގޯލެކެވެ.
ބެޓިސް ކޮޅަށް ގޯލު ޖެހުމަށް ފަހު ލެވަންޑޯސްކީ އުފާފާޅުކުރަނީ: މިއީ މި ސަސްޕެންޝަނަށް ފަހު ލެވަންޑޯސްކީ ލީގުގައި ޖެހި ފުރަތަމަ ގޯލު.
މެޗުގެ 80 ވަނަ މިނިޓްގައި ބާސެލޯނާގެ ދެ ވަނަ ލަނޑު ޖެހި ރޮބަޓް ލެވަންޑޯސްކީ އެވެ. ރޮނާލްޑް އަރައުހޯ އޭރިއާތެރެއިން ދިން ބޯޅަ ލެވަންޑޯސްކީ ވަނީ ގޯލަށް ފޮނުވާލައިފަ އެވެ. މިއީ ސަސްޕެންޝަނުން އެނބުރި އައިސް ލީގުގައި ލެވަންޑޯސްކީ ޖެހި ފުރަތަމަ ގޯލެވެ. މިއީ ލީގުގައި އޭނާގެ 14 ވަނަ ގޯލެވެ. އަދި ހުރިހާ މުބާރާތެއްގައި މި ސީޒަނުގައި ޖެހި 23 ވަނަ ގޯލެވެ.
ބެޓިސް އިން މި މެޗުގައި ޖެހި ގޯލަކީ 85 ވަނަ މިނިޓްގައި ޖޫލްސް ކޫންޑޭ އަތުން ބައިކޮޅަށް ވަން ގޯލެކެވެ. މިއީ ބެޓިސްގެ ހުރަހެއް ދިފާއުކުރަން މެއިން ފަހަތަށް ޖައްސާލި ވަގުތު ކޫންޑޭ އަތުން ބައިކޮޅަށް ވަން ގޯލެކެވެ.
މެޗަށް ފަހު ބެޓިސްގެ މިޑްފީލްޑަރު، ވިިލިއަމް ކަވާލިއޯ ރެފްރީގެ ނިންމުންތަކާ މެދު ހިތްހަމަނުޖެހުން ފާޅުކުރި ގޮތުން އޭނާ އަށް ރަތް ކާޑެއް ދެއްކި އެވެ. މެޗުގެ ތެރެއިން ބެޓިސްގެ ކޯޗު މެނުއަލް ޕެލެގްރީނީ ވެސް ވަނީ ރެފްރީގެ ބައެއް ނިންމުންތަކާ މެދު ނުރުހުން ފާޅުކޮށްފަ އެވެ.
ބާސެލޯނާގެ ކޯޗު ޒަވީ ހެނާންޑޭޒް ބުނީ ބެޓިސް އޮތް ފޯމަށް ބަލާއިރު، އެ ޓީމުގެ ދަނޑުގައި މޮޅެއް ހޯދުމަކީ އުނދަގޫ ކަމެއް ކަމަށެވެ. ބާސެލޯނާ އިން މިހާރު މެޗުތަކުގައި ޕްރެޝަރުގައި ކުޅެ، ނަތީޖާ ނެރުމުގެ އާދައެއް ހިފަހައްޓަމުން އަންނާތީ އެކަމާ އުފާކުރާ ކަމަށް ޒަވީ ވަނީ ބުނެފަ އެވެ.
