ސަރުކާރު އޮފީސްތަކަށް ދިމާވެފައިވާ ޖާގައިގެ ދަތިކަމަށް ހައްލެއް ގެނައުމަށް ހުޅުމާލޭ ފުރަތަމަ ފިޔަވަހީގައި ޕްލޭނިން މިނިސްޓްރީން ގާއިމުކޮށްފައިވާ އޮފީސް އިމާރާތަަށް ބައެއް އޮފީސްތައް ބަދަލުކުރުމަށް ތައްޔާރުވެއްޖެ އެވެ.
ޖެންޑާ މިނިސްޓްރީ އެ އިމާރަތަށް ބަދަލުކޮށްފައިވާއިރު އަންނަ އާދިއްތަ ދުވަހުން ފެށިގެން އެ އިމާރާތުން ޖެންޑާގެ ހިދުމަތްތައް ދޭން ފަށާނެ އެވެ. ޖެންޑާ މިނިސްޓްރީއަކީ އެންމެ ފުރަތަމަ އެ އިމާރާތަށް ބަދަލުކުރާ އޮފީހެވެ.
ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ، ޖެންޑާ މިނިސްޓްރީގެ އިތުރުން ހަޔާ އެޑިއުކޭޝަން މިނިސްޓްރީ އަދި ޓްރާންސްޕޯޓު މިނިސްޓްރީ ވެސް އެ އިމާރާތަށް ބަދަލުކުރުމަށް ނިންމާފައިވާ ކަމަށެވެ. މި މިނިސްޓްރީތަކުގެ އިތުރުން އެމެރިކާ އެމްބަސީ ވެސް ހިންގަން ތައްޔާރުވަމުން އަންނަނީ އެ އިމާރާތުގަ އެވެ.
އޮފީސް އިމާރާތުގެ ތިރީ ފަންގިފިލާއަކީ ކާރު ޕާކުކުރުމަށް އަދި ރިސެޕްޝަން ހިންގުމަށް ހާއްސަ ފަންގިފިލާ އެވެ. ދެވަނަ ފަންގިފިލާ ސައިކަލު ޕާކިންއަށް ބޭނުންކުރާއިރު އޮފީސް ހިންގުމަށް ހަތަރު ފަންގިފިލާއެއް ހާއްސަކޮށްފައި ވެއެވެ. އެންމެ މަތި ބޭނުންކުރާނީ ޖަލްސާ މާލަމެއްގެ ގޮތުގަ އެވެ.
ގާތްގަނޑަކަށް 25،000 އަކަފޫޓުގެ ސަރަހައްދެއްގައި އިމާރާތްކުރާ މި އޮފީސް އިމާރާތް އެޅުމުގެ އެއްބަސްވުމުގައި އޮކްޓޫބަރު 2019 ގައި ސޮއިކުރީ މަސައްކަތް ފަށާތާ އަހަރު ދުވަހުގެ ތެރޭގައި މަސައްކަތް އެއްކޮށް ނިންމާލާ ގޮތަށެވެ.
