ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނުދައްކައި އޮތް، 6.5 މިލިއަން ރުފިޔާގެ ކަރަންޓް ބިލްތަކުގެ މައްސަލަ ހައްލުވެފައިވާ ކަމަށާާއި އެކަމުގެ ޒިންމާ ނެގީ ޔޫތު މިނިސްޓްރީން ކަަމަށް ސްޓެލްކޯގެ މެނޭޖިން ޑިރެކްޓަރު، އަހުމަދު ޝަރީފް، މިއަދު ވިދާޅުވެއްޖެ އެވެ.
މިދިޔަ އަހަރުގެ އޮކްޓޫބަރު މަހުގެ ތެރޭގައި ސްޓެލްކޯ އިން ވަނީ އެފްއޭއެމް ހައުސްގެ، 6.5 މިލިއަން ރުފިޔާގެ ކަރަންޓް ބިލްތަކެއް ނުދައްކައި ހުރި ކަމަށް ބުނެ، ކަރަންޓް ކަނޑާލައިފަ އެވެ. އެކަން ސްޓެލްކޯ އިން ސޯޝަލް މީޑިއާގައި ހިއްސާކުރިއިރު، ފަހުން އެފްއޭއެމުން ވަނީ އެކަމާ ގުޅޭ ގޮތުން ނޫސްބަޔާނެއް ނެރެފަ އެވެ. އެފްއޭއެމުން ބުނީ ސްޓެލްކޯ އިން އެކަން ކުރީ އިހުލާސްތެރިކަމުގެ ނިޔަތެއްގައި ކަމަށް ނުބެލެވޭ ކަމަށެވެ.
އެފްއޭއެމްގެ މި ކަރަންޓް ބިލްގެ މައްސަލައިގައި ސޯޝަލް މީޑިއާގައި ވެސް ގިނަ ވާހަކަތަކެއް ދެކެވުނުއިރު، ފަހުން އޭގެ މައުލޫމާތުތަކެއް މީޑިއާގައި ނުހިނގަ އެވެ.
ސްޓެލްކޯ އިން މިއަދު ބޭއްވި ނޫސްވެރިންގެ ބައްދަލުވުމުގައި، އެފްއޭއެމްގެ ކަރަންޓް ބިލްތަކުގެ މައްސަލައާ ގުޅޭގޮތުން "އަދަދު" އިން ކުރި ސުވާލަކަށް ޖަވާބު ދެމުން، ޝަރީފް ވިދާޅުވީ އެ މައްސަލަ ހައްލުވެފައިވާ ކަމަށެވެ.
"އެފްއޭއެމްގެ މައްސަލަ ހައްލުވެއްޖެ، އިނގޭތޯ، ސަބަބަކީ އެފްއޭއެމްއާ އެކީގައި ޔޫތު މިނިސްޓްރީއާ އެކީގައި އަޅުގަނޑުމެންނަށް ބައްދަލުވުމެއް ބޭއްވިއްޖެ، އަދި އެފްއޭއެމުން ދައްކަން ޖެހޭ ފައިސާގެ ޒިންމާ ޔޫތު މިނިސްޓްރީން ނަގާނެކަމަށް އަޅުގަނޑުމެން ކައިރީގައި ޔޫތު މިިނިސްޓްރީން ވަނީ ވިދާޅުވެފައި،" ޝަރީފް ވިދާޅުވި އެވެ.
"އެހެންވީމަ އަޅުގަނޑުމެން ޔޫތު މިނިސްޓްރީއާ އެކީގައި ޕޭމަންޓް ޝެޑިއުލެއް ހެދުމުގެ މަސައްކަތް މިހާރު ކުރިއަށްމިދަނީ އެހެންވީމަ، އެފްއޭއެމްގެ އެެއްވެސް ތަނަކުން މިހާރު އަޅުގަނޑުމެން ކަނޑާލާފައި ހުރި ތަންތަނުން ކަރަންޓް ދީފައިވާނީ، އެއީ ސަރުކާރުގެ މުއައްސަސާ އަކުން އެކަމުގެ ޒިންމާ ނަގާނެ ކަމަށް ވިދާޅުވެފައިވާތީ، އެކަން އަޅުގަނޑުމެން ދޫކޮށްފައިވާނީ،"
ސްޓެލްކޯގެ މެނޭޖިން ޑިރެކްޓަރު، ޝަރީފް، "އަދަދު" އަށް ދިން އިންޓަވިއުއެއްގެ ތެރެއިން.-- ފޮޓޯ: އަބްދުﷲ އިޔާން/ އަދަދު
މިދިޔަ އަހަރުގެ އޮކްޓޫބަރު މަހުގެ، 23 ވަނަ ދުވަހު، ސްޓެލްކޯ އިން ސޯޝަލް މީޑިއާ މެދުވެރިކޮށް ބަޔާނެއް ނެރެ އެފްއޭއެމް ހައުސް އިން ކަރަންޓް ކަނޑާލިކަން އިއުލާނު ކުރިތާ ދެ ގަޑިއިރެއްހާއިރު ތެރޭގައި އެ މައްސަލައިގައި އެފްއޭއެމް އިން ވެސް ނޫސްބަޔާނެއް ވަނީ ނެރެފަ އެވެ.
އެ ބަޔާނުގައި އެފްއޭއެމް އިން ބުނެފައިވާ ގޮތުން 2020 ވަނަ އަހަރު އެ އިމާރާތް ވަނީ ކޮވިޑު ފެސިލިޓީއެއްގެ ގޮތުގައި ބޭނުންކޮށްފައި ކަމަށެވެ. އަދި އޭގެ ފަހުން ސްކައުޓް އެސޯސިއޭޝަނުން ވެސް އެފްއޭއެމް ހައުސްގެ އިމާރާތް ބޭނުންކުރި ކަމަށް ބުނެފައިވެ އެވެ.
މީގެ އިތުރުން، 2019 ވަނަ އަހަރާއި ހަމައަށް ސްޓެލްކޯގެ އިހުމާލުން ކަރަންޓު ބިލުގެ ގޮތުގައި 1.9 ރުފިޔާ ގެ އަދަދެއް ނުބައިކޮށް އެފްއޭއެމް އަށް ބިލުކުރެވުނު ކަމަށް ސްޓެލްކޯ އިން އިއުތިރާފުވި ކަމަށާއި އެ މައްސަލައިގައި ވެސް ސްޓެލްކޯއިން އެ އެފްއޭއެމް އަށް އޭރު ވެސް އޮތީ އެއްބާރުލުން ނުދީ ކަމަށް އެ ބަޔާނުގައި ބުނެފައިވެ އެވެ. އެ މައްސަލައިގައި އޭރު ވެސް އެފްއޭއެމުން ގާނޫނީ ފިޔަވަަޅެއް އަޅާފައި ނުވަނީ މަޝްވަރާގެ މަތިން މައްސަލަ ހައްލުކުރުމަށް ކަމަށް ވެސް ބުނެފައިވެ އެވެ.
އެފްއޭއެމްގެ ބަޔާނުގައި ދެން ފާހަގަކޮށްފައިވާ އަނެއް ކަންކަމަށް ބަލާއިރު، ރާއްޖޭގައި ކުޅިވަރު ކުޅުމަށް ބޭނުންކުރެވޭ ދަނޑުތަކާއި ކޯޓުތަކަކީ އެ ތަންތަނުގެ ކަރަންޓާއި ފެނުގެ ހަރަދު ދައުލަތުގެ ފަރާތުން ބަލަހައްޓާ ތަންތަންކަމުގައި ވީ ނަމަވެސް، ފުޓްބޯޅަ ކުޅުމަށް ބޭނުންކުރެވޭ މާފަންނު ޓާފް ދަނޑަކީ އެތަނުގެ ހުރިހާ ހަރަދެއް އެފްއޭއެމުން ބަލަމުން އަންނަ ތަނެކެވެ. މިއީ، އެފްއޭއެމް ފިޔަވައި ދިވެހިރާއްޖޭގެ އެހެން ގިނަ ގައުމީ އެސޯސިއޭޝަންތަކަށް ދައުލަތުގެ ފަރާތުން ފޯރުކޮށްދޭ އެހީތެރިކަމެކެވެ.
އޮކްޓޫބަރު މަހު، އެފްއޭއެމް ހައުސްއިން ކަރަންޓު ކަނޑާލިއިރު، އެ އިމާރާތުގައި ހިންގާ ސަރުކާރުގެ ބޭނުމަށް ބޭނުންކުރާ އެހެން ފަންގިފިލާތަކުން ކަރަންޓު ކަނޑާލާފައިނުވާ ކަމަށާއި އެހެންކަމުން މި މައްސަލައިގައި ސްޓެލްކޯގެ "އިހްލާސްތެރިކަމެއް" ނެތްކަން ހާމަވާ ކަމަށް ވެސް އެފްއޭއެމުން އޭރު ބުނެފައިވެ އެެވެ.
