ލަންޑަން (ފެބްރުއަރީ 1) - އިނގިރޭސި ލީގު ކަޕްގެ ސެމީ ފައިނަލް ދެ ވަނަ ލެގުގައި ސައުތެމްޓަން އަތުން 2-1 އިން މޮޅުވެ، ނިއުކާސަލް ޔުނައިޓެޑުން 47 އަހަރަށް ފަހު ލީގު ކަޕްގެ ފައިނަލަށް ދަތުރުކޮށްފި އެވެ.
ފުރަތަމަ ލެގުގައި މީގެ ހަތް ދުވަސްކުރިން ނިއުކާސަލް ވަނީ 1-0 އިން ސައުތެމްޓަން ބަލިކޮށްފަ އެވެ. ރޭ ނިއުކާސަލް ދަނޑުގައި ދެ ވަނަ ލެގުގެ މެޗުން މޮޅުވެ، އެ ޓީމުން މި ވަނީ 1976 ވަނަ އަހަރަށް ފަހު ފުރަތަމަ ފަހަރަށް ލީގު ކަޕް ފައިނަލަށް ގޮސްފަ އެވެ. ނިއުކާސަލް އެ ފަހަރު، ލީގު ކަޕް ފައިނަލުން ބަލިވީ މެންޗެސްޓާ ސިޓީ އަތުންނެވެ.
ނިއުކާސަލް ދަނޑުގައި ކުޅުނު ރޭގެ މެޗު ފަށައިގެން ފަސް ވަނަ މިނިޓްގައި އެ ޓީމަށް ލީޑުނަގައިދިނީ ޝޯން ލޯންގްސްޓާފް އެވެ. މިއީ އޭރިއާތެރެއިން ކިއެރަން ޓްރިޕިއާ ދިން ބޯޅައަކުން ލޯންގްސްޓާފް ޖެހި ގޯލެކެވެ. މެޗުގެ 21 ވަނަ މިނިޓްގައި ނިއުކާސަލްގެ ދެ ވަނަ ގޯލު ޖެހީ، ލޯންގްސްޓާފް އެވެ. ލޯންގްސްޓާފްގެ މި ލަނޑަކީ އޭރިއާތެރެއިން މިގޭލް އަލްމިރޯން ދިން ބޯޅައަކުން ޖެހި ގޯލެކެވެ.
މެޗުގެ 29 ވަނަ މިނިޓްގައި އޭރިއާބޭރުން، ސައުތެމްޓަންގެ ޗޭ އެޑަމްސް އެ ޓީމަށް ގޯލެއް ޖަހައިިދިން ނަމަވެސް އިތުރު ގޯލެއް ޖެހޭގޮތެއްނުވި އެވެ.
ނިއުކާސަލް އިން މެޗު ނިންމާލީ ކުޅުންތެރިއަކު މަަދުކޮށެެވެ. މެޗުގެ 82 ވަނަ މިނިޓްގައި ނިއުކާސަލްގެ ބްރެޒިލް މިޑްފީލްޑަރު، ބްރޫނޯ ގިމާރޭސް އަށް ވަނީ ރަތް ކާޑު ދައްކައިފަ އެވެ. ސައުތެމްޓަންގެ ސެމިއުލް އެޑޯޒީ އަށް ކުރި ފައުލަކަށް ފުރަތަމަ ގިމާރޭސް އަށް ދެއްކީ ރީނދޫ ކާޑެކެވެ. އެކަމަކު، ފަހުން ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ވަނީ ރަތް ކާޑަކަށް ބަދަލުކޮށްފަ އެެވެ.
މިއީ 1999 ވަނަ އަހަރުގެ އެފްއޭ ކަޕް ފައިނަލުގެ ފަހުން، ނިއުކާސަލް އިން ކުޅޭ ޑޮމެސްޓިކް ފުރަތަމަ ފައިނަލެވެ. އެ ފަހަރު ފައިނަލުގައި ނިއުކާސަލް ބަލިވީ މެންޗެސްޓާ ޔުނައިޓެޑް އަތުންނެވެ. މި ފަހަރުގެ ލީގުގެ ކަޕް ފައިނަލުގައި ވެސް ނިއުކާސަލާ ދެކޮޅަށް ނުކުންނާނެ ކަމަށް ބެލެވެނީ ޔުނައިޓެޑް އެވެ.
