ރިސޯޓް ތަރައްގީކުރަން ހުޅުވާލި 15 ތަނުގެ ލިސްޓުން މ. ބޯހުރާ އުނިކޮށް އަލުން އެ ތަންތަން ބީލަމަށް ހުޅުވާލައިފި އެވެ.
ޓޫރިޒަަމް މިނިސްޓްރީން ކުރި އިއުލާނަށް ބަދަލު ގެނައި އެ އިއުލާންގައި ރިސޯޓު ތަރައްގީކުރަން ހުޅުވާލި ތަންތަނުގެ ލިސްޓްގައި މ. ބޯހުރާ ހިމެނޭތީ އެކަމާ ދެކޮޅަށް އެތައް ބަޔަކު އަޑުއުފުލުމާ ގުޅިގެންނެވެ.
ބޯހުރާއަކީ ރާއްޖޭގައި ރާޅާ އެޅުމަށް އެންމެ މަޝްހޫރު ސަރަހައްދުތަކުގެ ތެރޭގައި ހިމެނޭ ތަނެކެވެ. އަދި ބޯހުރާގައި ރިސޯޓު ހެދުމާ ދެކޮޅަށް މ. މުލީ ރައްޔިތުންނާއި ކައުންސިލާއި ތިމާވެށީގެ ހިމާޔަތުގައި މަސައްކަތް ކުރާ ބައެއް ޖަމިއްޔާތަކުން ވަނީ އަޑުއުފުލި އެވެ.
އެ ކަންބޮޑުވުންތައް ދިފާއުކޮށް ޓޫރިޒަމް މިނިސްޓްރީން މިދިޔަ މަހުގެ 25 ވަނަ ދުވަހު ނެރުނު ބަޔާނެއްގައި ބުނީ ބޯހުރާ ރިސޯޓެއްގެ ގޮތުގައި ތަރައްގީކުރުމަށް ހުޅުވާލިއިރު އެރަށު ކައިރީގައި އޮންނަ ސާފް ޕޮއިންޓް، ބޯހުރާގެ ބައުންޑްރީގައި ހިމަނާފައި ނުވާނެ ކަމަށާއި ފަތުރުވެރިކަމަށް ދޫކުރާ ތަންތަނުގެ ސަރަހައްދު ކަނޑައެޅުމުގެ ގާނޫނުގެ ދަށުން ބައުންޑްރީ ކަނޑައަޅާފައިވަނީ ސާފް ޕޮއިންޓް ވަކިކުރުމަށް ފަހުގައި ކަމަށް ވެސް މިނިސްޓްރީން ނެރުނު ބަޔާނުގައިވެ އެވެ.
ޓޫރިޒަމް މިނިސްޓްރީން އަލުން ކުރި އިއުލާނުގައި ވަނީ ރިސޯޓް ހަދަން ދޫކުރާ ތަންތަނުގެ ލިސްޓުން ބޯހުރާ ވަކިކޮށްފަ އެވެ.
މީގެއިތުރުން މި ތަންތަނާ ގުޅޭގޮތުން މައުލޫމާތު ދިނުމަށް މިމަހުގެ ހަވަނަ ދުވަހު ކުރިން ބާއްވަން ހަމަޖައްސާފައި އޮތް ބައްދަލުވުން މިހާރު ވަނީ މިމަހުގެ ހަތްވަނަ ދުވަހަށް ފަސްކޮށްފަ އެވެ.
މި ބައްދަލުވުމުގެ ތާރީހަށް ބަދަލު ގެނައީ ފެބްރުއަރީ ހަވަނަ ދުވަހަކީ މި އަހަރަށް ރައްޔިތުންގެ މަޖިލިސް ހުޅުވާ ދުވަހަށް ވެފައި އެ ދުވަހަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސާފައިވާތީ އެވެ.
ރިސޯޓް ތަރައްގީކުރަން 2019 ވަނަ އަހަރު ހުޅުވާލި ތަންތަނުގެ ލިސްޓްގައި ވެސްް ބޯހުރާ ހިމެނި އެވެ.
