ދެ ބިލިއަން ޑޮލަރުގެ ހަތިޔާރު ޔޫކްރެއިނަށް ފޯރުކޮށްދިނުމަށް ތައްޔާރުވަމުންދާ ކަމަށް އެމެރިކާއިން ބުނެފި އެވެ.
އެމެރިކާގެ ދެ އޮފިޝަލުންނާ ހަވާލާދީ ރޮއިޓާސްގައި ރިޕޯޓުކޮށްފައި ވާގޮތުން އެ ހަތިޔާރުގެ ތެރޭގައި ދުރު ރާސްތާ ރޮކެޓުތަކާއި ހަތިޔާރުތަކަށް ބޭނުންވާ ވަޒަނާއި އެ ނޫންވެސް ހަނގުރާމަ މަތީ އާލާތްތައް ހިމެނޭނެ ކަމަށް ވެއެވެ.
އޭގެއިތުރުން ވައިގެ ހަމަލާތަކުން ރައްކާތެރިވާ ސިސްޓަމްތަކަށް ބޭނުންވާ ބައެއް އާލާތްތަކާއި ޓޭންކަރުތަކާ ދެކޮޅަށް ބޭނުންކުރާ ޖެވެލިން މަރުކާގެ ހަތިޔާރު ހިމެނޭކަން އެމެރިކާގެ އޮފިޝަލުން ކަށަވަރުކޮށްދެ އެވެ.
އެމެރިކާއިން ފޯރުކޮށްދިނުމަށް ތައްޔާރުވަމުން ދާ އެ އެހީގެ މައުލޫމާތު މި ހަފުތާ ތެރޭގައި ރަސްމީކޮށް އިއުލާނު ކުރާނެ ކަމަށް ރޮއިޓާސް އިން ރިޕޯޓު ކުރެ އެވެ.
ޔުކްރެއިނަށް ފޯރުކޮށްދިނުމަށް ތައްޔާރުވަމުންދާ އެހީއަށް ބޭނުންވާ ފައިސާގެ ތެރެއިން 1.725 ބިލިއަން ޑޮލަރު ފަންޑު ކުރުމަށް ހަމަޖެހިފައި ވަނީ ޔޫކްރެއިން ސެކިއުރިޓީ އެސިސްޓެންސް އިނީޝިއޭޓިވްގެ (ޔޫއެސްއޭއައި) ނަމުގައި ހިންގަމުންދާ ފަންޑަކުންނެވެ. އޭގެ ބޭނުމަކީ އެމެރިކާގެ އަސްކަރިއްޔާގައި މިވަގުތު ހުރި ހަތިޔާރު ބޭނުން ކުރުމުގެ ބަދަލުގައި މުޅިން އާ ހަތިޔާރު ގަތުމެވެ.
ޔޫއެސްއޭއައި ފަންޑުން ފޯރުކޮށްދޭ ފައިސާއިން ގަތުމަށް ހަމަޖެހިފައިވާ ހަތިޔާރުގެ ތެރޭގައި ގުރައުންޑު ލޯންޗުޑު ޑަޔަމީޓަރު ބޮން ވެސް ހިމެނެ އެވެ. އެ ބޮމަކި 94 މޭލުގެ ދުރު ރާސްތާއަކަށް ހަމަލާ ދިނުމުގެ ގާބިލުކަން ލިބިފައިވާ ހަތިޔާރެކެވެ.
ދުރު ރާސްތާއަކަށް ހަމަލާ ދިނުމުގެ ގާބިލުކަން ލިބިފައިވަ އެ ހަތިރާރު ބޭނުންކޮށްގެން މީގެ ކުރިން ޔޫކްރެއިން ސިފައިންނަށް ރައްދު ހަމަލާ ނުދެވޭ ހިސާބުތަށް ވެސް ދިފާއު ކުރެވޭނެ ކަމަށް އެމެރިކާއިން ބުނެ އެވެ.
ރަޝިއާ އާ ދެކޮޅަށް ބޭނުން ކުރުމަށް 185 މޭލުގެ ދުރު ރާސްތާއަކަށް ހަމަލާ ދިނުމުގެ ގާބިލުކަން ލިބިފައިވާ އޭޓީއޭސީއެމްއެސް ފޯރުކޮށްދިނުމަށް ޔޫކްރެއިނުން އެދިފައިވީ ނަމަވެސް އެމެރިކާއިން ވަނީ އެކަމަށް އިންކާރުކޮށްފަ އެވެ.
